揀男友，女士可能會愛高大威猛，但揀車的話，「細細粒容易食」可能更合她們口味，全因細車易控制，無論去到任何地方，泊位切線都特別容易。以豐田Ractis為例，車身的骰但夠高，坐入去唔頂頭，能否贏得女士歡心，且由模特兒Kinki先行一試！
售價：$159,840起
的骰最啱Feel
男女揀車的基本取態，可謂南轅北轍，已考獲駕駛執照3年的Kinki最近想搵車，條件又係咩？「之前我揸歐洲車，但係因為車太重，好多時都捉摸唔到油門控制，見架車唔去咪踩大油囉，點知又畀得太大。所以今日我想搵架細車，的的骰骰就最啱。」如此Ractis便正是她那杯茶，因為車身較短，所以控制容易，加上車價相宜，哪又是否合Kinki心水呢？
睇位好清楚喎！
「唔錯唔錯！以前揸三廂式車款，我經常預唔到尾箱位置，泊車時好易撞到尾壆，呢架車仔冇尾箱之餘，前排A柱又冇盲點，睇位好清楚喎！」
冷氣掣、波棍台同音響連成一體，夠晒慳位！
嘩……空間真係好大呀！
空間大用途廣
另外，Kinki熱愛戶外活動，放假唔係滑浪就係打高爾夫球，間中仲會踩吓單車添！所以明顯地她對尾箱載物量要求好高。Ractis以「Headroom for your Style」為口號，呢點又點會難倒佢？帶Kinki睇睇摺合後排之後的大尾箱，連伊人也心花怒放！
真係好大呀！
「嘩……空間真係好大呀！我平時最鍾意去郊外，呢個尾箱足以放入我部單車。踩到身水身汗想搵個地方抖抖，嘩……呢個平台好似張床咁，等我瞓上去試吓先！」
外面細入面大，幾個老友出街都夠坐！
就算嬌滴滴的女士，都可輕易將後座摺合。
白色車身鬼咁純潔，最合女仔心意啦！
前排坐得好舒服，揸得耐都唔怕攰。
軚環附近設有儲物格，Kinki話放電話啱晒！
放平晒後座，載物量暴升。
慳油好緊要
不過鍾意還鍾意，女士都好識得精打細算，Kinki好直接咁問呢部車幾錢同耗油量，因為佢話除咗假日去玩之外，平時夜晚都鍾意同三五知己去遊車河，甚至上飛鵝山數星星。老實講，廠方就話要18.6km/L，而據小記早前進行的4天測試，得出嚟嘅結論係約$0.9/km，咁你話平唔平呢？既然心動，小記亦奉勸Kinki行快步，因為呢排日圓又升啦！
油費比我架錢七平好多！
「對於我呢種鍾意玩又鍾意使錢嘅人嚟講，養車梗係畀得愈少錢愈好，而$0.9/km呢個數同我以前架歐洲錢七比較，真係平好多囉。」
中控台簡簡單單，最緊要係易用。
1.3公升引擎，慳油又夠用。
規格表
車型：五門五座位揭背車
引擎：直四
容積：1,298c.c.
最大馬力：87ps/6,000rpm
最大扭力：11.8kgm/4,000rpm
驅動：前置引擎、前輪驅動
傳動：CVT
懸掛：（前）麥花臣、（後）扭力桿
制動：（前）通風碟、（後）制動鼓
車身體積：3,955×1,695×1,640mm（長×闊×高）
撰文：林健森
攝影：郭凱敏
查詢電話：2305 4555（皇冠汽車）
模特兒：Kinki（Pure Models）
留言列表
{{ article.title }}
