上流滙
透視誘惑
潮流，是性格分裂。今夏大熱的透視元素，便是最好的例子。一套套透視長袖上衣，一襲襲貼肉透視長裙，令不少名人明星於今夏趨之若鶩。她們本着流汗事小，晒潮事大的精神，甘願將透視裝掛上身，演活女士愛靚唔愛命的潛在細胞。
不過，透視裝唔易 handle，着得靚可展現無比誘惑，穿得差會淪為低俗，劉嘉玲的最佳示範同王秀琳的反面教材，有辦你睇！
劉嘉玲大師風範(Good)
「呢件透視 top係屬於歌德式設計，帶復古味。嘉玲姐將女性嘅美感充分演繹，好貴氣，有壓台感。」
范冰冰髮型敗筆(Bad)
Louis Vuitton
「透視裝對范冰冰嚟講係冇難度，不過佢今次無論化妝同髮型都好累事。尤其呢種刻意有中國味嘅髮型好肉酸，敗筆。即使俾件更靚嘅衫佢着，都只會係浪費。」
何超雲心思配搭(Good)
Evil Twin
「好多人都唔認同超雲嘅品味，但今次佢打扮真係 OK。雖然佢條腿唔算修長，但佢都肯着呢條短褲，再加透視紗裙，效果唔錯。睇得出佢喺配搭上花咗心思，但如果上身件衫再簡單啲更好。」
熊黛林涼鞋累事(Pass)
Anteprima
「呢個透視造型都 OK，佢亦都着出型格嘅感覺。不過對鞋嘅 cutting同造型完全唔 match，其實着對簡單嘅高踭鞋就得，依家影響咗成個觀感。」
容祖兒着得修長(Good)
「呢條黑色雪紡裙好高貴，有一種好 soft嘅感覺，長長嘅裙尾令 Joey嘅身形顯得修長，而且上面有少少透視，有若隱若現感覺。」
畫蛇添足(Bad)
「好肉酸，成身造型好怪，本身一件透視衫，無端端上面加件國旗圖案比堅尼，點着都唔靚，真係畫蛇添足。」
阿 Sa完全錯配(Pass)
「米色襯黑色冇問題，但佢配搭唔得，入面着咗兩件衫太多，着唔出透視嘅張力。加埋佢件黑色透視衫好怪，胸口兩個恤衫袋好唔自然，感覺麻麻。」
徐濠縈欠層次感(Pass)
「貴為潮流達人，佢呢件粉紅色透視衫都 OK，睇得出佢花過心思配搭。不過佢本身已經唔高，着咗呢對短 boot冇咗層次感之餘，仲搞到成個人好細粒。」
王秀琳感覺低俗(Bad)
「呢類中門打開嘅衫好難着，因為唔可以着內衣。佢着法冇事，但唔討好，一啲都唔高貴，有啲低俗感覺，眼高手低。」
貼士：打底 size要啱
Ricky指今夏流行透視造型，不過要提防打底出事。他說：「入面唔可以就咁戴個 bra top，咁樣只會有夜場感覺。所以大家要注意打底部分，顏色切忌九唔搭八，而且 size要啱啱好，例如出面着住闊身透視衫，入面就唔可以着住超貼身底衫，要揀番啲適中 size，着出層次感。」
星級形象指導郭慶彬（ Ricky Kwok）曾與不少藝人合作，近年更做埋潮店老闆，於銅鑼灣開設時裝店 LAYETTE。 
留言列表
{{ article.title }}
