連續拍了數年電影，任賢齊終於重返他的歌手崗位，既在二月舉行《神魔人》世界巡迴演唱會，最近又推出了全新專輯《不信邪》，找來五月天包辦製作。

「我搵五月天幫我手，因為佢哋依家仲係流汗（行）喺樂壇嘅樂團嘛。」小齊以他的「招牌式」廣東話如是說。「叫《不信邪》，因為佢哋眼中，我就係唔妥協、唔認輸同鍾意頂硬上嘛，好好玩呀，唔係嗰啲亂狗（搞）、冇厘頭嘅狗（搞）笑囉！不過都有啲輕鬆幸福嘅歌，但我依家已經係長輩嘛，唱出嚟有啲係老師教路囉，咁歌手唱嘅歌，應該係要代表每個人嘅心聲，先可以有共鳴嘛，即係呢，我唔可以寫一首歌淨係唱畀我囡囡聽，因為其他人唔係我囡囡嘛。」

畢竟，今天的小齊已經是一仔一女的父親了，心態已經跟唱〈心太軟〉時的他已經不同了。

「講真呢，雖然我心入面仲住緊個big boy，但我一直以嚟都學緊點做一個老竇！好彩嘅係，我依家可以揀工作，有啲賺錢嘅工作我都會推，寧願留多啲時間陪屋企人呀，有啲嘢，錢買唔番呀，算啦！所以有啲人話，我呢個level嘅歌手嚟講，我都算窮！」

說罷，他聲地笑起來。

那個笑容，很sweet很幸福。

小時候的任賢齊，天生一副奀皮樣！

原動力

不經不覺，任賢齊的大女Rati，現在已經六歲，細仔Cody也有三歲了，「我代言嘅車叫Maserati，囡囡叫Rati，有好多人以為我會幫個仔改名做Mase，我話，咁我以後咪唔可以揸Porsche，連法拉利都唔揸得？後尾我囡囡個英文老師就改咗Cody呢個名，我唔知佢男朋友係咪叫Cody，不過我覺得又幾cool喎。」

他說，在仔仔出世前，因為工作經常四處飛，女兒和女友Tina幾年來都是跟着他住不同的酒店。「我囡囡最初喺酒店長大嘅，佢會覺得屋企呢，就係酒店。三年前我喺香港租屋住，起碼有個屋企嘅感覺嘛。好彩小朋友嘅適應力好強。」

選擇定居這裏，主要是交通方便他往返內地工作，讓他可多留時間陪伴家人。「我做爸爸嘅空間已經唔多啦，好多時我返到屋企，佢哋已經瞓咗覺；但如果佢哋見到我返嚟呢，佢哋都會畀我一個抱抱，然後同我講：『好掛住你呀！』嘩！你努力工作嘅動力，就係呢啲咁簡單嘅幸福度嚟囉！不過，有時我要出去做嘢，佢哋都會問我好多嘢：『點解要出去工作呀？』我答要賺錢養你哋嘛。佢哋就會話：『咁不如你唔好出去，我去工作啦！』我都好想呀！哈哈哈！」

女兒Rati現在已經六歲了，已經到了「十萬個為甚麼」的年齡了！

去年七月，小齊跟兒子Cody一起拍廣告，兩父子交流勁sweet！

救仔女

小齊向來愛玩，我不難想像他跟兒女玩樂時，應該會幾癲。「其實都係佢哋玩乜我就玩乜呀，不過同佢哋玩，我先知道照顧小朋友好辛苦、好貴（攰）呀！有時佢哋問你啲問題，你又唔知點答，見到我喺電影度揸槍，佢哋就會問我點解要揸槍，解釋唔到呀，佢哋唔明乜嘢叫做拍戲呀。我做演唱會，頭髮要做color，我囡囡又會問我：『daddy，what's wrong？where is black？』哈哈哈哈！」

至於教育方面，小齊則採取開放政策。「囡囡依家讀國際學校，因為佢唔識廣東話，我廣東話又太差，救（教）唔到佢哋，不過我諗呢，除咗普通話佢哋一定要好之外，跟住仲有英文啦，廣東話呢，佢哋喺生活上面一定會學到嘅。課外活動呢，佢哋有興趣咪學囉，依家都有學畫畫、跳芭蕾舞、打鼓呀，我唔會逼佢哋呀，不過一啲技能就一定要畀心機學啦，好似游水啦，香港同台灣周圍都係海呀，如果跌落去，咪死？呢個除咗係運動，仲係求生技能呀！

「但係呢，救（教）小朋友，我覺得最重要都係向佢哋表達你嘅關心，要就住佢哋嘅年紀，畀佢哋有一個正確嘅價值觀念同對錯嘅觀念囉，好難救（教）o架呢樣！有時佢哋唔聽救（教），係會好煩，但呢個都係一個生命嘅過程嘛：我以前接收我爹哋媽咪嘅愛，依家我變咗要付出，我覺得我依家比較似一個男人！」

