森美說，他將於十二月中舉行的《情聖Love Master》，會以九十年代的愛情態度，把現代愛情大聲說出來、唱出來。「依家啲情觀，咩嘢『港男』、『港女』、『宅男』、『宅女』，

個樣chok啲都會畀人笑！想唔想一齊，都係用sms溝通，你明我明就得囉，明咪今晚一齊囉！但九十年代好唔同，劉德華個樣唔chok，你點會鍾意佢啫？你睇嗰陣嘅《東京愛的故事》，個個都係大聲嗌『我愛你』！Bon Jovi嗰首〈You give love a bad name〉，嘩！『你為愛蒙上污名』喎！就算係吳國敬翻唱都好勁啦，『恨極為你放縱不羈』喎！嗰陣嘅情就係咁，就算你明，我都要大聲講出嚟！喺公園度都要噴個大心，寫埋你個名，要全世界人知！為咗愛一個人，可以做乜都得，可以好偉大，呢啲咪『情聖』囉！」

他之所以選擇九十年代，除了因為很喜歡那時人們對愛情夠歇斯底里、義無反顧外，也因為那是他成長過程中，經歷最多轉變的日子。

時光荏苒，十多廿年後的今天，再回想起那些年，本身是基督徒的森美說，最大得着，是發現神原來一直放了很多愛在自己身邊。「我唔算係好虔誠嘅教徒，但我覺得我嘅信仰，只係講緊一樣嘢，就係愛！」然後，這節聖經金句便一直出現在我腦海中：「若有人在基督裏，他就是新造的人，舊事已過，都變成新的了！」哥林多後書5:17

曾經搖滾

森美原名梁志健，小時候與父母及妹妹居於葵盛邨，父親為消防員，母親為兼職電子工廠女工，家境不算富裕，但生活卻相當融洽。中學就讀聖士提反書院和喇沙書院，會考獲「1A5B1E」成績，九六年畢業於中文大學新聞與傳播學院。

他說，縱使讀書時期是個名副其實的書呆子，但同時間也是一名band友，中三開始已跟同學夾band，負責主音部分。

我細個係個好讀得書嘅人，但亦同啲同學夾band，去啲女校表演出show，參加過好多比賽，後尾仲入埋「嘉士伯流行音樂節」嘅總決賽，攞埋「最佳歌曲獎」，不過攞完獎之後，我啲band友個個都去晒外國讀書。

將於十二月舉行的「talk & rock show」《情聖Love Master》，一次過滿足森美兩個願望：做情聖和rock star！

森美今年初推出的著作《來！戀愛大作戰》已出第二版，令他明白到他談情說愛，也有一班支持者。

諗番起都覺得我嗰陣好好笑，成日懶係型、懶特別咁，有咁多運動唔揀，走去玩劍擊；中學有咁多學會會長唔做，走去做話劇學會會長，又學人夾band，講到尾，都係為咗追女仔！不過我夾band時冇乜fans，反而我個結他手就有，兩個咁多囉！哈哈！

入到大學，我都係嘻嘻哈哈過日子，成日踩住roller喺學校周圍去，個個都識我，我又鍾意同人傾偈、周圍玩，多嘴多口！試過有次我生日，一日裏面我可以喺學校食到五個蛋糕！你諗吓我當時有幾多朋友！

不過，入咗商台之後，我就愈嚟愈唔出聲，愈嚟愈靜。

曾經憤世

九四年，森美因參加商台的「叱咤殺戮新大陸」的DJ選拔賽而入行，同期出道的十個DJ中，還有當時只有十多歲、尚未成年的卓韻芝。

我嘅DJ生涯，一啲都唔可以講得上係順利！嗰陣十個DJ，我係最後一個有節目做，阿芝有節目做，生日又有黎明錫時，我都仲係喺度捱緊深宵節目！

嗰陣我哋四個新人，三女一男，包括我老婆，公司安排佢哋做凌晨二至三點節目，我竟然做三至六！我當時仲好細個，好唔識諗，覺得自己好慘，好唔忿氣，明明我比佢哋叻、做得好過佢哋、聽歌又多過佢哋、知識又多過佢哋、講寫稿又寫得好過佢哋，但點解我要做凌晨節目呀？

