不是陳展鵬，我還真不知道，原來白飯魚也有牌子，叫金錢。
那些年，打乒乓球的，窮孩子穿金錢，富孩子穿 Butterfly。
今年 35歲的陳展鵬， 17歲以前，是香港乒乓球代表隊成員，在當年的銀禧、現在的沙田體育學院拿了 5年獎學金：「我由街邊石枱打起，打到入小童群益會，被教練睇中帶入銀禧，唔同嗰啲細細個就着靚衫、用靚拍畀錢學乒乓波嘅 仔。
自細我就鍾意賭氣，係都要着對有咁 w舊得咁舊嘅金錢、用塊打咗 5、 6年嘅爛拍，打贏你班着 Butterfly嘅。」

 

曾經有段日子，穿金錢的陳展鵬真的在球壇吐氣揚眉過，直到有一天，發現打波不能打一輩子，去考藝訓班：從藝訓班畢業，專被安排演下把弱者；轉行做歌手，唱片公司易手賣盤；改拍電影又遇上金融風暴，連爛片都冇人再開，才學會，為甚麼天生有人穿 Butterfly、有些人怎麼都擺脫不了那對爛金錢：「唔係父母欠咗我、畀唔到我 back up，人係要到最低處，先至見到自己一無是處。驕傲？憑乜先？」

2011年一套《真相》，陳展鵬在電視圈回春， 2012年，《回到三國》戲分拍住林峯、《 ATF反恐》風頭壓過吳卓羲，真到時來運到的一天來了，身經百戰，所以淡定。

做戲如打乒乓球

在《萬千星輝頒獎典禮》當晚，陳展鵬雖然冇獎冇收穫，不過，論去年最獲家庭主婦青睞，上位最快的師奶殺手，陳展鵬肯定是年度第一。獎項不論在不在手，機會一直都在那裏，除了戲分和當家小生叮噹馬頭的《回到三國》和《 ATF反恐》，陳展鵬說一月另有一部喜劇等開工，又係擔正。
「 09年返無綫，好似透爐咁，機會接住嚟，火花星星點點咁，每次好似有啲聲氣，轉頭又熄晒火。
直到《真相》，『蓬』一聲真係燒得着。
我唔敢話真係俾人力捧，公司亦的而且確冇咁同我講過，話咩珍姐愛將更加係誤會一場，我唔識打人情牌，同啲高層嘅緣分亦一向薄弱。
不過《真相》監製王心慰，真係我嘅伯樂。」
相比不少將近 40才出頭的男藝員， 30歲就遇到伯樂，已經算幸運。
不過，要是從 17歲考藝訓班開始計起， 21歲發歌星夢淪為寶麗金棄將，然後拍爛片喺亞視霉足 10年，陳展鵬捱得不比人少。
「我係鍾意打乒乓波，不過係人都知，打波唔可以做事業、冇得打一世。
我係獨子，冇一技之長又想畀屋企人過得好啲， 17歲中學畢業，於是聽星探講，去拍廣告、去讀藝訓班。
靚仔，無論喺球壇定娛樂圈都唔算係優勢。打波靚仔有鬼用？
冇實力第一圈就俾人淘汰，輸咗波邊個型得起？
喺呢行，更加大把靚仔，藝訓班未畢業，就睇住啲同學俾人揀中有戲做，我呢？
難得派句對白，一出聲就好似小矮人一樣低人一等。
監製搵我去過場，唔係跌低就係一拳俾人打暈。
我問監製，吓？一拳就暈？吓？
點解要跌？……你跌咪有位畀主角過囉。
我做運動員出身，打過先講，打都未打，憑咩要我畀你過？
不過呢行規矩係，每個人都有自己嘅位，我唔服，所以去咗簽唱片公司。」


