娛樂八掛大放送★

買部壁畫咁大嘅 LEDTV為乜？想掛牆慳位之外，一定係靚！但有時人諗嘢太本末倒置，揀個巨型掛架，跟住又要求伸出嚟，再左右兩邊擰。無錯，功能係多，但最終裝咗隻吊臂喺屋企，肉酸死！不如咁，睇吓呢款 Samsung C9000，厚度 1cm唔夠，仲內置 3D功能，睇佢有幾型。記者：陳國輝攝影：陳盛臣

其他副刊影片 2D轉 3D　配主動式眼鏡 放大圖片

■搵型男陳豪做嘉賓，一於同 C9000鬥「型」！

或者你會問： 7.98mm即係幾薄先？嗱，就等佢同一蚊銀比較吓，厚度約莫係硬幣一半……都唔夠！呢部電視配備座枱式以及掛牆式兩款設計，而且全身鈦金屬物料，想慳位又靚仔啲，當然選擇後者，但假如你問我當一幅掛畫做擺設好唔好，花六萬幾真金白銀買幅名畫，肯定就無咁平；但以同樣價錢買部「電子相架」，老實講梗係唔值啦！薄只係 C9000嘅外觀賣點，唔好忘記，佢仲係一部 3DTV！立體效果明唔明顯？有無異物飛出屏幕咁真實？單靠硬件仲未夠，軟件如 Blu-ray方面亦要配合，質素先可以提高，但 C9000亦支援 2D轉 3D功能，㩒個按鈕就即時切換，呢樣抵讚！不過咁，如果想睇 3D，各位就要另購立體眼鏡，佢支援主動式 3D眼鏡，成人 Size售$980，小童 Size售$880，仲有眼鏡電池售$680，如果一家四口齊齊睇，無幾千蚊都幾難落樓！

遙控加芒　入房繼續煲

電視遙控一直係必備，但又唔會有要求嘅輔助器材，勢估唔到 C9000隻遙控又會勁成咁！你無睇錯，外形的確似部手機，仲有個 3" Touch Screen，得閒手痕痕，隨時當咗係 iPhone咁捽嚟捽去。好戲在後頭，呢隻 Remote原來安裝咗 Wi-Fi，唔係上網 Check Email，佢係用嚟連接部 C9000，不過又唔係過資料，而係同步睇電視！進入咗連線狀態，電視畫面播乜，遙控屏幕就播乜，試玩發現只差一兩秒 Delay，畫面動作相當流暢，無論你煮緊飯、入咗書房，甚至喺廁所便秘粒幾鐘，呢項功能啱晒你！

放大圖片

■試睇一陣賽車片段，好流暢，只係有輕微 Delay。

放大圖片

■遙控器唔止有芒，仲可以插 3.5mm耳筒，夠晒私隱！

放大圖片

■如果屋企夠大，當正係流動電視拎住睇都得。

放大圖片

■大部份功能 Show埋 Icon，輕觸操作好簡單。

Catch Up 放大圖片

■底座下面有個電動式 Panel，輕輕力用手指掂吓就掂。

放大圖片

■天線或者 USB都好，所有端子喺晒底座背脊，睇落機背仲滑溜！

Profile

尺寸： 55"解像度： 1,920x1,080處理器： 3D HyperReal Engine音效： Dolby、 SRS、 DTS 2.0端子： 4組 HDMI、 2組 USB、 D-sub、 AV體積： 1295.6x784.4x7.98mm重量： 20.4kg查詢： Samsung（ 3698 4698）


■厚度唔夠一蚊一半！