有次做完深宵節目，朝早矇矇矓矓爭啲畀架寶馬撞倒，我當時心諗：就算我用晒我依家呢份人工，直至死嗰日，我都買唔起呢架車呀！

當時，我真係冇諗過，到我開始有自己節目做之後，跟住同小儀拍檔會受到聽眾歡迎（○一年獲「16-25歲受歡迎DJ獎」）；然後仲簽埋Paco（黃柏高）嘅金牌經理人拍電影；○四年開始做埋電視，同小儀主持《15/16》，接住做埋大show司儀；更加冇諗過，呢件「撞車」事件後嘅十年，我真係買咗架寶馬畀我阿爸阿媽。

○六年發生「我最想非禮的香港女藝人」選舉軒然大波，卻令他覺悟到生活和工作是甚麼。

Paco黃柏高對森美來說，亦師亦友。

曾經迷惘

電台、電視和電影都涉足到了，事業一切看來漸入佳境，但森美卻體會了人生中的低潮期。

我唔係想紅，我只係發覺我好想自己有進步！當我覺得嗰日自己做節目做得唔好時，就會喺個公園度坐足幾粒鐘唔開心，然後對自己要求更加高！

嗰陣工作壓力愈嚟愈大，我愈嚟愈唔識同人溝通！我每三個月就轉自己一輪節目，成日打電話畀小儀，chur住佢，叫佢畀心機啲、努力啲，又成日捉住佢開會、度節目、諗個節目做成點，小儀都試過忍唔住同我講：「我冇拖拍，都係因為你！」

能夠由DJ躍身大銀幕拍電影，森美說，以一個「屋邨仔」來說，已經是賺了！

最恐怖嘅係，我嗰陣成日做完一啲好開心嘅節目之後，就會喺架車度諗：頭先嗰個我，究竟係真定假嘅呢？其實當時你哋聽到我喺節目度仲識嘻嘻哈哈，我只係撳咗個掣咁咋，我嗰陣實情真係好lost，個人唔識笑，做好多工作都會皺住眉，對呢個世界睇法好灰，覺得呢個世界好黑暗、好悶，每次同啲同學聚會，佢哋個個都係醫生、律師，我又會諗：點解我仲係喺度嘻嘻哈哈，表演緊魔術呢？都唔知自己喺度做緊乜嘢，拍電影又好似唔係拍電影，又好似冇乜戲做得好，做電台又好似冇乜突破，跟住又做埋電視，係好忙呀，但個人冇晒方向囉！

曾經失策

如此狀態持續了好幾年，直至○六年夏天，森美因為在電台節目《架勢堂》中，搞了個「我最想非禮的香港女藝人」選舉，被多個婦女團體指為侮辱女性，掀起軒然大波，令他要站出來公開道歉，既失去了中大兼職講師的職位，又被商台停職兩個月。

呢件事係我事業上嘅低潮，但亦都係我人生中嘅高峰！

嗰陣我最嬲嘅係，我哋個原意根本唔係咁，但點解人哋會誤解我，然後仲要話我係咁諗呢？我一直以嚟都咁畀心機做一個乖仔，點解人哋要咁話我o架？我當時直情同林以諾牧師講：「唉！咁我不如做個衰人算啦！咁我變曳囉，我去紋身囉！」跟住佢竟然話：「乜紋身好曳咩？」

呢件事，我真係問心無愧，真係唔想o架！我唔係話特登想做樣破格嘅嘢令自己出名啲，咁多年嚟，大家都會知我係一個咩嘢人，我唔係嗰啲「悶悶哋，又想提高吓知名度，咁搞啲鹹濕嘢」嘅人，我真係純粹係一次無心之失，到依家我都唔會原諒自己，我都有同自己講，點解我會咁鬆懈呀？

跟太太Veronica於商台認識至結婚，一直恩愛如昔。

不過，呢件事同樣令我有最深嘅體會係，其實神當時真係放咗好多愛喺我身邊！除咗太太一直都好支持我之外，商台真係對我好好，我當時好堅信商台會畀我繼續做節目！而Paco，佢直情開咗張六位數字嘅支票畀我，叫我遲啲先還番畀佢！然後仲有陳志雲呢，佢係一個心地好好嘅人，佢間中都會搵我同小儀食飯關心我哋，所以啲傳媒唔該下次寫「志雲黨」，加埋小儀落去，唔好淨係得我一個！

依家我成日都會講番呢件事做分享同見證，因為呢件事之後，我relax咗好多，先發覺做好每項工作，最重要係我用咩嘢心情去做。我亦終於明白到，我身邊有好多人愛自己，生活其實都係為愛，就好似我嘅信仰所提倡嘅一樣！