面對面

 

為了照顧部分對娛樂圈緋聞關係圖不太敏感的讀者，容許我先用一點篇幅解釋一下陳偉霆與此文息息相關的感情瓜葛：
陳偉霆的現任女友，是相戀15個月的阿Sa蔡卓妍；蔡卓妍去年3月宣布與結婚四年的丈夫鄭中基離婚，而離婚原因，有傳是鄭中基暗交賀歲片《花田囍事2010》對手Angelababy；Angelababy曾經是陳偉霆關係親密的半同居女友，直到兩年前移情別戀搭上內地一線小生黃曉明；黃曉明說過一句金句「而我不知道陳偉霆是誰！」，其前度女友李菲兒暗示被Angelababy硬撬男友，而陳偉霆剛剛完成的新戲《龍騰攻略》又碰巧遇上和李菲兒演對手戲……七國咁亂，亂過韓劇。

 
陳偉霆說，出得嚟行，預咗俾人寫。從一公開戀愛被指炒作、假拍拖、報復舊愛、高攀師姐，到最近25歲仔第一次做業主被指靠阿Sa教路炒樓，都在意料之內：「公開前所有得失都衡量過，要寫嘅都寫晒，買樓畀意見真係冇佢份，佢自己投資都係佢媽咪幫佢。」
我提醒陳偉霆，葉德嫻一得獎，二十年前搶白韻琴男友一樣被翻炒，要做好心理準備，七國咁亂緋聞表恐怕跟他跟到變成謝賢的年紀，他苦笑回答：「可能真係會……跟一世唔緊要，我只想大家公平啲，我唔係想一步登天紅過Twins，起碼畀啲時間我成長累積。」
公平？我勸陳偉霆早點看開，娛樂圈沒有公平，人心也從來沒有公平。等於陳偉霆的前度是90後女神，現任是80後女神，拍戲連60後女神夏文汐、吳嘉麗也輪住迷倒，網友心裏何嘗不是在怒吼：「點解咁唔公平？」

吹脹
剛剛推出年度新碟《WOW》、完成了擔正的3D大製作《龍騰攻略》，據說明年要開音樂會、出國語碟兼手頭上已經有三部電影邀約做男主角。無可否認，陳偉霆2011年成績矚目，不過公平點說，這些並不全是公布戀情的功勞。今年25歲的陳偉霆，18歲那年參加新秀獨攬三個大獎，06年加入組合Sun Boyz不久已經成為最受歡迎的成員，08年單飛包辦四大樂壇新人獎，認識蔡卓妍以前，他的發展已經比很多同齡男新人強。當初為咗光明正大拍拖而公布戀情，已經衡量過後果。講乜都關女友事，我哋全部預咗。觀眾、網友總有自己睇法同意見，我哋都知，到咗今日，仲有人唔信我哋兩個真係一齊……佢哋唔係行家、同事，更唔係我哋嘅朋友，睇開啲，控制唔到佢哋觀點，就無謂計較。相比之下，我緊張報道多啲。須知道呢行啲嘢，俾人寫得多，假都變咗真。前排有個亞洲樂壇交流活動，我被選出嚟同韓國、馬來西亞、台灣等等其他亞洲年青歌手同場比賽，過程喺電視轉播。全程我出場唔夠十分一，竟然有報道大字標題話陳偉霆搞到收視奇差……當我透明、唔出我、唔講我，都好過抹殺我同成team dancers一個月嘅苦練，將成個節目收視歸咎於我一個身上呀！嗰一次，我真係驚以後都冇人夠膽搵我上電視！


講真，我哋其實唔係special case，其他人公唔公開都一樣俾人寫，我唔怪記者，亦明白佢哋唔可以唔問，可以做嘅只有說話比謹慎更謹慎，因為任何嘢出自我把口都會牽涉到女友，同埋努力做好自己分內事。所謂偶像派，努力好容易俾忽略，其實keep身形都幾辛苦，尤其呢幾年多咗戲拍，每次需要都唔同。《出軌的女人》一聽要做個冧阿太嘅舞男，我第一時間返屋企練到自己好fit，點知導演話錯晒、舞男冇時間操亦唔使咁大隻，嗱嗱聲節食、瘦番。啱啱拍完嘅《龍騰攻略》講蒙古摔跤要求我大大份，我要一日食五餐同12隻蛋食到自己由140磅變170磅，嚟緊傾緊嘅新戲要做古惑仔，又想我減肥變鋼條……我唔係要一步登天紅過女朋友，我只想大家對我公平啲，畀啲時間我成長，10年啦，畀10年我，我有信心。

熟女
陳偉霆十歲喪父，母親獨自養起三個兒女長大。大家姐年長他十多歲，從此以後身兼父職嚴加管教，半工讀供完自己上大學，再學經商擔起成頭家。陳偉霆說，媽媽和姐姐都是女強人，耳濡目染，他就是對年紀較長、獨立成熟的女性更有好感。講極都冇人信，我真係唔係有錢仔出身！家姐阿哥大我十幾年，佢哋細個屋企環境差到要周圍借奶粉錢！到我十歲，阿爸又過咗身，全靠媽咪同大家姐半工讀支撐…… 呢一兩年，聽到媽咪同親戚當笑話咁講至記番，原來爹哋走時，我見媽咪傷心，曾經話過：「媽咪你唔好喊，爹哋走咗冇人陪你瞓，我陪！我去到老都會陪你瞓。」係就係媽咪提我至記得自己細個咁傻，但我冇唔記得應承過媽咪嘅嘢，第時買樓搬屋定結婚生仔，去到邊我都會帶住媽咪一齊住。


