娛樂八掛大放送★

在各大財經討論區，人人都話炒牛熊證炒輪輸死人，偏偏香港窩輪牛熊證成交之大，雄據世界第一。

港交所變身大賭場，皆因有鋪「賭癮」的股民，近日「騰雞」驚坐貨中招，轉炒快上快落的牛熊證，賭恒指升定跌，輸贏即日揭盅。由於其入場費低至數千元，完全迎合散戶刀仔鋸大樹的心態，兼且不用繳付印花稅；更吸引的是有「槓桿效應」：恒指升跌一個巴仙，牛熊證回報可達數倍以上，買得小，賠得大。

不過，股民憧憬魚翅撈飯的背後，隨時變成大戶點心。牛熊證一旦到價被「打靶」，投資者便血本無歸，分分鐘贏粒糖，輸間廠，奉勸入市前三思。

港股大上大落，股民轉炒同樣快上快落的牛熊證，令港交所儼如大賭場。

走進西灣河一間證券行，只見場內人人圍着股票機，但不是「噤」股票冧巴，而是緊盯着一堆「六字頭」牛熊證。有師奶突然高叫：「死啦死啦，隻恒指牛證比人『打靶』，又唔見幾千蚊！」記者追問是否揸重貨，她發晦氣說：「都係細細注大大聲啫！個市咁靜，玩股票左一巴右一巴，早排手痕買過隻澳博（0880），諗住博反彈，點知幾日唔夠輸兩成。買恒指升定跌，最少有一半機會贏！」

誰知身旁一個阿伯插嘴教訓：「輸死你呀，我哋呢啲散戶邊夠莊家大戶玩，做點心就有份！早前一萬八千八百點我買過幾隻牛證，最後到價打靶，蝕了幾萬蚊，贏輸無仇報，依家見過鬼都怕黑，唔敢再玩。」

股民如何喪炒牛熊證，從近日港股交投可見一斑。上周三，牛熊證成交金額創出歷史新高，達一百三十多億元，霸佔當日港股成交金額兩成四。整個星期，多次有牛熊證進佔十大成交金額榜。單是上周五，已有三隻熊證和一隻牛證齊齊上榜。其中一隻恒指熊證「瑞銀二一熊C」（67463），成交金額超過七億元，比中國人壽（2628）、友邦（1299）這些大藍籌還要多！

有散戶狂呻早前炒牛證，勁蝕幾萬元，發誓斬手指戒賭牛熊證。

信誠高級銷售經理呂文廣表示，玩牛熊證如入賭場，散戶隨時一鋪清袋。