娛樂八掛大放送★

關淑怡經濟冇問題2月再踏紅館

關淑怡（Shirley）早前在網上表示想自殺，震驚娛樂圈，有傳她因事業遇上沮滯所致。但據知她一直工作不斷，除了將會為無綫重頭劇獻唱主題曲外，明年二月更重返紅館開騷，力證收入冇問題！

自Shirley在Facebook留言想自殺後，外傳她因簽唱片公司不成，覺得受到挫折而不開心，另外有傳她經濟欠佳，工作不多致冇錢交租，令她心灰意冷！但據身邊好友透露，Shirley的工作一直不斷，不時出埠登台，曾到澳門、內地多個城市開騷，而六月在加拿大的兩場演唱會更全場爆滿，證明天后吸引力不減！

近年甚少出席公開活動的Shirley，實力仍備受肯定。她獲無綫高層曾勵珍欽點，下周將為無綫重頭劇《大太監》主題曲錄音，因無綫十分重視該劇，需要具分量的歌手來獻唱，可見Shirley魅力依然。無綫亦在早前的《翡翠歌星紅白鬥》中安排她演出一Part，證明與無綫關係良好。另外，據知Shirley明年2月將再踏紅館舞台開騷，求證其經理人王敏慧時她說：「之前成功申請到明年2月紅館開騷，而且佢工作一路都有，生活不成問題，希望外界唔好亂估。」

阿倫勸走出死胡同

而Shirley好友譚詠麟（阿倫）和李克勤昨日出席活動時，都希望她盡快走出困局，又寄語她有煩惱最緊要找朋友傾訴，阿倫說：「暫時冇打過畀佢，等佢一個人靜吓先，一個人最緊要自己諗得通，行入死胡同嘅都係自己對腳，希望佢行番出嚟，有事同朋友傾吓偈最重要。」克勤亦希望她可以冷靜面對困難：「畀時間佢冷靜吓，我哋局外人唔了解事件，唔應該太多猜測。」

Shirley工作不斷，不愁無錢使。