細個鍾意跳舞、參加歌唱比賽，好似好有信心咁，其實嗰啲唔係信心，係表演慾。家嘅信心，係因為25歲大個仔，工作負擔同家庭負擔多咗，一定要有信心至可以做好工作、做一個擔當得起負擔嘅男人。冇咗爸爸，屋企更有凝聚力，屋企人驚我少咗爸爸管教，反而個個都做埋爸爸嗰份。考試差、功課唔好，我會俾媽咪、哥哥同家姐輪流教輪流打，次次都會打三鑊。所以我個人好硬淨，人哋點寫、點話我，我都會提醒自己千祈唔好被打倒，因為今時今日所有嘢來自事業，一旦被影響、一旦被打倒，分分鐘就咁斷咗自己後路。成日有人問我，怕唔怕女朋友叻過我被比較，講真，人比人比死人。同我同齡嘅同學喺外國讀完書返嚟，好勤力又點？都係搵唔到工。我哋平時鍾意玩啤牌幾百蚊上落，佢都話玩唔起。我鍾意玩滑水，一堂成千蚊，前幾年邊玩得起？家養到屋企、有自己事業、負擔到自己興趣，仲買到一層500萬嘅樓收租，雖然供得好辛苦，但都好過好多人，係唔係？

秘密
與女朋友的相處，陳偉霆客客氣氣說不想多說，總之雖然相差三年，自己從來不需要裝成熟，一起的日子一直過得舒服。不說現在只好問過去，最近同場拍戲的李菲兒暗示被Angelababy橫刀奪愛，而陳偉霆公布與阿Sa戀情時，Angelababy又在發表微博抗議：「你真的信他們只有三個月嗎？」到底誰才是貪新厭舊的那個？到底誰才是花心劈腿的那個？我要澄清，李菲兒喺新戲唔係同我做對手戲，我哋記招加埋喺片場同場加埋都唔夠兩日。唔係記者問我，我都唔知原來佢哋曾經傳過緋聞，仲要唔知傳聞係真定假，真係冇感覺。過咗去就算啦，中間仲要係隔咗幾個人，唔好再講。上一段關係處理得好唔好？我只可以講，喺我自己立場，作為男仔，無論過去式、現代式，還是將會面對嘅感情，無論如何要保護個女仔。佢家開心就夠，冇必要再講、冇必要再自爆私隱。感情過咗去，我就會將佢好似秘密一樣收埋喺一個盒仔裏面，係保護對方亦係保護一段自己嘅過去，無論如何，大家曾經相愛過、好close過。我冇問過舊女友對我嘅評價，但坦白講，大過錯，我應該冇犯過。

我本善良
我大可以對陳偉霆下筆狠一點、再刻薄一點，不過當一個25歲的小朋友態度誠懇、有求必應的完成訪問，一點不怪記者把話題都聚焦在女友身上，還可憐兮兮地說：「你哋都係做嘢，我其實好多謝《FACE》，咁多年都對我好好，冇寫過我衰。」叫人如何狠得下心辜負他？我大可以像平時一樣，和其他網友和同事一起取笑有關陳偉霆的網絡笑話，他卻小心翼翼的請求我少提為妙：「網上面嘅嘢，希望你唔好寫，我控制唔到人哋，知自己做緊咩就好。有一日我真係衰咗，俾人唱就真係抵死。」我又哪有臉再幸災樂禍落井下石？不過我還是要說，有一件事陳偉霆沒達到我的要求。我和攝影師一再要求他拍照時沒有表情、五官不要過度表現，他的字典裏大概沒有「沒表情」三個字，從頭chok到尾。當然，敬業樂業的偶像派，24小時on chok，是應分的。 ####


出道前主持兒童節目已經與模始祖Angelababy相戀，被拍到同居、遊船河還齊齊紋愛的紋身，直到09年分別傳搭上阿Sa和黃曉明。


3月被選中代表香港參加「亞洲超新星大賽」，同場與韓國、台灣、馬來西亞歌手競技歌舞，卻被報道指拖累收視，陳偉霆自言差點被打沉。


剛推新專輯《WOW》的陳偉霆，同時完成了新戲《龍騰攻略》，增完肥到170磅玩蒙古摔跤，下一步是減肥變鋼條古惑仔。


與年長三年的師姐阿Sa拍拖15個月，還十指緊扣去布吉度假，至今依然有網友不信二人真拍拖，陰謀論是炒作兼報復。


有個女友年長三年實屬小兒科，陳偉霆年初在電影《出軌的女人》演舞男，與46歲夏文汐、48歲吳嘉麗連場床上戲更重口味。


03年參加新秀歌唱大賽，唱功麻麻不過舞藝過人台風亦chok壓全場，狂掃三個台風大獎。


10歲時父親去世，陳偉霆說媽媽、姐姐和哥哥都身兼父職嚴加管教，加入Sun Boyz前反叛期，亦是哥哥花錢請教練度餐單，一手谷大隻弟弟兼拉佢返正途。


從小chok到大，陳偉霆說：「細個以為自己好得，所以有自信，其實係表演慾，人哋可能笑緊我。」

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