娛樂八掛大放送★

林依麗：我宣布佢係大歌星囉
容：我只係一粒微塵啫
楊：佢出錯位
何：幫佢默哀

菲律賓慘劇之罵戰四起

曾參選立法會議員的名媛林依麗，本身是非已一籮籮，上周一香港旅客在馬尼拉浴血，全城關注及哀痛。
數日後她上載了一段長達兩分半鐘的自製短片，片中一把女聲先問她對容祖兒呼籲港人不要遷怒在港的菲律賓女傭有何看法時，林依麗語帶不屑地對住鏡頭說：「佢（指容祖兒）有乜資格評論啫？啲咁嘅歌星仔，唔係話睇小佢，咁你歌星咪唱你嘅歌囉……我覺得啲僱主有權選擇去炒菲傭……」

本周一晚，記者在佐敦與林依麗做訪問，其間她着男職員為她打聲明，內容出位。

本周一，容祖兒對林依麗上載鬧她「歌星仔」短片，她在微博留言表示：「只是就（說）出我認為對的東西，無佢咁好氣。」。之後千嬅隨即和應，還揶揄自己「係超齡歌星仔」。

微博掀罵戰

Wyman綿裏針
Wyman除了直斥林依麗為何有講話權威，又話林個樣令他想起早前掌摑警員的 Amina（右圖），似有所指。

何韻詩最激
祖兒的密友何韻詩反應最激，多次留言反諷林依麗，還表示要幫林默哀。

小春馮德倫爆粗
陳小春和馮德倫亦在微博聲援祖兒，還忍不住爆粗。

facebook網友狂插
林依麗上載短片不久， facebook即設有「反對林依麗插容祖兒係歌星仔」群組。

何韻詩力撐

容祖兒和何韻詩的密友關係維持多年，今次祖兒有難，難怪何韻詩出力撐之餘，亦加多兩錢肉緊鬧林依麗。《蘋果日報》圖片

林依麗此言一出，立即引來不少歌星和藝人圍插，其中身為祖兒密友的何韻詩就鬧得最狠，在微博直斥林依麗冇受過教育，寫道：「我們懂得甚麼是禮義廉恥是我們的幸運，就為沒有學懂做人基本禮儀的林女士默哀吧。」
本周一（ 30日）晚，本刊記者在林依麗朋友位於佐敦的地產公司訪問她時，她仍堅持自己沒錯，亦覺得不需要向容祖兒道歉。
她氣定神閒地坐着，繑埋雙手，聲如洪鐘地說：「佢咁細個，唔叫佢歌星仔叫佢乜呀！佢係咪想我叫佢做大歌星吖？如果佢個心唔舒服，咁我咪叫佢大歌星囉！嗱，你（指記者）幫我寫啦，依家林依麗宣布：『容祖兒係大歌星囉！』你估我叫你大歌星，你就真係大歌星 o架嗱……喺我心目中只有梅艷芳、張學友、劉德華四大天王先至係大歌星。其實真正嘅大歌星俾人叫做歌星仔，就唔會嬲嘅，反而會笑笑口，只有歌星仔至介意人哋叫佢做歌星仔嘅啫。」
問到她這一番出位言論，惹來藝人圍攻，在網上掀罵戰，她坦言毫不在乎，還暗示一班歌星做事唔公道，「廿三條仲未立法，人人有發言權。成龍早排懶係代表全港人話唔會怪責菲律賓人，又唔見佢哋（指香港歌星）出聲？梗係啦！佢哋仲想拍戲吖嘛，係咪唔想撈先？」

擺志偉梁思浩上枱

之後林依麗突然將話題扯到曾志偉和梁思浩早年被打事件，似有所指。她對記者說：「有人問我怕唔怕俾人打？因為之前梁思浩同曾志偉都俾人打過，依家我得罪容祖兒喎。我話我『驚未過』呀！知唔知點解？『驚未過』同『未驚過』，係完全唔同 o架！『驚未過』，即係我仲未驚完，隨時可以報警，但『未驚過』就係你根本都唔驚，仲點會去報警吖。如果我俾人打，香港保安局長要即刻俾人炒魷啦。」

