娛樂八掛大放送★

自稱年年 25歲的譚詠麟（阿倫）一早已當世界停頓，不過時間巨輪將宣佈：生於 1950年 8月 23日的阿倫，後日 60大壽了。一個甲子，阿倫見證了四個年代的樂壇，又曾創下無數賣碟及捧獎紀錄，到上月還屹立紅館舉行 8場演唱會。在摯友、 fans眼中的老頑童譚校長，德高望重卻笑話成籮，但 40年來為香港市民帶來一首又一首的流行金曲，樂壇貢獻值得大家敬仰。時至今日阿倫未言休，笑言會唱到 80歲後，繼續長青 don't say goodbye。撰文：朱倬誼、比華利、戴彩煥

其他娛樂名人影片 克勤：祝佢永遠開心

今天憶當初，譚詠麟由 70年代開始，至今屹立樂壇 40年，上月他還以 59歲之齡舉行 8場紅館演唱會。個唱落幕後，阿倫提到退休問題時，當時他說：「有一天我自己感覺到，歌迷已經好像淡化了，已經沒有那麼緊張，沒有那麼需求，這個我自己明白，那一天我也不會很鄭重的聲明，而且也不會講。」換言之他會選擇淡淡地退出。

從偶像到哎吔老竇 放大圖片

去年左麟右李在演唱會上扮大隻佬，阿倫（左）為操弗身形吃盡苦頭。

退休這兩個字，應該不會出於阿倫口中，其實他從沒真正考慮過退休，因為他熱愛工作熱愛唱歌。「左麟右李」相依 7年，李克勤是他的最佳拍檔，他也從未聽過阿倫唔撈，克勤日前接受本報記者訪問時笑說：「間唔中會聽到校長話攰，最近一次係『左麟右李』要練大隻佬操肌肉，除咗嗰次，我冇聽過佢話要停低，佢係鍾意不停工作嘅人。」阿倫曾表示會唱到 80歲，克勤也說：「佢得嘅話我諗佢會，因為工作就係佢嘅娛樂，娛樂亦係佢嘅工作，將所有嘢撈埋一齊，佢喺台上又好台下又好，乜嘢時間都覺得好好玩，好 enjoy過程。」講起阿倫，克勤一疋布講唔完，因他倆淵源太深了，他說：「要以豁達去形容一個人，喺我心目中校長排第二冇人敢排第一。由早期我讀書佢係我偶像，到大家同一唱片公司、同一經理人公司，由偶像同歌迷變咗朋友，亦師亦友，到家好似老竇同仔，關係好得意。佢對任何嘢都好睇得開，又好照顧台前幕後，佢好幫我，由台上嘅嘢、做人道理到屋企，佢已經係我半個哎吔老竇，我結婚佢坐主家席嘅。」阿倫嘻嘻哈哈冇時停，克勤講譚生笑話都有排噏：「大家一講譚詠麟係離不開食嘢，佢好又一餐唔好又一餐，總之唔係臭唔係變咗，佢都一樣食得咁開心。其實佢對好多嘢都係，譬如娛樂圈爭名逐利，佢冇計較排位、唱歌多少、企喺邊；我哋出去做騷，佢住乜嘢酒店一啲都唔介意，佢真係一個開心快活人。」

食物焚化爐唔怕屙

克勤續說：「佢食嘢好笑 o架，左麟右李全世界都走勻，佢每去一個地方都亂咁食嘢。有一次唔知喺馬來西亞定新加坡，做騷前一晚我哋喺街邊踎坑渠邊食嘢，我見到啲螄蚶生 o架，我問佢『你聽晚做騷得唔得 o架？』『怕乜呀！』『屙 o架喎！』『日日都屙 o架啦！』嘩！我都戥佢驚，但佢又冇事喎。佢有好多食嘢奇技，除咗食之外，佢係一個精力超級勁嘅人，尤其佢家 25歲零好多個月嘅年紀，真係等同一個 25歲嘅體力，我做完騷死咁滯，嗱嗱聲仆返屋企，佢相反，做完騷先玩，但出埠就唔係個個咁好體力，有次佢想去 jazz吧聽音樂，譚生嫌我哋老，話我成個阿伯咁要返去瞓，佢想搵後生嘅去，終於到我髮型師去，因為佢後生啲。」

