7.9＂芒

Geek友講場

小蘋你好！ iPad mini is coming

2012年10月31日 ~~ 第284期 Face

教主生前講明自己有幾睇唔起 7吋平板，下場只會係「 dead on arrival」，點知教主一 dead， 1年零 3星期後， 7.9吋屏幕、賣點係一手可掌握的蘋果小平板 iPad mini，立即就 arrival。
雖然 iPad累積銷量已達 1億部，但 Kindle Fire HD同 Nexus 7兩部平價 7吋 tablet來勢洶洶；老對手 Microsoft又整部 Surface tablet加入 10吋戰場，雖怪 Tim Cook揹住叛教惡名都要推出小平板，仲喺短短 7個月內加推第 4代 iPad，果迷們，出血 ready？

互動片段

Window 8登場

iPad Mini

優點：細芒方便、 308g輕過 iPad一半、僅厚 7.2mm
缺點：冇高清芒、用 A5舊 CPU
新機主入手指數：★★★（ 3為最高）
舊機主換機指數：★★

Spec.

作業系統： iOS 6
制式： 4G（ 1800MHz）、 3.5G、 GSM
屏幕： 7.9" 1,024× 768
處理器：雙核 A5
儲存容量： 16/32/64GB
鏡頭： 120萬（前置）、 500萬像素
體積： 200× 134.7× 7.2mm/308g
WiFi版：$2,588（ 16GB）、$3,388（ 32GB）、$4,188（ 64GB）
WiFi+Cellular版：$3,588（ 16GB）、$4,388（ 32GB）、$5,188（ 64GB）
發售日期： 11月 2日（ WiFi版）、 11月底（ Cellular版）

壓軸出場　超輕薄小蘋果

又為 Tim Cook畀吓分數，今次 keynote好玩過 iPhone 5嗰次少少，最起碼識得講爛 gag話：「點解 iPad咁好賣？因為 fans鍾意 iPad！」推完 MacBook Pro、 Mac mini同 iMac之後，驚喜地爆出一部第 4代 iPad，唔少抽水怪 real time上 facebook寸爆話冇 iPad mini，點知話口未完， Tim Cook已單手拎住部小平板晒命。
呢部「叛教新機」，由性能、定位都令人摸唔清佢個底。講吸引，縮水兼改用 Lightning線後僅薄 7.2mm，仲薄過 iPhone 5， 308g機身比第 4代 iPad輕過一半。但棄用 Retina高清芒、用番雙核舊 U A5，感覺有啲將價就貨。不過睇番 facebook留言，發現網民購物動機簡單直接， iPad名牌始終夠響，家吓 3千唔使，機價平一半、芒又巨過 Note 2，買來袋出街睇劇已賺，如果硬係要鬥 spec.鬥核數，就唔會做果粉啦！

新芒非高清

iPad mini芒變成 7.9吋，但並非 Retina高清芒，解像度只係等同 iPad 2，但喺美國玩過嘅朋友解畫，因為屏幕細咗，並不覺得非常粗糙。

一體磨砂背

反轉背面，全為磨砂面，唔似 iPhone玩兩截色，反而較似新一代 iPod Touch用 unibody。

薄過支鉛筆

iPad mini薄過一支鉛筆，放入衫袋唔覺凸起，但小心唔覺意放埋入洗衣機！

配件由頭買

新機改用 Lightning線，全面飛走 30針插頭。同期推出相機、 SD咭接駁線（各$238），要用 iPad過相，換機時又要畀多筆。

照玩 10粒鐘

有網民將早前嘅流出 demo機拆散，發現入面的確係 A5核心，雖然電池因機體而縮水，但一樣可以 run 10個鐘。

iPad mini打到電話？

好多人留意到今次 iPad mini個性能表，出現 WiFi+ Cellular（蜂巢網絡）呢種制式，好多人誤以為 iPad mini可以打電話，其實 Apple只係將 4G上網功能改過個名，以防商品對應唔到某國家 4G網絡而俾人告。

