Andy（中）在開鋪前，親身飛到馬來西亞的公司接受 training，之後亦會替總公司 train其他加盟店的導師。圖中為「小拳王 boxing」遊戲，學員要鬥快計數，爭取機會打倒不倒翁。
創業通
搞數學 playgroup半年翻本
2010年06月23日
香港的家長很著重小朋友的學習，令到不少教育中心、 playgroup等應運而生， 29歲、本身從事 event management的 Andy亦看準這個龐大市場，得知有投資者從美國購得專搞數學 playgroup的 Math Monkey代理權，見坊間未有相關公司，於是投資約 30萬，於去年開設第一間加盟店，在短短半年內已經翻本，現時每月盈利達 5萬元。
「家到 Adrian擲骰喇！哦……去到 danger，睇吓要答第幾題。」在 Math Monkey的課室內，幾位小朋友正與 2位導師，以英語在玩「森林特擊隊」遊戲，玩法有點像大富翁，小朋友要擲骰仔，讓棋子前進，當去到 danger或 mathmonkey那一格時，要抽相關的咭，然後解答數學或智力題，其中就讀小一的 Adrian抽到 question21的 danger咭，全部小朋友要齊齊回答題目取分，他們面對 5位數的加減，如 10,000-8,360=1,640，均能在短短 3秒內計出正確答案，心算得非常快。
「小朋友可以喺咁短時間內計到條數，係因為佢哋學咗我哋教嘅 Vedic Math（維迪心算法）， Vedic Math係古印度嘅極速心算系統，佢有 16個法則教小朋友了解到算術系統，拆解各種數式之間嘅關係，跟住可以好快得到答案，唔同坊間靠背口訣去計數。」 Math Monkey負責人 Andy以 93× 97為例，可以使用「 one more then the one before」法則，將條乘數變成加數， 5秒便可計出答案。
上堂頭 20分鐘，會先玩遊戲吸引小朋友的注意力，這堂便玩「森林特擊隊」遊戲，把計數融入遊戲之中。
客人黃太
舊年見到佢哋嘅展覽，覺得上堂方式幾有趣， 8月開始畀仔仔讀，佢家計數真係快咗好多，同埋愈嚟愈鍾意計數，每次去餐廳食飯，佢都爭住計張單，通常幾秒就計到總數，快而準。
先玩遊戲 增投入感
為了提升學習樂趣，課堂不會像補習班般坐定定，是以 playgroup形式進行，在 1小時課堂內，頭 20分鐘會先玩遊戲，如太空人、釣魚高手、小拳王等，學員要鬥快計算搶答，「小朋友嚟上堂，最初一定集中唔到精神，所以我哋會先玩遊戲，複習番上一堂教嘅嘢，吸引佢哋注意力，同埋小朋友喺遊戲中，可以學習與人相處，訓練 EQ，如果佢哋因為計錯數而輸咗，印象就會特別深刻，唔會再重複犯錯；勝出嘅學員可以獲得貼紙，累積一定數目換取禮物，作為鼓勵。」遊戲後，導師才會上堂教授新技巧。
懂得用 Vedic Math教學，並非 Andy特別精通數學，其實 Math Monkey是一個美國品牌， 06年於當地創立，現時全球已有超過 60間分校，分布美國、墨西哥、加拿大、馬來西亞、新加坡等。「舊年我有位朋友，花咗約百萬，買咗港澳嘅代理權返嚟，諗住主力喺香港搞特許經營，佢原本只係搵我幫手搞 management，但我覺得幾啱香港，加上市面仲未有數學嘅 playgroup，索性投資 31萬，自己開第一間加盟店。」
加盟費 5年為 8萬元，另外總公司每月會抽取營業額 30%作專利權費、 5%作總公司宣傳費，「雖然收費都幾多，但總公司畀咗唔少 backup我哋，好似會教加盟者點做 management同 marketing工作，又會幫我哋 train導師，同提供教材、遊戲道具等。」
因應需求 編排課程
美國總公司會提供遊戲的教材和道具，當中包括「太空人磁石板」、幸運輪等。
為迎合香港的市場需要，在開鋪之前， Andy需把課程重新編排，配合香港教統局課程，「課程由 K3至小學，一共分咗 6級，每級會因應番香港教統局嘅小學課程，教番相關嘅內容。」雖然課程已再編排，但 Andy坦言，仍未能令全部家長滿意，「香港嘅家長好著重成績，佢哋想子女可以跳班學習，例如二年班嘅學生，就學四年級嘅嘢，但我哋好睇學生嘅基礎，唔主張隨便跳班，為此都流失咗部分客人。」
此外，課程太新亦是困難在所，「好多家長未聽過 Vedic Math，唔知係咩嚟，每次都要花好多時間去解釋，不斷舉例畀佢哋睇。」 Andy特別印刷了大量單張，解釋 Vedic Math，還會派發課程大綱給家長，讓他們了解內容，「我哋仲設有試班，畀小朋友免費試上一堂，家長同小朋友可以作親身體驗，超過一半嘅家長上完堂會即日 join course。」
