黃家強○六年與日籍女友Makiko閃婚，婚後不足一年即誕下兒子黃慶陽。最近，四十六歲黃家強再次成功造人，老婆懷有「龍B」。日前，一家人現身金鐘太古廣場天倫樂，有五個月身孕的Makiko頂住「巨肚」，家強全程照顧周到，又做埋「湊仔公」，陪仔仔在商場又跑又跳，廿四孝老豆。

三個夠數
大仔○七年出世後，黃家強一直恨再做老豆，還講明要生夠三個先收手。今年終於得米，雖然未能一償心願追個B女，但即將再做老豆的家強接受訪問時，仍難掩興奮。「係呀！老婆係有咗，預產期出年二、三月，呢胎都係仔。原本想追個女，湊個『好』字，但都冇所謂啦！一直都有計劃生三個，個仔五歲啦，驚佢悶，想生多個陪佢，最多生三個就收手，太多自己都頂唔順，太嘈啦。（你成日返大陸做騷，老婆有冇詐型？）詐型都冇計，要搵食。嚟緊多個BB，我之前先買過部新車，又要請司機，要努力賺錢仲要慳啲使，我將旺角個band房搬咗去新蒲崗，嗰邊啲租平啲！」要儲定奶粉錢，家強近日四出走埠接騷。本身也是屬龍的家強，同即將出世的「龍B」屬同一生肖，B仔未出世，老豆已經上晒心。

代老婆湊仔
日前，家強趁住放假，陪老婆及仔仔家庭樂。當日下午一時多，一家幾口相約了一對日籍夫妻朋友及其四歲兒子，到金鐘太古廣場的Shiro食日本菜。之後兩對夫妻留在餐廳「打牙骹」講湊仔經。兩個小朋友則在餐廳門口附近又跑又跳，越玩越癲，更在商場玩「碌地沙」，家強見狀，立即從餐廳跑出制止。
見老婆同朋友傾到唔願走，家強索性陪仔仔玩埋一份，在商場「捉迷藏」，又帶仔仔到玩具鋪揀玩具，band佬變慈父。最後，強嫂與友人傾足四粒鐘，才埋單走人。之後家強一家繼續shopping多一個鐘，買到一袋二袋。

唔易中
好醜命生成，生仔女一樣，有啲一子難求，唔係個個都好似家強咁，要有就有。

陳慧琳
Kelly 09年誕下「蝦餃仔」後，一直心急想生多個，去年更嘗試接受「人工受孕」，可惜不幸流產。

袁詠儀、張智霖
袁詠儀及張智霖06年一索得男，誕下「魔童」，二人恨生女恨到出口，靚靚更放棄拍劇搵銀機會，專心養好身體造人，但一直未有聲氣，早前大寶法王來港，有指靚靚一家三口出齊求子！

吳君如、陳可辛
吳君如與陳可辛06年誕下女兒陳是知，君如一直有意為「陳家」追男丁，頻頻拜訪生仔聖手何永超醫生，近年亦多次傳出君如再度懷孕消息，可惜次次「中空寶」。 ####


黃家強的日籍妻子Makiko有了五個多月，早前一家三口現身金鐘太古廣場行街。


黃家強夫婦與日籍朋友在餐廳「打牙骹」幾粒鐘，兩個小朋友則在餐廳門口玩到癲晒。


老婆傾到唔願走，家強索性同仔仔玩埋一份，在商場「捉迷藏」。


腹大便便的Makiko，與友人道別時，一𠌥低身，谷奶上圍表露無遺。


仔仔扭計要買玩具，家強即發揮慈父本色，帶他到玩具鋪，任揀！


BB預計出年二、三月出世，家強積極儲奶粉錢，四出走埠接騷，早前便到海寧市為音樂節獻唱。


為方便老婆及仔仔出入，家強早前以五十五萬買入新車，更請埋司機接送。


Beyond明年30周年，家強亦表示希望三子有機會再度合作。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