單人訪
盧海鵬試咪 呢期我至威
盧海鵬不笑的樣子，有點嚇人。我嘗試打開話匣子，請他講句押韻爛 gag。不消兩秒，他就想到了以下對白。
「得閒走嚟做下訪問，其實認真搵笨！」
影樓傳來哄堂大笑，他仍繃緊着臉。原來，欠了根香煙。
「食得咩？」他開始有一絲微笑。
理論上唔得，但我們都沒打算叫一位七十歲老人家走出停車場冒着北風「打邊爐」。
盧海鵬試咪呢期我最威
打開話匣子全靠這口煙，盧海鵬由羅文講到周秀娜，再由《蝦仔爹哋》講到《奪命金》。他喜歡加插一兩個髒字，但絕無惡意；也喜歡稱呼人（甚至自己）為「契弟」，但也絕無不屑之情。
他只是一個食鹽多過你食米的地道香港人，想加強語氣便來個「 X」，想抵死一點便叫你一聲「契弟」。
他從不忌諱，也不賣帳，永遠獨來獨往兩袖清風。
「自從舊年攞咗個獎之後一直冇停過拍戲，行出街成日俾人捉住影相。我明明唔笑，你哋班契弟都話我好笑嗰度仆街嘛！」
他是電影圈的搶手貨，廣告商也打他主意，舞台劇又添食在即……雖說是英雄遲暮，但相信沒有哪個香港人不替這位笑匠高興。 2012年，盧海鵬好威！
呀，不對，應該說： 2012年，呢條契弟好 X威！
條氣要順
盧海鵬愛抽「紅雙喜」，才港幣七元一包。試過有人送他七十元一包的「中華牌」，他不喜歡。
「唔係貴就一定好味。貴煙用嚟送禮應酬㗎啫，要話俾人哋知國家有階級之分嘛！」
別看他說話慢條斯理，其實頭腦清晰，而且轉數極快。
「搞 gag一定要轉數快，冇記性就冇得撈㗎喇！我從來唔係玩玩下，我係認真做嘢。唔搞 gag唔通走去做宮廷戲？嗰啲唔啱我！」
弦外之音，誰都聽得明白。早前深夜無綫重播 06年劇集《施公奇案》，盧海鵬飾「枕神」，這個陪着我們成長的人，原來久違了。
「依家睇見個個選視帝視后，都幾過癮嘅，但講到尾咪又係班領導人話事！我以前都有被提名過，但無綫邊係我撈吖，我又唔識擦鞋。以前都仲會有啲人情味，病都有人關心你；依家佢哋只當班演員係商品。」
他不滿當時的合約制度，拍罷《施》劇後便毅然過檔亞視。他也為亞視帶來過短暫風光，有份主演的《大城小故事》、《十六不搭喜趣來》和《香港亂噏》平均都有五、六點收視，是絕對可以開香檳的數字。
「其實拍邊個電視台有乜所謂？香港地邊個唔識我？差不多有華人嘅地方都識我啦！我去到亞視拍外景，最初啲人都話『無綫拍戲喎！』後來先知係亞視，佢哋咪又睇！我做嘢最緊要開心，條氣要順！」
活了大半世，「條氣要順」的確很重要。九十年代初盧海鵬曾過檔亞視四年，他就試過「條氣唔順」，於是二話不說劈炮唔撈。
嗱，盧海鵬隔籬嗰位就係八十年代當紅小花周秀蘭，此乃 80年劇集《仁者無敵》，仲有景黛音同石修。
06年處境劇《喜有此理》除鵬哥外還有元秋，和尚未過檔的陳展鵬（右），算是近年亞視可以一看的節目。
《蝦仔爹哋》去年搬上舞台，請得一眾巨星如陳奕迅（圖）撐場。今年 12月載譽重演，今次有梁家輝、陳慧琳、張學友等，好有分量。《蘋果日報》圖片