去年 6月剛開業， Andy已想盡辦法做宣傳，在多個商場和書展擺攤位，其中以書展成效最好，「我哋有個 icon公仔，會喺書展度攞住塊牌，上面寫住 93× 97呢條數，四圍喺場內請小朋友計，通常佢哋要花幾十秒先計到，我哋就請佢哋去我哋個攤位，教佢哋用 Vedic Math法則，跟住佢哋可以喺 5秒內計到，啲家長見到小朋友計得咁快，通常會有興趣畀佢哋參加課程。」書展後， Andy成功收到近百位學生，之後於 8月正式開班，便已賺錢。
大搞比賽 吸引家長
為了令課程得到更多媒體報道， Andy除了在親子雜誌登廣告外，還搞大型數學比賽，邀請逾 10間學校、超過 400名學生參加，廣收宣傳之效，「個比賽分兩份 paper，其中一份係要小朋友即場睇咗我哋 Vedic Math嘅教材，跟住用 4分鐘做晒份卷，咁做可以透過小朋友，證明畀老師同家長知， Vedic Math係 work嘅。」比賽後，不但多了家長查詢，甚至有學校邀請他們到學校上堂，「不過我哋每次上堂要用好多道具，學習環境亦唔同，所以拒絕咗。」
經過一輪宣傳攻勢，公司現時每星期有 28班，每班約有 8至 10位學生，每堂$150，每月盈利達 5萬元，短短半年已經翻本，為他打下強心針，即使香港總公司計劃再開加盟店， Andy亦毋懼競爭。「其實家已經有唔少人同總公司傾緊加盟，預計年尾會開多 1至 2間，不過總公司暫時唔畀加盟者喺同區開鋪，大家客源唔同，反而加盟店愈多，可以畀到家長更多信心。」 Andy的 playgroup便開設在九龍灣，主攻九龍區的家長，「九龍灣本身有好多教育中心，唔少家長都熟悉呢度，而且交通好方便，加上喺開鋪之前，政府公布會喺九龍灣開國際學校，家已經興建緊，我哋希望將來可以吸埋呢班客。」
現時為吸納更多客源， Andy於暑假推出暑期班，暫時已有超過 100位小朋友參加，估計可開約 50班，「同埋愈嚟愈多家長，打嚟問有冇 K1、 K2嘅班，我哋為咗吸納埋呢班客人，決定加開課程，上堂主要以玩遊戲為主，預計暑假後就可以推出。」未來若成績理想， Andy有意再加開一間加盟店，進攻其他地區。
Andy經常於商場和書展擺展覽宣傳，公司的 icon公仔 monkey會四出找小朋友即場計數，圖為 09年書展內的宣傳活動。
為鼓勵小朋友投入玩遊戲，勝出者可獲貼紙，累積一定數目換取禮品。
開業成本
租金（按金連上期）：$60,000
裝修：$120,000
加盟費：$80,000
牌照：$20,000
雜項：$30,000
總投資：$310,000
每月開支
租金：$20,000
人工：$20,000
專利費：$45,360
宣傳費（總公司及本地）：$10,584
雜項：$5,000
營業額：$151,200
盈利：$50,256
Math Monkey
地址：九龍灣宏開道 16號德福大廈 6樓 3室
電話： 23071028
網頁： http://www.mathmonkey.com.hk
加盟熱線： 8203 8398
搞比賽攻學校
為攻入學校做宣傳， Andy去年搞了一個數學比賽，吸引逾 400名學生參加。
一般 playgroup想做宣傳，除了靠網頁、宣傳單張外，亦可以像 Andy般，揀選一些能直接接觸學生和家長的渠道，如書展、教育展等，此外，若想搞大型比賽藉此到學校宣傳，需要先定場地、人數、比賽規則和內容，然後擬定一份宣傳單張， email和郵寄到各學校，「家啲學校好鼓勵學生參加比賽，啲比賽愈大型，就會愈吸引，場地方面要借一間學校進行，最好係借到中學或者大學嘅地方，如果係名校，啲家長同學校會更加有興趣，有埋傳媒採訪，學生嘅參與度都會大增。」
符合消防條例
現時有很多私人機構開設 playgroup，由於對象多為幼童，並以遊戲方式進行，並非涉及「學術性」的科目，如戲劇、記憶法、算術等，經營的是「非學術性」的技能，它們便不屬於「學校」，毋須領取教育牌照，而只需申請商業登記，可選址在商業大廈，在裝修和人手方面，亦可以很簡單。不過不論是任何性質的教育中心，都必須符合安全要求，如消防及建築條例等，詳情可參考以下網址：
http://www.edb.gov.hk。
留言列表
{{ article.title }}