CSL暫冇份

今次 iPad mini跟 iP5一樣只支援 LTE 1800Mhz，網頁今次終於出現 SmarTone icon， 3仔亦都榜上有名，但 CSL就被飛起，似乎仲未拎到 Apple授權。

iBooks升呢　變迷你教科書

一向 iPad都係教育界好朋友， Tim Cook於發布會仲話，原來電子教科書已經多達 35萬次下載量，仲可以免費 update更新，唔使年年為幾頁更新買新書。
而迷你 iPad面世後，拎出街、帶返學都更方便，無論學生返學、或者出街睇電子書都更方便。所以今次 Apple推 iPad mini之前，公布 iBooks亦有一連串更新，仲會預載係機入面。更新包括新增連續捲動功能，睇書唔使逐下掀。仲支援 40種新語言，中文書亦加入右掀左功能，好體貼。睇中書內金句，亦可以隨時 share上 facebook同 twitter，功能極之全面。

iPad mini同樣會有 Smart Cover，有藍灰黑紫綠 5色，金屬活動扣飛走，質感較膠。記者個人覺得 7吋 iPad仔，冇乜需要加 stand囉。$298

iBooks iOS Free

除咗新增連續捲動，仲可以直接於 iBook app內 copy節錄好書金句， share上 Twitter、微博或 fb。

睇書唔只可以 mark低金句 share，仲可以即時翻譯成唔同語言。

第 4代 iPad快一倍　 The New iPad被消失

拍埋 iPad mini度，第 4代 iPad個 Retina芒有幾靚，一睇就知。（《法新社》資料圖片）

成晚 keynote，最估佢唔到嘅係第 4代 iPad，新機換咗粒比舊機快一倍嘅 A6X核心、改用全新 Lightning插頭。因為 The New iPad今年 3月頭先發布，事隔 7個月就變身 Old iPad， Apple Store網頁即時停售兼 cut走資料，成為絕版貨，唔少用家都喺 facebook上申寃。其實冇人迫你一定要追買最 update型號； Note 2用家出機唔夠一個月又有 LTE版，咪仲慘！

iPad 4th

優點： A6X核心、新版 WiFi更高速
缺點：外形冇新意、仍然咁重
新機主入手指數：★★
舊機主換機指數：★

9.7吋 iPad會 cut淨 iPad2（ 16GB WiFi版$3,088/16GB 3G版$4,088）同埋新增嘅 iPad 4代（ 3種容量、兩款制式），後者粒 A6X理論上比 iPhone粒 A6更快，追求大芒快 U可以一玩。

新機另一升級位，就係換成 Lightning槽，方便 iPhone 5用家。

Spec.

作業系統： iOS 6
制式： 4G（ 1800MHz）、 3.5G、 GSM
屏幕： 9.7" 2,048× 1536 Retina
處理器：雙核心 A6X
儲存容量： 16/32/64GB
鏡頭： 120萬（前置）、 500萬像素
體積： 241.2× 185.7× 9.4mm
重量： 652g

售價：

Wi-Fi版
$3,888（ 16GB）、$4,688（ 32GB）、$5,488（ 64GB）

Wi-Fi+Cellular版
$4,888（ 16GB）、$5,688（ 32GB）、$6,488（ 64GB）
發售日期： 11月 2日（ Wi-Fi版）、 11月底（ 4G版）

專業執相 iPhoto

另一大改進係 iPhoto，好多 Mac友應該唔會陌生。今次更新版嘅 iPhoto，最高支援 1,900萬像素嘅相片，即係要執高階 DSLR機影嘅相，亦都應付有餘，絕對係龍友恩物。

iPhoto iOS$38

iPhoto新加入唔同嘅相片瀏覽模式，好似呢款書架樣嘅 folder，十足 iBooks咁。

除咗顯示 Geo Tag之外，仲係版面上新增埋當地天氣，睇相時更有親切感。

奴 comment

iPad mini切合一貫 Apple家族的產品，靚，細緻。單手可以拿上手，方便，價錢亦可接受。有埋 4G版真係夠晒完美，因為 size細自然想拎出街，喺街都可以高速上網，爽！

網友怒插冇新意

iPad mini早就通天，但 10月 23日蘋果發布會上卻意外爆出 iPad 4，短短 7個月內生葬 The New iPad，用家嬲爆。同時亦有果粉不甘 Apple同 Galaxy鬥出唔同尺寸、作賤自己，亦有改圖黨用二次創作恥笑佢加長完 iPhone就搞 iPad尺寸，一齊睇網民創意。