「冇人夠佢多 hit歌」

至於阿倫的樂壇貢獻，克勤說：「時下活躍嘅歌手中，我諗冇人夠佢多 hit歌，佢嘅歌令全世界華人有共鳴；其次係佢對後輩無私扶持，佢對唔同公司甚至敵對公司，佢唔理乜嘢人乜嘢關係，或者擺明拍我唔拍佢馬屁都好，任何人佢教得到都教，校長個名唔係浪得虛名。」後日譚校長大壽，克勤祝願：「佢永遠開心啦！」

林敏驄：想再作歌畀佢 放大圖片

林敏驄（右）揚言他的求其創作配阿倫的求其唱，竟炮製出不少經典金曲。資料圖片

填詞人林敏驄早年與阿倫合作無間，兩人合力炮製過不少經典歌曲，如《愛在深秋》、《幻影》和《霧之戀》等，敢講 30歲以上的港人無人不曉。不過據林敏驄所講，阿倫的金曲是由「求其加求其」所組成，林敏驄說：「佢把聲好啱唱情歌，加埋我填詞嘅金曲，咪唱紅咗佢囉。想當年填詞畀佢，我真係幾求其，佢又唱得求其，次次錄 15分鐘就錄完，或者我哋啱 channel，所以合作出嚟效果好好。」

最喜歡《霧之戀》

林敏驄表示為阿倫開筆填詞的金曲中，他最喜歡《霧之戀》，他說：「因為呢首歌唱到佢大紅，好有 feel。」問到阿倫錄音趣事，林敏驄說：「我一次都冇去過探班，因為次次話趕去，去到原來佢已經滾水淥腳錄完走人，咁急都唔知趕住去搞乜嘢。」其實林敏驄有意與阿倫再度攜手合作創造金曲，他說：「我想作番首《長做長有》畀佢，個做字做乜都得。」其後他又認真地說：「我想寓意佢係娛樂圈長青樹長做長有咋，有 feel就作畀佢。」

歌迷肥萍　追隨阿倫 23載 放大圖片

癡心 fans肥萍追隨阿倫多年，日前她強調絕無過檔巨基幫。攝影：陳順禎

追隨了譚詠麟 23年的忠心 fans林楚萍（肥萍），近日被阿倫大爆已經過檔跟古巨基，但肥萍日前接受訪問時狂呼寃枉，坦言對阿倫的一片丹心從未變改。肥萍說：「佢呢次開演唱會，我場場都喺度，第一場我坐後排，佢見我唔到，加上我又冇嗌，咪以為我冇嚟囉。」對於被阿倫指過檔，肥萍坦言氣憤：「梗係嬲啦！有晚見到佢問佢點解要塞個古巨基同林峯畀我，佢聽到之後話『唔鍾意咪唔講囉。』」

偷偷探張國榮班

肥萍當年迷戀阿倫，原來像很多女孩子一樣「貪佢靚仔」，她說：「我話鍾意佢啲歌藝都係呃你，梗係個樣吸引我。」有否幻想過跟阿倫一起？肥萍說：「冇就呃你，不過識埋佢老婆 Shirley之後就冇，我因為連佢老婆都鍾意埋。」原來肥萍也試過背住阿倫探張國榮班，她說：「嗰次係陪朋友去，張國榮見到我第一句就話『咦，你都幾健碩噃！小心啲飲食啦。』我覺得佢幾 nice。」