喺娛樂圈，我根本係隻未孵出嚟嘅蛋、係一條蟲！


拍無綫重頭劇《 ATF反恐》和吳卓羲平起平坐還有得一起合唱主題曲，陳展鵬說正洽談唱片公司，今年有望重圓歌星夢。


《真相》演正義律師 Keith，突然人氣急升變師奶殺手，浮浮沉沉多年的陳展鵬說：「雖然平常心，不過一下子個個望住，始終有啲招架不住。」

最冇前途新人獎

21歲那年，陳展鵬被音樂人前 Blue Jeans結他手蘇德華引薦加入寶麗金，轉做全職偶像歌手與無綫解約。未出碟已經有歌迷會、信和賣相指數高企，自我感覺良好自以為前途無可限量之際，寶麗金被環球收購，陳展鵬正式失業。
「被唱片公司遺棄，絕對唔算係低潮。
我好型㗎：『唔簽咪唔簽囉，我係掂，你驚冇人搵我做嘢？』
做咗咁多年運動員，去過咁多地方比賽，見慣輸贏，我一直心態都係，做人唔可以俾一場比賽定輸贏。
記得做歌星嗰陣，我上台唱歌、去香港電台接受訪問，拍住嘅係張學友。第一次歌迷聚會，一嚟 2百幾個 fans，搞到俾警察以為非法集會上過港聞。我成日以為自己好掂，後來先搞清楚，多 fans，係唱片公司捧我上個位；拍住學友，好明顯我係豬骨頭俾人搭上碟。」
父親是消防員、母親是車衣女工，甚至有段日子，陳展鵬差點把冇得發圍怪到父母頭上：「阿爸阿媽一世安分守己、踏踏實實，阿爸已經好辛勤、一路做消防員、一路接啲裁縫工作返嚟幫補。
九十年代，香港經濟起飛，個個買股票、做生意、周圍旅行，我細細個就見住啲世叔伯爭住幫阿爸埋單：『得啦，明㗎啦！』嗰段日子，我甚至有啲怪罪父母，點解啲同學波友個個撈得咁掂？
點解人哋搞生意有阿爸 back up？係唔係阿爸阿媽影響，搞到我咁？人係要到最失意嘅時候，先至睇得清楚自己，先至知道錯嘅唔係人，係自己。
唔同打波，我由細打到大，喺呢行，我由頭到尾都係人哋幫我製造機會，冇咗大公司 back up，我冇任何長處，我稱唔上係一個選手，喺娛樂圈，我根本係隻未孵出嚟嘅蛋、係一條蟲！」

拍過幾年電影，曾經跟劉青雲、陳小春做過對手戲，陳展鵬說不介意當年常被指派演反派：「電影入面每個角色都亦正亦邪，愈係咁愈有味道。」
拍過幾年電影，曾經跟劉青雲、陳小春做過對手戲，陳展鵬說不介意當年常被指派演反派：「電影入面每個角色都亦正亦邪，愈係咁愈有味道。」


03年與田蕊妮為亞視拍月曆，陳展鵬當年是亞視當家小生，不過 5年內拍的 15部劇集收視，加埋可能都唔夠一套《真相》。

談戀愛的那些年

人氣剛有轉機，就有週刊把陳展鵬放在封面故事，大字標題他私藏亞姐姚佳雯多年，關係穩定論及婚嫁。陳展鵬說，照片是舊相新砌，與姚佳雯分手多年，沒錢沒事業的日子，談戀愛是奢侈品，歷任女朋友們都受了他不少氣。
「冇得做電視台、又冇得做歌星，本來仲有啲電影拍吓，直到 97年金融風暴，爛片都冇人有錢拍，一組戲幾千蚊跌到落 1千蚊一樣冇工開。
莫講話去旅行買禮物，連帶女朋友食餐好嘢、出街嘅錢都冇。
為咗慳錢，日日踎喺屋企，朋友話請埋我至夠膽出去一次半次，廿幾歲仔，阿媽都睇唔過眼叫我出吓街、夾硬質錢畀我使。
我成日都覺得自己好型，打波叻，中學開始就靠獎學金自己養活自己。打咗波 5年，嗰 5年乒乓波界冇人唔識我陳展鵬，唔應該出去求人。其實型咩啫？
以為自己好紅，唱過咩歌根本冇人記得，拍過好多戲咩？
講出嚟人哋聽都未聽過？人嘅轉捩點，就係真正低潮時，可以認清楚自己一事無成，知道坐喺度自怨自艾，不如放低身段去學多啲嘢去搵機會，話畀人聽：『呢個角色我有興趣、我真係好需要呢個機會。』
「好多謝陪我走過嗰段日子嘅女朋友，好抱歉唔可以畀最好嘅佢哋。曾經有女朋友埋怨我冇擺佢喺第一位，其實佢一直係第一位，不過我始終需要工作，我同每個人一樣，想靠自己畀父母同屋企人更好嘅生活。」

小學開始打乒乓球，陳展鵬中學是港隊成員，跟當年孖寶陳丹蕾、齊寶華一起練球
小學開始打乒乓球，陳展鵬中學是港隊成員，跟當年孖寶陳丹蕾、齊寶華一起練球：「做演員同做運動員最大分別係唔可以當工作係同人比賽，每一次機會都係 teamwork。」


21歲被寶麗金打造成偶像歌手，出過四首單曲。〈天性如此〉的 MV女主角，是當年 17歲的千億新抱徐子淇。

陳展鵬


去年 7月，第一次上娛樂雜誌封面被指私藏女友亞姐冠軍姚佳雯（左圖），陳展鵬說兩人分手 2年多，目前單身，絕對沒有收埋女友。

那些機會

陳展鵬

雖然上緊位，回流 TVB才 3年的陳展鵬，始終算是剛起步，我沒想到他會對我這麼說：「我同吳卓羲冇心病、冇話邊個搶咗邊個戲分，我哋係 friend，識英雄重英雄。其實有咩好搶，第一集到第廿五集都見到我就夠。我成日覺得鏡頭唔使下下影住我，畀多啲其他同事啦！電視台仲有好多努力嘅演員，等嘅就係一個鏡頭、一個機會。」

當然，陳展鵬不是珍姐、不是樂小姐，有排都未到他憑一句話給別人一個機會。
不過，如果我是電視台其中一個默默耕耘的綠葉，聽到有人抓緊訪問的
機會這麼說，應該會很感動。畢竟，他也才得到這個機會不久。

撰文：朱小博
攝影：范仲良
形象： Bryan@ the Flaming
服裝： COOLDAY, SIR

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