被飛四個月　安仔舊愛患抑鬱症壹週刊 1079期－娛樂八掛大放送★

一心要跟 Sammi復合的許志安，今年七月展開行動，飛甩拍拖兩年多舊女友 Michelle，即使極力否認分手牽涉第三者，但早前在上海舉行的「東亞飛揚音樂會」，安仔在後台及慶功宴上全程黐實 Sammi，又被傳媒拍得二人擁抱相，復合有跡可尋。
另一邊廂，被撇的 Michelle因情傷患上抑鬱症，足足一個月匿埋房唔見人，近日才返 Cartier復工，並向公司申請調職新加坡，避開傷心地。日前， Michelle便相約同樣甩拖的李彩華見面訴苦，發洩情傷。
低調箍煲
自今年七月宣布與前女友 Michelle分手，回復單身的許志安變得無後顧之憂，早前到上海參與「東亞飛揚音樂會」，攞正牌黐住鄭秀文不停跟工作人員影合照，還被傳媒拍到跟 Sammi在後台擁抱，親密關係不言而喻。
「呢大半年佢兩個喺工作上經常接觸，好幾次安仔仲專登改機票黐住 Sammi一齊飛，不過，上次分手件事搞到咁大單， Sammi仲要寫公開信澄清同安仔無復合，安仔梗要低調啲！」知情者說。
公司體諒
許志安箍煲在望，但被飛的 Michelle卻受盡情傷而患上抑鬱症，三個月前開始睇精神科醫生，要食藥控制情緒。
「嗰陣啱啱分手， Michelle完全唔想見人，成日匿喺間房，就連我哋幾個好朋友都搵佢唔到，聽 uncle講（ Michelle爹哋）， Michelle原本好錫佢同安仔一齊養嘅 Husky（雪橇狗），呢排都無心機理隻狗，好唔開心！
「佢同公司請咗成個幾禮拜假，就係唔願見人，而家就算有返工，間中都要請假，好彩公司都好體諒。其實佢同安仔拍拖嗰陣，已經成日俾同事背後講閒話，而家仲分埋手， Michelle表面上繼續扮無事，就係唔想公司班人再亂講嘢，實則佢份人唔係外表咁堅強！」 Michelle好友說。
昔人男友是好兄弟的 Michelle及李彩華，一見面已經說個不停，似乎有講不完的心事。

由公司行去 IFC期間， Michelle心神恍惚，不停四圍張望。

近月已返回 Cartier工作崗位的 Michelle，上月底，便相約被許志安好友王傲山飛甩的李彩華，到中環機鐵站上蓋的「正斗」食晏，二人不單前後腳到達，更揀選餐廳內最隱蔽的卡位坐下，全餐晏二人講多過食，只見 Michelle當正阿 Rain係救星，訴苦訴個不停。
「呢排佢心情好番些少，肯同朋友講吓嘢，佢分手嗰段時間，成個幾禮拜控制唔到自己，不停咁喊，佢爹哋媽咪好驚，要佢睇醫生，醫生話呢個係抑鬱嘅病徵，好彩食咗藥，情況好轉咗，而家仲要 keep住見醫生。」 Michelle身邊人說。

在上海舉行的「東亞飛揚音樂會」， Sammi安仔在台上全程零交流，但一去到慶功宴，便放下戒心黐到實，不停跟友人合照。
出走新加坡
Michelle情緒失控，朋友飯局聚會全部推得就推，據知她為盡快放低傷心往事，近日便向公司申請調職新加坡。
「以前 Michelle好鍾意約我哋班朋友出嚟飲嘢，而家嗌極都唔出嚟，寧願留喺屋企，段感情根本就未放得低。又係嘅，大半年前，安仔仲對佢鬼咁好，食緊飯都要望住女朋友， Anita（蘇永康女友）仲笑佢哋話『咁冧想點呀？』
「 Michelle家姐前排生咗個仔，本來係好開心事，但諗番佢家姐佗 B嗰陣，安仔試過向 Michelle求婚，仲話諗住生小朋友，點諗到，而家姨甥仔出咗世，自己結唔成婚仲分埋手，咪話唔傷心！」 Michelle友人說。