阿倫大事年表

後日 60歲的譚校長橫跨 70s、 80s、 90s及新世紀四個年代的樂壇，大事年表也宏偉過人。

放大圖片

年份： 1968年事件：阿倫、陳友、彭健新、葉智強、陳百祥、陳百燊等人組成樂隊 Loosers， 71年解散。年份： 1973年事件： Loosers重組，改名 Wynners，溫拿樂隊起錨，至 78年散 band（圖）。

放大圖片

年份： 1979年事件：阿倫單飛推出首張個人專輯《反斗星》，以改編英語流行曲為主。年份： 1980年事件：推出《愛到你發狂》首奪白金唱片（即 5萬張）。年份： 1981年事件：憑電影《假如我是真的》膺台灣金馬影帝。年份： 1984年事件：《霧之戀》及《愛的根源》兩碟大賣，掀起樂壇改編歌熱潮，阿倫於《勁歌》總選的 40首入選歌中獨佔 10首季選歌，結果勇摘 3首金曲。同年起至 87年連奪 4屆《勁歌》最受歡迎男歌星。年份： 1985年事件：《愛情陷阱》一碟將阿倫的歌唱事業谷上巔峯，暑假舉行 20場演唱會打破紅館場數紀錄，同時張國榮憑《 Monica》冒起，展開兩王爭霸局面（圖）。

放大圖片

年份： 1988年事件：阿倫在第十屆《十大中文金曲頒獎音樂會》宣佈不再領獎，與張國榮爭雄年代結束。年份： 1993年事件：阿倫髮妻楊潔薇的至親離世，阿倫的名字出現訃告，這段婚姻才終於公開。年份： 1994年事件：香港大球場翻新後，阿倫成為首位於該場地舉行演唱會的歌手。年份： 1996年事件：在《十大中文金曲頒獎典禮》獲樂壇最高榮譽的金針獎。年份： 2003年事件：阿倫和李克勤合作演出「左麟右李演唱會」大受歡迎，此後舉行共約 80場麟李巡迴騷。年份： 2006年事件：阿倫父親譚江柏病逝，引爆阿倫在電台訪問中承認有「紅顏知己」朱詠婷及育有兒子譚曉風，轟動全城。年份： 2007年事件：獲香港作曲家及作詞家協會頒發至高榮譽的 CASH音樂成就大獎。年份： 2008年事件：港府頒發榮譽勛章，表揚他對香港各方面的貢獻（圖）。年份： 2009年事件：合共推出 110張個人唱片，演繹歌曲近千首，有指其唱片累積總銷量逾 2,000萬張。年份： 2010年事件： 60歲大壽。資料來源：《蘋果》資料室

阿倫奇趣錄

正如李克勤所言，阿倫為食奇技多，其實他的軼事也相當有趣，隨便噏都夠晒娛樂性。神奇回春：阿倫日瞓 4粒鐘，每次開騷前只要讓他小睡 45分鐘便神奇回春，上台龍精虎猛。鐵樹開花：阿倫家中種鐵樹，逢他開騷如 03年左麟右李、麟李 part 2、 05年個人演唱會及 07年溫拿演唱會等，鐵樹就自動開花，富貴榮華。極速生髮：新陳代謝極佳的阿倫自詡頭髮生長速度快，每兩周要剪髮；每次開演唱會他一定標汗脫水，自言開騷後即輕起碼 10磅，見效快過減肥代言人。保發迹屋：早年阿倫買入港島區南豐新邨自住，雖然他已搬離多時，但他認定該處為風水甚佳的發迹屋，終生不賣。食唔停口：有食物焚化爐之稱的阿倫一句「唔好嘥」，次次開餐總吃個碗底朝天。他出埠一落機，第一節目並非去酒店去場館，而是尋找他鄉的美食。食飽開工，收工再食，循環不息。


後日便 60歲大壽的譚詠麟尚未言休，精力充沛的他會繼續屹立舞台唱到 80歲。