來來去去都係呢個樣，難怪 i系產品畀人笑佢哋嘅進化只係不斷循環。

之前 iPhone 5畀人改做超長嘅雙截棍同摩天樓，依家 iPad mini就畀人恥笑佢第時應該會變得愈來愈 mini。

先達 Lo哥：「 iPad mini只有 5百水位」

先達 Lo哥

「畀着我係買家，梗係入手 iPad mini，起碼有多啲新鮮感嘛。不過炒價就冇乜得諗啦，頭轉貨我都係預只有 5百幾蚊水位，而且一如既往，應該都係細 GB數機會好價少少啦！至於 iPad 4就出得太突然兼冇驚喜，經歷過 iPad 2同 New iPad慘痛經驗，我相信唔會有炒價。」

iPad mini原定 10月 26日開始於網上訂購，但一直等到下午 3點半個網先正式開通， Apple Store網頁出現 iPad mini預訂畫面。但揀色之後，卻發現咩色咩 GB數都統統暫無供應。

一直等到下午 5點半左右，終於有得㩒，仲冇上限任你訂幾多都得，轉個頭可能 Apple發現有 bug，短時間顯示冇貨後，𠵱家已經可以長訂，但就更正為一人限定 2部，真正用家有福！

超薄 iMac　瘦到嚇親

睇見機邊只有 5mm，現場即時嘩嘩聲。（《美聯社》資料圖片）

發布會入面，見到新版 iMac，都估到最多講吓功能升級，正面睇外形真係冇驚喜，以為只係加咗 Retina display。點知高層 Philip Schiller慢慢轉部機，機邊原來偷薄到得 5mm，絕對驚為天人。效能方面，唔只粒 U升級， Apple仲推出全新 Fusion Drive，結合咗 SSD用傳統硬碟，識得將常用嘅檔案同程式放去 SSD，提高存取效能，好鬼醒目。不過睇真部機原來只係薄喺條邊，機身厚度冇乜點變，而且飛走晒 DVD盤，連 SD咭都係摸機背插。美麗有代價，惟有用外置燒碟機同 card reader啦！

新 iMac

點知一睇個正側面……

優點：超薄邊有睇頭、省電 50%環保
缺點：冇 DVD ROM、新款芒傳聞易燒易黃
新機主入手指數：★★★
舊機主換機指數：★

其實日本早就開發咗呢類整合 SSD+傳統硬碟嘅技術，不過 Mac就勁在喺 Mac OS優化， Fusion Drive可以自動判別用家有邊啲軟件成日用，自動幫你移去 SSD位置，算係 Apple今次 keynote最有創意新技術。

Spec.

iMac 2012
處理器：四核心 2.7GHz/ 2.9GHz Intel Core i5（可擴充至 i7）
記憶體： 8GB DDR3（可擴充至 16GB）
容量： 1TB（ 27吋版可擴充至 3TB）
21吋
體積： 450× 528× 175mm/5.68kg
售價：$9,888（ 2.7GHz版）/$11,488（ 2.9GHz版）/11月發售
27吋
體積： 516× 650× 203mm/9.54kg
售價：$13,888（ 2.9GHz版）/$15,488（ 3.2GHz版）/12月發售

MacBook Pro　 Retina靚芒 13吋

睇規格數據， 13吋 MacBook Pro只係比 MacBook Air厚 2mm，不過見外國記者拎上手，機身薄度認真一般，要厚嘅地方其實都好厚。

Retina芒 MacBook Pro加推埋 13吋版本，解像度高達 2,560× 1,600，機身最薄處僅 1.9cm厚、 1.6kg只係比同尺寸 MB Air重多 250g，但性能方面就高階好多。之但係細心網民就擔心 13吋入門版冇得加 RAM， 8GB根本不足以做到 Apple推銷嘅高清執相同剪片工作，似乎都係潮人晒命玩意，真正用家不如一步到位買 15吋版！

Macbook Pro with 13" Retina

優點：新芒、夠潮
缺點：其實唔係咁薄、冇得加 RAM
新機主入手指數：★★★
舊機主換機指數：★★

Spec.