Michelle與同事步行到 IFC食晏，同事講到眉飛色舞，她卻全程沒精打采，心情似乎還未好轉。

分手後，許志安收回之前送給女友代步的舊款 Bb， Michelle每日朝早返工，要坐巴士駁地鐵回公司。

Michelle計劃離港療情傷，有兄弟力撐同 Sammi復合的許志安，原來分手後先後兩次致電 Michelle，但只為了解記者有無搵上門追訪分手新聞。
「公開分手後，單新聞搞到好大，安仔打過俾 Michelle話對唔住，影響佢生活唔好意思。之後，無端端細佬（安仔前助手）又自爆同過安仔拍過拖，安仔又再打俾 Michelle，問有無傳媒搵過佢， Michelle話無，安仔就講咗句唔該晒，之後已經再無聯絡嘞！」知情者說。

拍拖期間， Michelle有男友附屬咭傍身，亦收過不少名牌手袋禮物。分手後， Michelle應使得使，上週五（十一月五日）午飯時間，便流連平民時裝店 Zara，單睇無買。

Sammi經常義務撐 Big4開 show，眾兄弟亦對安仔再追 Sammi撐到行。

昔日與 Michelle經常孖住去玩的蘇康女友 Anita（後排左一）及梁炳老婆 Karen（後排右一），自安仔飛甩 Michelle後，亦與對方斷絕來往。

復合預告
鄭秀文與許志安拍拖 13年， 04年安仔單方面宣布分手，隨即搭上助手「細佬」，後來 Michelle（余德琳）介入，安仔馬上辭退「細佬」兼分手。跟 Michelle拍拖兩年多期間，安仔與 Sammi不時傳出復合，三角關係糾纏不清。
貪新忘舊
06年，安仔在好友毛志輝介紹下認識 Michelle，兩年後正式拍拖，安仔馬上與助手女友「細佬」分手，並遵照 Michelle意思辭退「細佬」助手職務。

好友煽動
安仔與 Michelle拍拖後，不時傳出與 Sammi復合消息，身邊好友得知安仔對 Sammi未忘情後，不時製造機會讓二人相處。 09年張衞健與張茜在菲律賓舉行婚禮，更刻意唔請 Michelle，為安仔、 Sammi安排三日舊情復熾之旅。

上海私會
09年 12月， Sammi復出開騷，安仔現身做嘉賓， Sammi更帶挈 Big4到內地開騷， Sammi與安仔增加碰頭機會，二人更被發現在上海打邊爐撐枱腳。

面臨分手
今年 6月， Michelle搬離安仔寓所，傳出感情有變，安仔為鋪路與 Sammi復合，自願跟隨 Sammi信耶穌。

宣布分手
今年 7月 31日，安仔完成拉闊音樂會後，突然宣布與女友 Michelle分手，安仔為了讓 Michelle死心，出盡賤招，向女友爆粗並終止附屬咭。

親筆拒愛
安仔與 Michelle分手， Sammi不甘背上第三者之名，發出 1000字絕情信，表示自己的確想同安仔復合，但「從未發生」，更表示復合並非「拎起個喼就行得」咁簡單。

舊愛爆大鑊
分手事件爆出後，安仔被冠上「賤男」稱號，前助手女友「細佬」更踩多腳，大爆曾做「安嫂」，有傳安仔曾向「細佬」支付七位數字「遣散費」。

發道歉信
安仔受盡千夫所指，為保形象，發出 300字道歉信，向「細佬」及 Michelle道歉，表示自己想做「一個好人」，但「未夠好」。

後台互攬
今年 10月，回復單身的安仔，到上海演出「東亞飛揚音樂會」，首次與 Sammi同台演出，二人在台上刻意避忌，但返到後台卻互攬傾偈。