發聲明拒道歉

今年 5月，林依麗與謝偉俊在商台爭執，從而演變成女方大嗌遭非禮。就今次林依麗鬧祖兒歌星仔事件，謝偉俊表示：「真係唔想再講佢！」

其間林依麗着身旁一位地產公司男職員照她口講的言詞打一份聲明：

林依麗回應記者
如果想將菲律賓這次慘痛經歷要發洩到我身上，我無所謂，如果容祖兒想我叫佢做大歌星佢會開心 D，我都無所謂，唔好香港人自己互相殘殺，係（喺）我心目中大歌星係四大天王、梅艷芳、譚詠麟，容祖兒同佢地（哋）比確實係歌星仔喎。對自己要有信心，唔好對自己冇信心。有關其他人所講既（嘅）嘢，我唔回應啦，費事比（俾）佢哋出風頭。
接着又無厘頭問記者知否那個是徐福，記者搖頭，她大聲質疑記者：「徐福都唔識？咪係幫個阿婆出頭嗰個囉！如果我同徐福都死咗，香港就冇正義嘅人啦！」事後記者翻查，才知道林小姐說的應該是徐威（即 8月挺身保護在觀塘街頭賣跌打酒，被十多個食環署小販管理隊圍捕的婆婆，而惹上官非的七十歲老翁）。林依麗續說：「我依家唔係議員，唔需要選票，又唔係政府官員，唔使出政府糧，我講自己想講嘅說話啫！我連微博都唔識開，要叫人幫手至知道搞到咁大件事，如果佢（指容祖兒）對自己有信心，使乜介意人哋係咪叫佢做歌星仔啫……我知，我講嘢係直得滯，我一向都俾人話博出位 o架啦！」

據知 9月中，林依麗將會為蕭若元的網上電台開咪，節目名還定為《依例挑理》。問到她辣㷫一眾歌手，會否令人懷疑是為新節目做勢？她又即擺出不在乎樣子說：「其實我都冇同佢（指蕭）簽約，未必會幫佢做 o架，我可能會飛美國探吓個仔，因為佢明年就升大學，個節目一星期一次好困身。」記者致電蕭若元，他說：「嗰個節目仲要開會。（但林依麗話可能唔做。）係，都未定嘅，我哋都有幾個節目，所以完全冇影響。」

林依麗是非多

本周三（ 1日），林依麗照常返回地產公司打躉，對於上載短片被不少藝員歌星直指她博出位，她說：「我不嬲都俾人話博出位 o架啦，咁其實係咪佢哋都係借搞我嚟博出位咋！」

現年 53歲的林依麗可謂半生傳奇， 18歲起活躍於樓宇投資業務， 4年間開了多間地產公司。
96年，林出任仁濟及保良局總理，至 96年 10月，她向外宣布有意參選香港特區首屆行政長官一職，最後，因為當時未滿 40歲不能參選。多年來她辣過不少火頭，堪稱奇女子。

虛報保安非禮
今年初林與所住大廈保安員爭執，其後她報警指遭人非禮，被判虛報罪名成立，判囚兩個月，緩刑十八個月。

鬧賭王包二奶
09年林反對港人包二奶，更舉行「反包二奶遊行」，矛頭直指共有四位太太的賭王何鴻燊，遭賭王斥無知及過時。選立法會議員時，林提出包二奶刑事化出位建議。

踢爆洪芷晴
07年大劉與一班富豪同遊外地，被記者拍到全程。大劉懷疑同行中的洪芷晴爆料給狗仔隊，其後林依麗幫拖，大爆洪在社交圈的醜聞，搞到洪隱居七年，從此絕迹上流社會。

祖兒：要分是非黑白

本周二（ 31日），容祖兒出席英皇新秀大賽，她表示事件唔影響心情：「我無論心理同生理都冇受影響……我仲想請埋佢嚟睇騷㖭！」

周二晚，記者訪問容祖兒，就林依麗再發聲明一事，祖兒先是長歎一聲，收起平時笑容說：「算啦，唔想再捲入呢場無謂罵戰，件事對我無關痛癢，反而覺得呢個 term（指歌星仔）幾 cutie！（何韻詩特別撐你。）今次真係多謝所有關心我嘅人……我喺世界只係一粒微塵，作為公眾人物更加要識分辨是非黑白。」記者之後復述林依麗暗指自己怕重演曾志偉被打事件時，祖兒搖頭不發一言，隨即被兩名助手帶走。

藝人圍剿

容祖兒遭林依麗揶揄，藝人當然撐自己友。除了在微博群起以文字圍攻之外，不少藝人都忍唔住開腔鬧爆。

曾志偉：「人人都知容祖兒係最受歡迎女歌星，點會係歌星仔。全世界都知呢個人（指林）最鍾意出位 o架啦。（林依麗話都驚俾人打，因為你同梁思浩都試過喎。）唔回應，關我咩事，黐線！」之後便急急腳離開。

楊千嬅：「我覺得言論過於偏激，覺得佢好無聊，佢係咪放緊暑假好得閒呀？成件事佢一個人喺度 solo。（想出位！）但係出錯咗位喎！會唔會佢精神壓力太大，無得紓緩呀？」