推出的新專輯《不信邪》，找來好友五月天助陣。

加入大岳娛樂，小齊有幸得到大老闆林建岳（左三）的信任，讓他揸旗。

小齊說，他很喜歡拍杜Sir（左三）的電影，雖然過程真的很辛苦，但卻很有滿足感。

靠自己

小齊出生於台灣彰化眷村，上有一個姐姐下有一個妹妹，母親是傳統鄉村家庭主婦，父親則是小學老師。「我老竇做老師，唔係好高人工，所以我哋細個屋企經濟條件好差嘅，我好記得細個時，我哋連蘋果都好少見到，有一個蘋果，就會切開一人一片；一罐汽水，都要一杯一杯分，慢慢嗒，唔捨得一次過飲晒呀。我冇皮鞋着，波鞋都冇，後尾我入咗運動隊，先有學校提供。」

小齊說，在中學之前，他的學業成績很不錯。「其實我好聰明，但中學嘅時候呢，我鍾意運動嘛，我就跑去玩，又成日打交，變咗啲問題學生，學校就成日都會call我老竇過去，咁我老竇又係老師嘛，大家都會畀面佢，佢又會成日對我依依哦哦，然後我足足有兩年冇同佢傾過偈！你知啦，嗰陣後生，會覺得好煩o架嘛，所以我唔會咁對我嘅仔女，我都唔聽我老竇啦，我仲使旨意我啲仔女聽我講？」

由於家境不太好，他讀至高中時，已開始同時打工賺錢。「我以前覺得自己好犀利呀，又狗（搞）band，又做DJ，又做燈光音響，我想買結他冇錢嘛，樂器行老闆就話，咁咪留喺度打工囉！」

結果，直至小齊在中國文化大學體育系讀四年級時，他便因這份工被新格唱片公司（後被滾石唱片收購）發掘，入了娛樂圈。

那父親可有寄望過他的職業嗎？「佢本來想我做老師，跟住可以有公費養我，有鐵飯碗。其實我都考到台灣嘅師範呀，但我唔想做呀！我同老竇講，我成日逃學，點做老師？我驚我會帶學生出去開拖呀！結果我都冇去報名，我老竇激死呀真係！」

男兒有淚不輕彈

摘人參

我在估計，小齊年輕時之所以如此反叛和有主見，都是因為父親對他的要求很高吧！「我老竇對我嘅要求真係比較多，我做嘢，佢會要我由頭做到尾，唔可以半途放棄！佢要我做人有擔當、摘人參（責任心），又話乜嘢『男兒有淚不輕彈』，好似要我做大俠咁！跟住我小學到中學嘅時候，我喺所有嘅朋友、兄弟之中，我都係大佬，係leader！乜嘢事都搵我，打交又搵我，孭得我好辛苦呀！咁我自己有問題時又點算呀？跟住大家都會話：『你得o架！大佬！冇問題o架！』OK，我得得得得！好記得嗰陣我哋運動隊成日都偷食煙，有次我見到我老竇，我就即刻（做了一個掟煙頭落地再踩熄的動作），嘩！畀佢見到，我會好冇面呀！我係大佬嘛！

「不過後尾我當兵之後，變化比較大，因為當兵嗰環境好嚴格！一個人做錯事，一齊罰，要你半夜起身，着住底褲騎（企）操場，你又唔可以反抗！依家當兵乜都可以投訴，我哋以前？投訴個鬼呀！」

或許正是這些家教和歷練，小齊早已習慣照顧他的兄弟手足。「乜嘢事都要孭晒，係辛苦o架！但我依家一放手嘅話，唔係我一個人死，仲有我成team人（大岳娛樂）呀，佢哋個個都有家庭呀，所以我想佢哋唔使擔心屋企、經濟，咁就可以全心全力幫我嘛！諗落都有啲似社團o架！哈哈哈！」

老竇教仔，仔教仔，小齊的「摘人參」，應該對仔女也會影響深遠。

告訴孩子們的鎖匙

小齊說，也許因為他從小到大，都被培養成一個tough guy的性格，所以在很多人心目中，他都是個「不信邪」的人。「人哋成日同我講，乜嘢乜嘢好危險呀，叫我唔好去做，但我就偏要去做！其實我玩滑浪、玩賽車，去絲綢之路，都係為咗減壓呀！我唔可以爆煲嘛！同埋呢，對我嚟講，呢啲嘢都係有意義嘅事呀！」

將來可會把這些刺激的經歷跟孩子們分享？「以前我細個，我老竇都會成日同我講番佢喺越南打仗嘅嘢，我當時諗：嘩，我老竇好犀利呀，可以有咁多唔平凡嘅事喎！咁我將來又有乜嘢可以講畀我嘅仔女聽呢？所以我成日做呢啲鎖匙（傻事），啲人話會好辛苦，係呀，好辛苦o架！但呢啲鎖匙（傻事），我會印象好深刻，我仲可以等仔女長大之後，話番畀佢哋聽呀！我去玩去shopping，一陣就唔記得咗啦，係咪？」

Rati和Cody有着這樣的一個爸爸，我很相信他們的人生一定會很精采！