「叫我扮王傑，又叫我扮陳慧嫻，但成個化妝間只得一個假髮，點扮呀？我最初都算，但扮王傑係咪應該着牛仔衫褲？佢哋夠膽死俾件醫生袍我，仲話：『冇㗎喇，係咁㗎喇！』我愈諗愈激氣， X！把幾火掟低個假髮就走。成班監製、編劇企喺門口好似送客咁，睇住我揸住部電單車飛過。一個星期後監製再叫我入化妝間，打開個櫃全部係假髮，服裝又全部買過，佢話：『鵬哥，全部為你做㗎！』我就話：『 X你老味，你條契弟一早係咁咪好囉！』」
叫他扮男扮女都可以，醜化惡搞也無問題，盧海鵬追求的，從來只是一份尊重。
「我唔會得罪人，亦冇人夠膽得罪我。早兩年佢哋叫我扮周秀娜，我梗扮，有乜所謂呀！不過我最初真係唔知邊個係周秀娜，仲以為係以前嗰個周秀蘭！」
八十年代他惡搞一班天王巨星，近年通常玩政客。董建華、曾蔭權、陳方安生、葉劉淑儀，都令人笑到噴飯。他扮黃毓民，毓民笑笑口跟他合照；他扮孫明揚，孫公甚至讚嘆相似程度連太太也會認錯。盧海鵬的江湖地位，不是「福祿壽」能及。
「唯一唔扮中國國家領導人，無謂嘛，死得人㗎！」
搶鏡白西裝
盧海鵬也不是天不怕地不怕，他忌諱紅色力量，因為真的受過苦。他原籍番禺，廣州長大。自小酷愛看戲，年青時曾做民工團團長，專責表演話劇。
「唱歌跳舞二胡喇叭乜都識，如果唔係點管得掂班 𡃁？」
文革爆發，他「成分不好」，被判去東莞鄉間勞改。「梗係有受苦，佢哋要觸及每個人嘅靈魂！（深深吸一口煙）嗰時只能夠做國家規定嗰幾齣『樣板戲』，所以我識唱：『共產黨……』（即席用京腔示範）。」
那時他才二十出頭，深感前路茫茫，於是設法偷渡來港。他可是偷渡了三次，方才成功。
「毛主席叫我哋『到江河湖海鍛煉』嘛，我咪游水嚟香港囉！頭兩次俾人捉番去收容站，即係監倉啦，每次要坐三個月。可能我個樣惡，坐坐下做埋倉長！」
70年，終於成功在流浮山上岸，踎了幾天差館，又是一條好漢。
「喺差館去廁所時見到有疊報紙，裏面全部係電影廣告，我心諗，香港咁多戲睇，發達咯！」
他在紗廠做工人，工餘時例必泡戲院。他死心不息想做演員，自薦到話劇社與特約演員公司。
「有次真係有機會做茄喱啡，我喺紗廠攞咗啲布做咗套白西裝，專登喺男女主角後面行來行去諗住搶鏡，結果俾導演鬧：『着白西裝條友行開！』嗰時一係拍國語武打片，一係拍艷情片，兩樣都唔啱我，後來就諗，電視都唔錯！」
去年憑《奪命金》奪金像獎最佳男配角，鵬哥爆了個小秘密：「我嗰 pat頭髮係扮詹培忠，杜琪峯話佢好憎詹培忠喎，咪叫我扮佢囉！」
《蘋果日報》圖片
呢條契弟做到喜劇
他一早想入藝員訓練班，但一直超齡。 73年，訓練班收生放寬至 35歲， 30歲的盧海鵬立刻報名。他跟周潤發、吳孟達同期，教材是俄國戲劇大師史坦尼斯拉夫斯基的《演員自我修養》，盧海鵬在大陸時早已有本收在枕頭底。
「其實我乜都識，但唔出聲，僅僅合格畢到業就算，鋒芒太露好易死！」
當然又是文革的教訓。他樣子長得惡，畢業後演來演去都離不開惡爺，於是便自我轉型。
「惡爺都可以笑面虎咁演啫！整整下監製就覺得盧海鵬呢條契弟做到喜劇喎，於是調我入《歡樂今宵》。」
個個訓練班畢業的演員都要經歷幾個月的《歡樂今宵》，通常有入有出，唯獨盧海鵬入了去便出不了來。他由 74年做到 89年，黃金十五年，當中《蝦仔爹哋》的「矇豬眼」更是經典中的經典。