白韻琴：「呢啲人講佢都益咗佢，佢目的就係想出位之嘛，呢啲人拍埋容祖兒度就佗衰容祖兒，拍埋我度，如果我講佢仲佗衰埋我 o架呀。」

古巨基：「首先嗰位女士講錯，祖兒係歌星女，我先係歌星仔，唔好性別不分。我覺得要識得尊重人，我見到祖兒會安慰佢！」

劉德華：「人哋點講無辦法控制，由得佢！我會支持祖兒！（覺唔覺話歌星仔係貶低祖兒？）可能佢諗住加個仔字會親切啲，好似大家叫我華仔，又或者梁朝偉叫偉仔咁！」

菲律賓慘劇之總統妹起底
無能總統妹拍戲遭持

菲律賓特警廢柴，令我們痛失 8名港人。菲總統阿基諾三世更加無能，補鑊記招唔知笑乜，認真不知所謂！
記招演講表情出事，無能總統應搵細妹教路，皆因細妹姬絲阿基諾已經是當地演藝界一線姐仔，廿年前更賺過港人錢，拍過黃百鳴的《開心鬼 5上錯身》，戲中她更被黃光亮用手搶指頭脅持，認真諷刺。

近日有傳是王祖藍生父的黃光亮，在戲中用槍脅持姬絲，最後姬絲一口咬落黃手臂而獲救。

姬絲好大面子，連《開》片導演兼主角黃百鳴，亦在戲中加插跪地遞拖鞋一幕。

同郭晉安的 goodbye kiss咁簡單都要借位拍攝，姬絲認真巴閉。

在電影片尾播出的花絮片段，可見當年姬絲抵港時已有十名保鑣護送。

無能總統細妹姬絲阿基諾，早於廿年前已加入菲律賓娛圈，當時黃百鳴到菲宣傳另一部電影時，在當地傳媒的拉攏下，成功邀請姬絲擔任《開》片的女主角。
由於姬絲身份顯赫，據知她拍戲前已講到明要入住五星級酒店，及每日最多拍十二小時的條件，才肯來港開工。當時菲律賓政府亦委派了十名保鑣陪姬絲來港，認真大陣仗。劇組亦專登將劇本翻譯成英文，姬絲埋位時就會講英文，之後再搵人配音。身兼《開》片導演和主角的黃百鳴說：「拍完之後佢媽咪仲邀請我去總統府見面，記憶中佢媽咪好客氣同友善，但就唔識佢阿哥。」

今年 39歲的姬絲，現貴為菲律賓電視界一姐，亦會客串跟隨無能阿哥四圍去搶民望。姬絲五年前與比她年輕 11年的籃球明星 James Yap結婚，育有兩子，可惜離婚收場。（網上圖片）

老公多次有外遇，令姬絲早前提出離婚。不過姬絲唔使憂，事關她主持工作多外，更自資出雜誌做埋執行編輯，賺唔少。

郭晉安避談

姬絲在《開》片飾演人見人愛的狗癡，與郭晉安做情侶，不過親熱戲欠奉，與郭晉安的一個 goodbye kiss鏡頭，姬絲亦要借位完成。咁啱得咁蹺，片末有一場戲是姬絲被黃光亮飾演的銀行劫匪，用手槍脅持成為人質。記者致電郭晉安，提到曾夥拍無能總統細妹做情侶，他似乎不欲多談，竟說：「唔記得喇！冇印象！我要湊仔放學喇！」隨即匆匆收線。

網民彈似出巡

無能總統阿基諾三世無恥一笑，令港人一致對他恨之入骨。

為哥哥補鑊，姬絲化晒妝着到行去醫院慰問傷者家屬。

慘劇第二晚，姬絲帶埋當地名產杧果去探望傷難者，更對住鏡頭哀求「 forgive our country」，不過亦得唔到港人原諒，有網民更插她當晚經常撥頭髮，行為似做 show。

菲律賓慘劇之隱形富豪

菲律賓脅持人質慘劇釀成八人死亡，摧毀多個美好家庭，最後只有兩個家庭完好無缺，齊整返港。十五名香港團友中，很多來頭不小，當中與母親逃過大難的李瀅銓，除是大學碩士畢業，更是國際救援組織的行政總監。因肚痛及糖尿病而被釋放的年邁夫婦李奕彪及徐鳳群，曾在英國經商，操得一口流利英語外，在港還持有逾十個舖位，身家逾億。

人質來頭勁　 72歲李奕彪坐擁過億地舖

現年 72歲的李奕彪，和太太李徐鳳群結婚多年。二人一直是虔誠的基督徒。劫後餘生，李太連續數晚失眠，每次憶起死傷團友，更泣不成聲。這數天二人食飯前，亦會為團友禱告：「求主祝福，安慰在生的人，同埋死傷者嘅家屬，讓他們生活安好。」《蘋果日報》圖片

