八號風球開餐
上月 29日，阿 Sa和 William到九龍塘又一城的意大利餐廳「 Amaroni’s Little Italy」食飯。記者進入餐廳內影相時， William即時嘴藐藐說：「放過我哋啦！」
娛聞樂
歌唱老師爆冇上堂 走音 Sa瘟仔大過天
無綫上周六（ 7日）舉行的《翡翠歌星紅白鬥》，雖然雲集全台歌手鬥足三個鐘，但平均收視只有 19點。不少歌手的低級表現淪為全城笑柄，當中蔡卓妍（阿 Sa）演唱其 hit歌〈下一站天后〉時，頻頻走音，不堪入耳。
事後阿 Sa堅稱表現 OK，更揚言「一星期練足五日歌」。不過記者聯絡過阿 Sa的歌唱老師 Christine Samson，她竟說：「我冇見佢咁耐，你話有冇上堂呢？」
先天唱歌資質欠奉的阿 Sa，後天亦疏於練唱，近日更只顧瘟仔。早前記者就拍得她和男友陳偉霆（ William）八號風球依然拍拖開餐。戀愛大過天，阿 Sa明顯懶理下一站仲係咪天后。
阿 Sa雖然四度掛 Twins牌頭開紅館演唱會，但歌唱實力向來一般。不過她始終累積了 11年的舞台經驗，近年演唱亦趨穩定，即使單飛出碟，也取得不俗成績。
為避記者追蹤，二人離開餐廳後，就前後腳搭貨鬆人。
走音 Sa連日來被插得體無完膚，周一（ 9日）中午，她終於在微博耍冧，更揚言會努力裝備自己。
走音近十次
不過阿 Sa在《紅白鬥》的表現實在差強人意，唱一首歌走音走近十次。最離譜的是，當晚她還未察覺自己表現惡劣，更向現場記者說：「我呢排都有練歌，一星期上足五日堂……我真係有努力學唱歌。」似為走音掩飾。
阿 Sa自知歌唱天份有限，早年曾搵過歌唱老師 Christine Samson學習用聲方法。 Christine在娛樂圈可謂桃李滿門，連容祖兒、衞蘭等唱得之人也向她拜師學藝。走音 Sa出醜後，記者聯絡 Christine，她愕然說：「吓！我冇睇過報道，唔知有呢件事呀！唔係咁大件事吓嘩！有時上台表演真係好難講，佢會唔會唔夠瞓呀？」記者告訴她阿 Sa自稱一星期上足五日堂， Christine就感到奇怪，說：「我屋企有啲事，之前返咗加拿大，唔喺香港。佢本身又咁忙，我冇見佢好耐，你話有冇上堂呢？」記者再問 Christine覺得阿 Sa唱歌資質如何，她未有正面回答，只說：「佢係一個好勤力嘅歌手，有時喺唱歌上發掘到啲新嘢都即刻同我講，不過我都會搵吓佢了解吓呢件事（走音）。」
阿 Sa和 William拍拖兩年來，經常夾時間放假，本刊曾拍得二人去年到布吉度假。
William因阿 Sa名氣而水鬼陞城隍，有指女方豪氣一擲二千萬，兩人於跑馬地築愛巢共賦同居。《 FACE》圖片
William扮代表護女友
要由零唱功操到變成唱得之人，的確要花時間，不過阿 Sa就情願將這副心神放於感情上。阿 Sa近年經常被安排返內地和阿嬌合體開巡迴演唱會，所以她和男友 William聚少離多。據知阿 Sa經常遙距 check實男友行蹤，一返港便要急會男友。
上月 29日，當晚由於懸掛八號風球關係，阿 Sa和 William的工作臨時取消，二人便相約到九龍塘一間意大利餐廳開餐。他們發現記者後， William隨即保護女友，「你哋影夠喇啩，影完未呀？」態度惡劣。身旁的阿 Sa就粒聲唔出，向鏡頭報以微笑。
阿 Sa走音事件愈鬧愈大，作為忠心男友的 William當然幫到出口，他說：「大家唔好因一次表現去判斷。」而阿 Sa就 Christine指自己冇上堂，她則解釋是一場誤會：「我嚟緊新碟想有啲新唱法，所以搵咗新嘅老師。但 Christine都好好，我會再努力！」
出事現場
《紅白鬥》當晚，一開聲就走音的阿 Sa原本在台上唱歌，之後就落台捉兩名 fans上台一齊唱，而該兩名 fans聲音還比阿 Sa響亮。
後台遮醜
記者將走音真相告知阿 Sa，阿 Sa隨即眼濕濕，更用手機遮住喊樣。《蘋果日報》圖片
星級導師
菲律賓裔的 Christine Samson，是六十年代著名樂隊 D’ Topnotes主音，擅長唱多種語言歌曲。她 98年開始全職教唱歌，門生多不勝數，包括蘇永康、周慧敏、楊千嬅等，每小時收費至少一千蚊。之後她更開辦歌唱學校和 studio，發掘樂壇新星及幫人監製唱片等。 
Christine曾和 Uncle Ray合作推出英文大碟。
Christine的歌唱學校中放滿她學生送來的簽名 CD。《 FACE》圖片
網友插爆
雖然《紅白鬥》最高收視只有 21點，但坊間迴響極大，而走音 Sa更惹來網友洗板式插爆，有網友甚至認為阿 Sa身旁的兩位 fans唱得還好。
藝人幫口
雖然阿 Sa今鋪擺明爆，但不少藝人力撐阿 Sa出醜也情有可原。
Alan@Mr.：降咗 key
冇得上《紅白鬥》的環球旗下組合 Mr.主音 Alan說：「我見阿 Sa同 fans握手，只係降咗少少 key。」降咗 key來唱原 key，都幾離譜。
單立文：鍛煉少
《紅白鬥》評判之一單立文：「依家歌手少咗機會唱 live，鍛煉比較少，希望佢將來改善。」不過阿 Sa經常出埠登台，都唔算少機會唱 live。
泳兒：驚走光
留言列表
{{ article.title }}