MacBook Pro
處理器：雙核心 2.5GHz Intel Core i5（可擴充至 i7）
記憶體： 8GB DDR3
屏幕： 13.3吋 2560× 1600 Retina
容量： 128GB/ 256GB
體積： 219× 314× 19mm
體重： 1.62kg
售價：$12,988（ 128GB版）/$15,488（ 256GB版）
發售日期：已於 Apple Store有售

性能任執 Mac mini

四四方方嘅 Mac mini，焦點必定擺喺性能上面。除咗處理器提升， Mac mini今次推出嘅選擇極之多：處理器有雙核 i5同四核 i7揀、硬碟可以轉做 Fusion Drive、記憶體又可擴充到 16GB，最平嘅 Mac mini只係$4,688就有交易，即時升呢做 Mac user，抵玩！

四個 USB插糟全部升級到 USB 3.0， SDXC讀咭器依然冇被飛走，值得一讚。

Mac mini Spec.：

197× 197× 36mm/1.22kg/i5 2.5GHz+500GB硬碟版$4,688/i7 2.3GHz+1TB硬體版$6,288

iPod Touch五代音質升級

其實， i物家族仲有個新成員第 5代 iPod Touch，上月推出以來因貨源短缺，回收價曾小炒$200。雖然 iPad mini影響之下，新 iTouch未必再炒得，我哋取得實機測試，機能其實幾紮實， A5核心跟 iPad mini一樣， upgrade過嘅 500萬像素鏡頭影相能力接近 iP4S，只比 iP5稍差，另外處理器升級，行 iOS6流暢。聽歌方面，音質仲靚聲過 iP5，用跟機耳筒已可聽出分別，相信 Apple有做過嘢，始終係 iPod嘛！

手繩位設計細心，按掣後掛繩扣會彈出，但條繩只係就咁套上去，感覺不大可靠。

4吋屏幕/500萬像素相機/123.4× 58.6× 6.1/88g/32GB$2,288/64GB$3,088
有黑、白、粉紅、黃、藍 5色。紅色為網購特別版，部分收益支援愛滋病人。

相機質素有 500萬，試玩發現水準跟 4S不相上下，要去到同 iP5比，仲要放大細粒先見到渣。但唔知點解，用全景 mode影相時非常昏暗。（左為 iPhone 5、右為 iPod Touch）

改用 Lightning cable，比 iPhone 5更激薄。

Nano長人七公

介面由顯示四個 icon增加至六個，新增影片、相片功能。

iPod Nano第 7代外形長咗成倍，冇得再扮手表，主要係追加睇片睇相功能，另可對應藍牙 4.0接駁喇叭、耳機。 2.5吋屏幕/16GB/76.5× 39.6× 5.4mm/31g/$1,188

插畫家 Kenny Wong：「 13吋啱網頁製作！」

「佢個 Retina芒解像度高，搞剪片開好多 panel（工具視窗）都得，但啲字就會好細粒。睇番部機其他規格，我覺得啱搞網頁嘢用，因為 web製作對圖像解像度要求冇印刷傳媒咁高，比如 blogger四圍飛，影吓相、畫吓插畫，砌埋網頁，其實都好夠用。」

微軟 Surface Tab掀平板三國志

Apple急推新 iPad 4代同 iPad mini，除咗打 Android部 Nexus7，仲要提防 Microsoft Surface橫空降世。今次微軟不再軟，染指硬體市場，再加上大幅改革嘅 Windows 8系統， Surface Tablet確係充滿話題，預訂反應良好，香港暫時已經冇晒貨。即刻同你睇吓 Suface真身，仲 check埋其他第 3廠 Win8 Tab，正式掀開平板三國志戰幕。

Spec.

