楊汀叮靠把口掘人仔 @ 娛樂八掛大放送★

楊汀叮靠把口掘人仔

Angelababy師妹楊汀叮龍年被批事業運強勁，最適宜北上發展，加上本身操一口標準流利普通話，對此說深信不疑的她決定今年主攻內地娛樂圈，無論模特兒、電視或電影工作也會嘗試！

模特兒楊汀叮在香港模界打滾多年，甚少參與電影與電視幕前演出，全因其公司管制甚嚴，找她拍戲可說要過五關、斬六將！早前曾有不少香港片商打她主意，但礙於電影內容問題，一一被她拒絕，汀叮自言雖相當恨拍戲，但亦明白公司決定：「講真我乜都想試，但套戲尺度上太過大膽、性感，一來我本身都冇咁嘅身材，二來我都想觀眾專注喺我嘅演技，最緊要個角色有得發揮，唔想要靠身材發揮！」對於演戲，汀叮只是初哥一名，她曾跟張達明學戲，亦客串過電影《全城熱戀熱辣辣》，她說：「雖然喺戲入面只有幾句對白，但係公司安排我入去拍，已經好滿足。」她直言入行前是隻怕羞的「鵪鶉」，連角色試鏡也不敢去，至近來發覺對做戲興趣愈來愈濃，才衝破框框豁出去嘗試。

拒跟師姐闖日

兔年將近尾聲，龍年降臨，汀叮對今年充滿鴻圖大志，皆因有相士批她的龍年事業運所向無敵，特別有利北上發展！提到師姐Angelababy在日本發展愈來愈好，但汀叮卻無意效法，因為自知欠先天優勢：「日本人好流行混血模，會比較吃香，所以我唔會攻日，寧願返內地發展。」雖無「混血」之利，但亦有過人之處，祖籍大連的她自小講得一口流利普通話，比起現今眾多模特兒的不鹹不淡「煲冬瓜」尤勝十倍，她說：「我喺香港出世，但係自小同婆婆溝通都會講普通話，之前試過同內地人同台灣人溝通，佢哋都讚我講得好流利，唔信我係香港人！」

不過歸根究柢，要往內地掘金還要看機遇。汀叮所屬的公司猛人將雲集，既有Baby又有熊黛林，其經理人照顧兩人已忙到甩轆，故她亦非常諒解經理人的難處，惟有盼望可以遇到合適機會向北闖，但強調只要有內地片商賞識錄用，絕不介意長駐內地，笑言對衣食住行要求不高，只求三餐溫飽：「我不嬲都唔係要住得好，唔會特別要求啲乜嘢，基本上我乜都擺得落口，如果食得差咪當減肥囉！不過最緊要暖，因為我真係好怕凍！」她外表弱質纖纖，實質極度捱得，絕非嬌生慣養一族！早前，汀叮曾跟香港一間電視台商討合作細節，但仍猶豫未決：「依家仲係考慮階段，睇吓自己應唔應付到，驚最後入咗去先發覺自己做唔到！」

謀定開舖後路

幕前發展去向未明，汀叮原來已密謀搞生意賺錢：「始終覺得做呢行唔係長遠，想搵到一盤有穩定收入嘅生意。」近日，Baby與導演陳國輝再擲六百萬元於銅鑼灣開設「baby cafe」分店，看得汀叮心癢癢，想用自己的名義開甜品舖：「我間中都有學整甜品，蛋糕好多女仔都鍾意，我對食甜品都有要求，希望等遲啲儲夠錢，遇着個朋友識入貨同睇舖就可以一齊搞！」

後記：情到「龍」時

相士除了批汀叮龍年事業勁，原來其桃花運亦不弱，龍年有望開齋結束剩女生涯！身邊向來不乏裙下之臣的她說：「我嘅命格一向咩嘢都好慢，但係個相士話我龍年事業、愛情都好旺，旺到連擺陣都唔使！」

韋芷茵