上週六（7日）楊怡抱恙開工，未埋位時即刻匿埋休息，仲搵個化妝袋當枕頭挨住瞓。

女鐵人

上週二（3日）《名媛望族》出發到上海取景，無綫拍劇出名爭分奪秒，加上海外取景秒秒燒銀紙，身為主角自然會榨乾。結果搞到喺《名》劇擔正嘅楊怡，日日拍兩組外景，朝五至凌晨2時先收工，計埋落妝上妝時間，基本上無瞓過，捱足5日終於冧檔，不過發高燒楊怡都無得唞，流住鼻涕頂硬上，一姐你估易做！


楊怡喺無綫多年出名捱得，不過近年都試過病倒，前年拍《真相》時就試過過濾性病毒入下巴要放假半年休養。今次為40集長劇《名媛望族》，因劇本經常要飛紙仔，喺香港場口不算密集，所以32歲楊怡初期開工仲算舒服。

外景打真軍
不過無綫點會畀你攤長拍？上週二（3日），《名》劇出發到上海取景，由於全劇大部分外景都在車敦影城，外景場數多所以劇組實行兩班制，身為劇中女主角的楊怡，戲分要由朝踩到晚。「佢上到嚟已經唔係好舒服，仲要日日開工，基本上場場都有佢。由朝早5點拍到凌晨2、3點至收工，鐵人都死啦！」劇組人員說。

CoCo北上mark實大孖
上週本刊率先踢爆大孖背正印模女友袁聖殷CoCo，暗撻馬賽，更到其家中過夜，雖然當事人否認，不過就觸動正印CoCo神經，《名》劇到上海取景，CoCo亦特登請三日假mark實男友。大孖亦交足戲，陪女友行街，但週一（9日）CoCo已回港，無人睇實嘅大孖，喺場內繼續撩馬賽。


無得唞惟有死頂。上週六（7日）有重感冒嘅楊怡繼續開工，未埋位前，楊怡坐在一角，又攰又怕太陽曬，結果自己揸住把遮瞓。至週一（9日）《名》劇拍攝騎馬場口，全劇演員到齊，未病好嘅楊怡繼續死撐，好在導演優先拍畢楊怡戲分，更話：「拍完你喇！快啲返去瞓吓啦！」而楊怡就話：「其實都係感冒啫，可能呢度溫差大啦！（點解唔唞吓?）好多場都有我，唞咗大家無嘢拍，所以無得唞㗎！」咁慘？謙謙肉痛喎！

追星攻略
《名媛望族》今次取景20日，地點在上海車敦嘅上海盛強影城，唔少大片如《十月圍城》和《2046》都喺呢度拍，除咗劇組外，粉絲亦可自由出入，在松江城搭個半鐘的士就到，再加80蚊人仔即可同明星近距離接觸。由於有唔少民初時代布景擺設，所以有唔少人來此拍婚紗照；而無綫另一劇集《大太監》則在橫店取景，橫店影城比盛強影城更有規模，除有不同朝代景點，仲有主題公園，最貴入場費要1,290蚊人仔（包四個景點＋歡樂谷），最平20蚊人仔（一個景點），真係豐儉由人。 ####


病到七彩，即使埋位時楊怡亦成個病樣，唔知以為佢好入戲。


食葯硬撐車敦影城無醫生睇，楊怡惟有食住工作人員嘅感冒葯頂住先！


楊怡喺車敦拍《名媛望族》，男友羅仲謙就喺香港為新劇《巴不得媽媽》開工。女友病咗，謙仔會唔會上去探病呢？


大肚look 劇中楊怡同馬國明戲分唔少，但其實佢係劉松仁第四個老婆，劇中仲有埋松哥骨肉添！所以有呢個大肚look出現！


草叢小便週一（9日）大孖繼續為《名》劇開工，出外景時，大孖突然中途下車，在草叢附近解決，劇務就負責在場把風。


大孖被本刊踢爆暗撻馬賽後，正印女友袁聖殷相當緊張，仲親身急飛車敦mark實男友。


上週六（7日）大孖唔使開工，即刻扮好男友陪女友袁聖殷，去上海新天地行街。


大孖陪女友，疑似小三嘅馬賽就全程跟住朱晨麗。不過袁聖殷已回港，馬賽仲會唔會同大孖咁close呢？


正印 CoCo已返港，無人睇實一身輕，大孖即刻撩劇中老婆馬賽傾偈。


車敦


唔少粉絲慕名而來，馬明對粉絲有求必應，而病緊嘅楊怡，亦無托手踭，來者不拒，必定合照。


橫店《大太監》已拍完成回港，6月輪 到《金枝慾孽2》來取景。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