作業系統： Windows RT（ Tablet專用簡化版、 Win8版本推出日未定）
連線： LTE 1800MHz、 3.5G、 WiFi、藍芽 4.0
屏幕： 10.6" TFT 1,366× 768
處理器： nVIDIA T30四核
儲存容量： 32/64GB
鏡頭：前/後置 720p web cam
體積： 275× 172× 94mm/680g
售價：$3,888(32GB)/$4,688(32GB連 Touch Cover)/$5,488(64GB連 Touch Cover)
查詢：蘇寧/2783 2999

後面個 stand係機身一部份，就算冇買 touch cover都一樣企得直，設計有心思。

Touch Cover係一塊連 keyboard嘅保護套，採用輕觸式操作（跟機買只有黑色，其他色單買$968），想要實實在在的鍵盤 feel，遲啲仲有個傳統打字式 Type Cover。

Surface 11月至到冇現貨

全新解鎖方式係篤相片，示範就搵咗魔術師篤完頂帽再畫支魔法棍先開到鎖，都幾麻煩。

Suface Tablet擁有 10吋篤芒，更用上最新像素融合技術，顯示層更貼近芒面，同 Retina iPad一樣咁清晰。介面方面， Windows 8一改游標操作法，轉晒做 Windows Phone 8「動態磚」格仔 icon，大大粒顏色又靚、幾好篤，試玩過後覺得介面流暢，色彩都頗為鮮豔。老問題都係 app數目不及 iOS及 Android豐富，但已有蘋果日報、 AA Stock、中原地產等本地 app支持。如果想買部嘗吓鮮，可惜要話你知因為船期延誤，官方發售日已經由 10月 26日延後到 11月頭派貨，加上獨家售賣店蘇寧嘅預訂名額已 full，估計買到現貨機會甚微，睇吓介紹觀望吓先啦！

先達店主阿文:「炒賣機會微」

阿文

先達店主阿文就話自己有留意呢部機，但覺得炒賣機會唔大。「依家全部資源都放喺 Apple產品上面，水貨都未會有太多店入，炒賣機會唔大。」

用家涼粉：「 Win8同 RT大有分別」

涼粉

資深 Windows及 Win Phone用家涼粉，早已關注 Win8平板：「 Win8平板可以取代到 notebook工作，又有平板手感，好期待。但留意頭批貨個 OS係簡化版 Windows RT，只能運行 Windows Store下載 apps；要等 2013年頭推出嘅 Win8版本，先至可以安裝各種 Windows舊軟件。」

率先試新 Win平板新手勢

無論 Win 8還是 RT，主打都係動態磚介面，一粒磚頭一個 app，亦會作 widget式動態顯示，用落同 iOS、 Android相似。無論係 Surface或者其他新 Win平板都加入咗新嘅共通手勢操作，方便用家叫出選項菜單、多工欄等操作，尤其係畫中畫多功顯示夠實用，感覺都幾順手聰明。

設定畫面
開緊任何 app都好，由畫面右邊邊位向左掃即可叫出 Charm Bar，用來返回主頁、搜尋、作各種設定。

同步多工
同步多工介面用法就唔係咁習慣，你先要喺畫面左端向右掃，以迷你視窗叫出對上一次使用嘅 app。之後手指向左掃，小視窗就會掉落畫面左邊，呢個時候就會見到同步多工介面。

畫中畫
篤住多功欄入面嘅細 app拉出，就可以左右分割雙 app齊開。兩個 app永遠會一大一細，但可自由切換，播片中途都唔會斷，顯示機體性能好高。

其他 Win8平板選擇：繼續變形 Asus VivoTab TF810C

華碩 Transformer變形平板一向受好評，轉用 Win8一樣繼續變， VivoTab TF810C外形同變形系列如出一轍，可以插入附加嘅硬式鍵盤，發揮 Win8強大文書處理能力。

Windows 8/Intel Atom Z2760 Dual Core/11.6"
1366x768 IPS/Wi-Fi無線上網/64GB/294.2× 188.8× 8.7mm/675g/售價:$7,798/查詢:Asus 3582 4770

手提變摺　 Sony VAIO Duo 11

Sony VAIO設計一向有心思，呢部 Duo 11本身係平板樣，將下方鍵盤拉出嚟即時可以變身 Notebook。預載 Windows 8 Pro同埋高效能嘅 i7處理器，平板外形、頂級機能。

Windows 8 Pro/Intel Core i7/11.6" 1980× 1020 TFT/Wi-Fi無線上網/256GB/319.9× 17.85× 199mm/1,305g
售價:$9,980
查詢:Sony 2345 2966