漫遊毒物

林子善爆試港版 GTA　《 Sleeping Dogs》

2012年08月01日 ~~ 第271期 Face

外國人眼中嘅香港往往係一個 fantasy，誤以為 2012年成個維港都仲有好多帆船，好在話題新作《 Sleeping Dogs》終於還番一個較港式嘅香港畀大家！此 game號稱港版《 GTA》，淨睇黑幫名叫「新安義」都知地道。
廣東話配音更不得了， trailer幕幕「士多啤梨蘋果橙」，爆粗仲狂放過「和諧」港產片，加上男神陳冠希配音，洪爺林子善聽到有優先試玩都即刻衝住試，梗係要即時送上試玩報告畀各位讀者！

•林子善機迷 profile
•機齡：超過 20年
•喜愛遊戲：《街霸》、《 Rainbow Six》、《 Call of Duty》
•打機趣聞：打《 Rainbow Six》太勁，被其他玩家黑名單見到即踢！

機　　種： PS3、 XBox360
廠　　商： Square Enix
類　　型：動作
人　　數： 1人
售　　價：$388
發售日期： 9月 27日

主角似籮霸
場景少少外國風

一開始試玩子善就話主角沈偉激似籮霸鄭嘉穎，製作人話故事靈感來自《無間道》，一開始講主角接咗「新安義」 order做嘢，其實佢真身係香港警務處三合會局（反黑組）警探，遊戲初期以完成黑幫任務為主。試玩關卡設喺北角，大地圖仲見到灣仔、中環等地區，打到後期會同《 GTA》一樣開放版圖周街走。子善就覺得場景仲比較接近外國人眼中嘅香港。「見到條街有舞獅就 feel到外國味，不過啲招牌同檔口幾似，睇得出有取過景，不過將好多要素湊埋一齊就冇咁真！」

激似籮霸
洪爺話主角沈偉似鄭家穎，而遊戲就冇話用邊個做 model，反而有講由美籍韓裔演員李威尹聲演。

配角艾迪神
由陳冠希聲演嘅 Jackie Mah同主角由細識到大，係「新安義」嘅卒仔，但都有一定戲分，但就唔爆粗，全程講英文。

北角舞獅
北角有個舞台舞獅真係太假，但側面啲檔口就做得幾似女人街。

西醫賣眼鏡
呢個何必利醫生有中文大學家庭醫學文憑，睇真啲入面竟然係賣眼鏡，隔籬仲有個疑似企街大嬸。

配音啜核
爆粗順口

陳冠希配音喺試玩版得兩句，不過一開打就粗口橫飛，子善都哇哇聲讚堅！「主要角色講英文為主，中間夾幾句廣東話粗口有啲怪。最鍾意打緊時敵人同途人嘅反應，堆粗口真係講得順。以前中文 game配音多數都係講國語，聽到廣東話特別興奮！」問埋子善驚唔驚隻 game教壞細路，佢就話唔怕，仲讚廣東話粗口博大精深，唔應該避忌。「英文嚟嚟去去都係 F，邊有中文粗口咁多變化。最重要細路仔明白點解講粗口唔好，唔需要避，事關呢個社會本身就有呢樣嘢。」

爆笑廣東話語錄

街邊賣老翻
埋嚟睇埋嚟揀，全港最平呀！

X你老 Y臭 Z！ Fxck You吖！

撞倒途人
行路唔帶眼，趕住去死咩！

「新安義」鬼仔老大
We must kill the X家剷！

慢動作槍戰
血腥群揪考技術

慢動作槍戰

睇完配音文戲睇動作，《 Sleeping Dogs》有槍戰有拳頭交，動作要素豐富，仲可以利用身邊環境施以血腥殘殺，例如隊人個頭落風扇炮製人頭攪拌機！見慣大場面嘅子善大讚爽快，仲話個戰鬥系統都考技術。「自己有打《 GTA》，呢隻 game個戰鬥系統多招出又要睇準時間反擊避招，打落比《 GTA》更有新鮮感。」

拳頭交有系統

近戰主要分普通攻擊、反擊技、擒拿技 3招。普通攻擊可連打，但敵人識擋，唔可以無雙式亂打。擒拿技可捉住對手移動，帶佢去紅色地點就施以鐵閘攔腰斬、風扇鋸頭等地形攻擊。而敵人攻擊時會閃紅光，睇準按反擊掣可以擋招兼反擊，打緊 A時被 B偷襲就要靠佢防禦。

地形攻擊係最快嘅殺敵效果，一出必殺，人頭攪拌機相當血腥！

隻 game幾易死，唔食得幾拳，所以反擊技一定要識用，第一關大佬只有反技先可破防。

槍戰玩吳宇森 feel

同其他槍 game相似，可以按 L掣玩 cover，特別之處係按 X掣跳出時會進入吳宇森式慢動作，可以畀你睇定瞄準敵人，有啲似《 Max Payne》。稍為挑剔係射擊感稍差， cover永遠唔爛，亂射又可以射死人，相比之下近戰較出色。

除咗 cover，亦有自己跳過障礙嘅 freerun系統，玩落幾爽快。

射擊部分未算一流水平，可能香港唔似美國咁易買到槍，主打拳頭交。

子善總評：「香港人必玩！」

呢隻 game我畀 90分！

子善試玩完之後讚不絕口，加埋香港元素值 90分咁話！「近期《 Diablo 3》打到悶，《 Call of Duty》又未出，呢個空檔一定會玩《 Sleeping Dog》。」記者都認同呢隻 game唔只齋玩粗口噱頭，整體唔錯，打到後期仲可以好似《 GTA》周圍去，係小本經營畫面未必頂級，但遊戲性唔會令人失望。