每次訪問泳兒，覺得她不只身材包得密密實實，亦很口密。估不到上月竟然自動投案，公開跟髮型師拍拖，大讚對方係好人又感謝公司支持，上星期更沖喜推出埋新國語碟《半公開的秘密》，親自監修歌詞，「內容全係我嘅秘密。」笑說箇中精髓要讀者自己估，但今天她會說說公開得的秘密。

失戀的秘密
新碟請來孫燕姿伯樂李思菘兄弟打造，「我喺佢哋音樂學校上過堂，今次佢哋為我做好demo後，叫我講出首歌畀到咩感覺才寫詞。〈一天一天〉講生活壓力，就到新年，諗番初出道想畀封利是屋企人都冇能力，今年願望係想Daddy快啲退休。」雖然有拖拍，但一聽〈剩下的幸福〉就記起失戀回憶，「於是SMS咗段經歷同感覺畀佢哋。失戀最痛係記得以前拍拖攬住對方嘅感覺。」唔知蜜運中嘅Vincy係點消化歌詞，不過YouTube好評如潮，話好催淚同有深度。

Cooking Vincy的秘密
上微博，見到@泳兒嘅人都係多謝佢嘅聖誕曲奇。「好多人睇我個樣，以為我係好鍾意讀書、得閒會織冷衫同煮嘢食嘅人，其實我最近才識煮嘢食，只識煮意粉。」Vincy過往聖誕都係送潤手霜、香水做禮物，「學識整曲奇後，開足6日爐。食譜係Sherman畀我，我連買咩牛油都係問佢。」身邊工作人員、同公司師兄妹、fans，人人有份，仲精心整埋包裝，睇嚟下一季《美女廚房》要預埋你！

練大隻的秘密
泳兒面尖尖、手臂幼幼，好鬼瘦，但原來秘密心願係想練老鼠仔，「我唔係想練到Sammi咁有線條，好似孫燕姿咁有個shape得㗎啦。」不過體質問題，每週做足3次gym都未見效，「教練話我吸收蛋白質慢，於是捉我去跑步。因為我好怕悶，所以專程搵咗條跑徑，叫Sherman同HotCha的Crystal一齊陪我素顏care-free地跑，上2個星期我哋仲參加10公里馬拉松。」適合的路，唔只為跑步而找，出國語碟唔只可利用在新加坡學到的三文兩語，更可北上搵人仔。 ####

 

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