跟住杏兒去咗中環嘆住做 facial！又走咗去買 yogurt食。大家睇吓，視后食到嘴嘟嘟，幾投入！望吓隻匙羮，真係一滴都食晒，滋味到呢。
媽咪姐
「斬倉」成功 胡杏兒分後 Sweet爆
有無見過人呢頭喊到豬頭咁講分手，嗰頭就好 happy咁四圍行街食唔停呢？嗱，胡杏兒就係媽咪姐近期最 buy嘅「分手快樂」人辦嘞。
大家隨便數吓， Bosco同過梁靖琪、徐子珊及葉翠翠傳緋聞，依家傳緊嗰個「強國乳牛」柳岩，只不過小 case嚟啫！都未計啲「無幸」見光嘅野花。俾着係媽咪姐，晨早嗌分手啦！不過，胡杏兒一向叻女，佢今年初決定一個人拍大陸劇集《金玉滿堂》嗰時，已經諗清諗楚，要同女不離身嘅 Bosco斬纜，無謂次次喊完又要嘥錢敷 mask。
點知拍劇期間， 41歲嘅「台視一哥」黃少祺又同 32歲嘅杏兒咀出真感情喎，時不時送雞湯俾視后補身，送咖啡俾佢提神，冧到吖。而黃生呢，身高 6呎，坐擁台灣多棟豪宅，身家估計超過 4千萬！難怪媽咪姐聽聞杏兒其實係 4月中已經同 Bosco攤牌，但上個禮拜先俾料周刊同電台，高調宣布分手，順手宣傳埋《怒火街頭 2》，部署好晒。你問何解佢又要喊到似水喉閂唔到掣呢？唉，咁我哋女人仔好感性嘅，都要哀悼吓嗰八年青春，再送人一程㗎嘛。
所以早幾日媽咪姐見到杏兒冇晒事啦，行得食得笑得，直情容光煥發呀！各位失戀失婚失常嘅姊妹唔該學吓視后，見手揸嗰隻長期無表現，「嗱嗱聲」做功課，入番隻穩步上揚嘅「重磅股」。「斬倉」幾時都唔嫌遲，但最緊要快！唔好等下個禮拜呀。
星期二（ 31日）下午成 4點，視后先離開沙田嘅屋企，去灣仔嘅銀行攞啲理財資料。嘩！開門都識笑！梗係啦，依家拍大陸劇大賺人仔，仲賺多個有錢嘅男朋友仔喎。
愈食愈開心
杏兒喺甜品店內，極速隊完一杯 yogurt，再買多幾件招牌美味蛋卷先肯走。當然，粗重功夫視后點使做，由助手拎住盒蛋糕開路。
胡杏兒同黃少祺喺拍劇期間，經常將合照擺上微博。睇到呢啲頭貼頭， sweet到咁嘅肢體語言，一切盡在不言中啦！
視后教你，分手要狠！（設計對白）
公開分手前一日，《衝上雲霄 2》開鏡拜神，杏兒笑晒口撩 Chilam（張智霖）傾偈。如果唔講，仲以為失戀嘅係隔籬頭耷耷嘅陳法拉㖭！
早幾日，《怒火街頭 2》搞宣傳活動，曹永廉勸酒，杏兒又笑到見牙唔見眼咁，心情靚到似擺酒！
留言列表
{{ article.title }}
