失婚的張栢芝自去年八月與謝霆鋒正式宣布離婚後，形象插水更成票房毒藥令收入大減，雖得到霆鋒巨額贍養費，但栢芝要照顧寶貝仔外，還要照顧外家，單親媽咪隨時斷擔挑，仍深愛霆鋒的栢芝為了一家大細着想，不斷諗計翻撻霆鋒。

信奉泰國筍笛神的栢芝，為了終極復合，效法徐子淇到風水師Mike位於銅鑼灣的神壇拜觀音，更買催情水晶力挽失敗婚姻，扭盡六壬施冧功只為與霆鋒再繼續前緣，又出動細仔Quintus出軟功冧爹哋，最後成功翻撻霆鋒一個月。

風水和事老Mike上周五於微博上放了霆鋒一家三口的合照，栢芝翻撻霆鋒一事即時曝光。

成票房毒藥

栢芝自去年除失去大好家庭，工作上更加頭頭碰着黑，雖然以「天價」簽國內經理人公司拍電影，但多部電影開畫首日票房慘淡，與Lucas有份合演的《無價之寶》首天票房亦只收十二點四萬、《楊門女將之軍令如山》首天亦只收四萬，因此被狠批為「負數演員」及「票房毒藥」，就連近日夥拍湯唯合演的《極速天使》在內地上畫，票房亦只得幾百萬，成績差強人意，與千萬票房有很大距離，收視欠保證，自然收入減，中港兩地唔掂，不少老闆已打退堂鼓。

踏入二○一二，片約十劃未有一撇，加上與經理人余毓興開設的「新亞洲娛樂+栢芝工作室」，要養十多名員工更又要捱貴租，故有指她要扭盡六壬復合，以挽低落形象。

去年四月，謝霆鋒仍與太太張栢芝一同出席金像獎典禮，事隔四個月後宣布離婚。想不到年尾便有指兩人已復合一個月。

Quintus出冧招

「鋒芝婚變」成為去年的娛圈熱話，估不到二人離婚四個多月，張栢芝已出招與霆鋒復合。失婚栢芝去年一直忙於在內地拍電影及籌備新公司，惜工作不順收入大減，亦未盡責照顧一對寶貝仔Lucas與Quintus，加上不時帶Lucas逃學令形象陷入谷底。雖然霆鋒離婚後一直盡責給予巨額贍養費，可惜栢芝要照顧兒子同時亦要養活外家，又成票房毒藥令收入日減。Lucas和細仔Quintus因無法見霆鋒及拉姑，不時扭計大聲嚷着：「要見爹哋！要見嫲嫲！要去迪士尼！」家中兩名菲傭亦開始無佢符。

面對外憂內患，栢芝終極展開箍煲大計，除放行兒子見拉姑一家，更經常以仔為藉口搵機會見霆鋒，近日栢芝更落力為負面形象洗底，接受訪問時向霆鋒隔空訴心聲，一時自稱賢妻，一時又說遺憾昔日沒着婚紗，恨翻撻的心呼之欲出。