「後來仲有《蝦毛爺爺》同《矇豬眼回來了》。陳山河做我個孫，條契弟做做下走去割雙眼皮！」
他的搞笑形象深入民心，可是當《歡樂今宵》完結之時，盧海鵬的事業也遇上小低潮。
「拍番劇集，好難扭轉觀眾對我嘅睇法。無論我幾認真、點努力都好，大家都覺得我喺度搞笑，當時真係有啲灰心。」
時不我與，他索性跟女兒移民加拿大去。
「都有諗過退休，但唔做嘢真係頂唔順，人零舍殘得快！」
你拍乜 X戲？
正經拍劇又好，搞笑扮嘢都好，已不重要了。近年盧海鵬轉戰電影圈，通常演些黑道中人，入型入格。
「舊年《奪命金》俾咗個獎我，今年忙到呢，大大話話拍咗十幾部戲，有啲客串一、兩日，為咗連戲搞到我想剃鬚都一直剃唔到！」
活到七十歲，突然來個一線小生的 happy problem，都幾令人振奮。
「從來冇等攞獎，但有梗係開心，否則死咗就冇人記得。依家唔同，金像獎歷史裏永遠有盧海鵬個名。」
最佳男配角一獎，為他帶來不少新衝擊。
「多咗好多後生仔識我，搭地鐵好多人搵我影相。都冇乜加片酬，唔識嗰啲導演咪加少少囉！依家成日有人打嚟話：『鵬哥我係邊個邊個……』我就問佢：『你拍乜 X嘢戲㗎？』哈！哈！」
他像個老頑童，看通世情，遊戲人間。老頑童太太在加拿大，他獨居美孚，樂得清靜。
「我鍾意自己一個，唔使人照顧。煮個麵，舒舒服服，有人跟住仲麻煩。」
他有六粒乖孫，不時上門探望。
「最細嗰個得四歲，早兩日專登上嚟唸唐詩俾我聽：『床前明月光……』仲識舉頭同低頭㗎，笑死我！」
他依然愛煲劇，嬲還嬲，仍天天看無綫。
「兩套劇集一定睇，睇到三點先瞓。我乜狗屎垃圾戲都睇，我扮嘢咁叻，都係因為睇得多之嘛！」
盧海鵬有兩女一子和六位孫兒，一早已享兒孫福。《蘋果日報》圖片
盧海鵬爸爸做針織，家境本來小康，若不是文革，他應該生活得幾好，也未必會來香港。
忽然 1周
尾聲，再叫盧海鵬整多句 gag，今次要玩《忽然 1周》。
「《忽然 1周》，認真戇 X！哈！哈！」他不用一秒就想出來，三句不離本行。
「可唔可以整句我寫得㗎，鵬哥？」我懇求，儘管我已笑到碌地。
「咁呀，《忽然 1周》，認真無修；或者《忽然 1周》，衝出亞洲；再唔係就《忽然 1周》，好過去偷……」
其實，我真係覺得第一句最好笑。人生就是不停遇上一些戇 X人和幹一些戇 X事，但大部分人又不會承認自己戇 X。
鵬哥，請繼續爆粗，香港需要你。 
張國榮
羅文
林子祥
泰迪羅賓
羅文
張學友
古巨基
周秀娜
黄飛鴻
朱咪咪
木村拓哉
葉劉淑儀
徐小鳳
沈殿霞
鄭欣宜
許鞍華
梅艷芳
葉問
陳志雲
曾蔭權
董建華
黄毓民
郭富城
高錕
張國榮
陳方安生
李小龍
孫明揚
盧冠廷
畢彼特
曾志偉
黄耀明
葉子楣
下期預告：家嫂 
撰文：林蕾
攝影：梁幹持
協力：李梓軒
錄像：湯文峯
髮型： Angel Louie
形象： Bryan@the Flaming
服裝： Michel René
留言列表
{{ article.title }}