菲律賓脅持人質慘劇中，最年長團友李奕彪，因太太向紅十字會人員求助，表示他隨身的糖尿病藥已吃完，因而獲釋，二人得以平安返港。李氏夫婦今次逃過大難，每提及當天情形，猶有餘悸。早前二人接受美國有線電視新聞網絡（ CNN）訪問時，李太以英語傷心說︰「我們一齊同行四日，大家已經成為朋友。想起死去嘅人，我非常悲傷同難過，根本無法入睡！」而李伯則感激太太救了他，他說：「最驚一刻係落車，槍手突然一手搭住我肩膀，我當時全身震，好驚佢會改變主意。」

為人低調
李氏夫婦返港後，自然成為傳媒追訪對象，不過二人作風低調，每次受訪亦不欲多談，甚少向外間透露自己家庭背景。

逾億舖王
據知，於西貢居住多年的李奕彪，早年於英國經商，已是英國公民，在當地開設物業投資公司，於 97年退休，自此夫婦二人經常周遊列國。「佢哋成日去旅行，唔會長時間留喺香港，多數喺英國生活，所以喺西貢間屋冇乜維修，好舊。」知情人士說。由於李伯投資有道，單是西貢區亦持有五個舖位，而早年賣出位於旺角的舖位，亦賺逾二千萬，身家逾億。據附近街坊指︰「佢（李伯）喺西貢有好多樓，當年萬宜村浸咗，政府都賠咗唔少俾佢哋。」雖然李氏夫婦身家豐厚，但生活十分節儉簡樸。

地舖王一覽表
李太避談
周三（ 1日），早上十時多，李太由教友護送返家，愁眉深鎖的她，一見記者即急步返家，對記者的提問不作回應。而她的教友則表示︰「我哋都好感謝主，不過佢（李太）依家都係瞓唔到，最近都有好多記者搵佢哋，希望大家俾啲空間佢哋。」
 
李奕彪早年和子女移民英國，間中才和太太回港短住。夫婦二人在西貢發迹，附近街坊亦直指他們在西貢有不少物業收租。《蘋果日報》圖片
放大圖片
 
本周三上午，記者在李伯位於西貢的寓所樓下守候。當李太返家時，她不願多談，急急上樓。與她同行的教友對記者表示，李太至今仍瞓唔着。
團友身居要職
菲律賓挾持人質慘劇中， 21名團友中，除了 72歲的李奕彪是隱形富豪外，原來不少團友都來頭不小，接受過高等教育，身居要職。

梁錦榮　董事總經理
以肉身為妻擋子彈而命喪槍手之下的 58歲梁錦榮，一家五口，大女頌詩和細女頌儀亦在慘劇中喪生，兒子頌學因頭部重創，現仍在屯門醫院接受治療，仍昏迷未醒，只剩下梁太一人。
梁錦榮生前在一英國電子工程公司「 Stadium Asia」擔任董事總經理，負責管理東莞廠房。梁是 77年香港大學工業及製造系統工程系（ IMSE）的畢業生，畢業後白手興家在觀塘開設電子公司，後來又在大陸開電子廠。

為拯救太太和子女而犧牲的梁錦榮， 06年斥 358萬購入東涌映灣園，大女頌詩和二子頌學在加拿大讀書。一家人原本齊齊整整，一場慘劇，現只剩下梁太和在醫院中仍昏迷的兒子頌學。

李瀅銓　行政總監
李瀅銓與母親羅錦芬，在人質事件中只受了輕傷。 36歲的李瀅銓，是香港中文大學社會學系碩士畢業生，現於國際發展及救援組織「 ICTI Care Foundtion Asia Limited」擔任行政總監，曾工作於樂施會，負責中國項目。李回港後曾在報章發表了一篇「還死傷者公道，不向弱者抽刃」的五千字文章，以不偏不倚角度，呼籲港人消除反菲情緒。
 
與太太同在慘劇中逝世的汪子林，生前在港鐵車務部任職主任，現遺下一對孤雛姊弟綽瑤、政逸。
汪子林　港鐵車務主任
51歲汪子林生前是港鐵車務部的車務策劃及支援主任，負責後勤工作，在港鐵服務了超過廿年，港鐵承諾會提供其子女的教育及醫療資助，直至成年。

傅卓仁　行政經理
另一遇難死者傅卓仁 39歲，遺下太太以及一對年幼子女，傅生前是在「建銀國際」的綜合發展部任職行政經理。