【萬千星虧頒獎典禮】無綫《萬千星輝頒獎典禮2012》將於下周一（17日）舉行，隨視帝、視后、最佳劇集讓觀眾普選，各小生、花旦都展開拉票行動，本報《2012萬千星虧頒獎典禮》的投票同屬一人一票，正好作無綫官方賽前走勢預測，在最佳男主角投票中，林峯粉絲明顯已發力，剛在大馬得視帝的馬國明及黎耀祥同樣告急。

無綫今年一人一票選視帝、視后、最佳劇集，但不披露投票走勢，本報《萬千星虧頒獎典禮》也一人一票選視帝視后，具一定指標作用，截至昨晚8時，視帝林峯在粉絲擁護下仍然領先林保怡及剛在大馬處男贏得視帝的馬國明，由於林保怡不在無綫官方投票名單之列，故其票數隨時落在馬明身上，但現時馬明依然弱勢，故高登網友已為馬明發起配票行動，望扶助他超越林峯坐上視帝寶座。對於網民配票支持，馬明昨晚說：「乜咁犀利？要多謝佢哋，有人投票就開心，都想多啲票拉近賽果，信心唔係冇，只係想平常心睇。」

■林峯的粉絲力量強勁，隨時左右大局。資料圖片

阿佘大比數拋離

最初網友建議集中投票給《名媛望族》的劉松仁，而不要錯配給陳豪及馬國明，但經一輪商議，認為松哥未得民心，難以抗衡林峯，遂幫馬明谷票。

■佘詩曼在本報的投票中一枝獨秀，其餘女主角要急急拉票了。資料圖片

■鍾嘉欣昨日在活動大讚阿佘，但她的粉絲仍未放棄為偶像拉票。

視后方面，已非無綫親生女的佘詩曼在本報的投票中一枝獨秀，阿佘在電話中說：「好開心、好感動，觀眾咁耐都冇遺忘《天與地》同葉梓恩，估唔到舊年年尾嘅劇仲有人記得，感激每一位投票畀我嘅人。」會否仍有機會攞無綫視后？阿佘說：「我對獎項向來隨緣，係你就係你，唔係你就唔係你啦，唔使咁緊張。」

在視帝、視后競選落後的小生、花旦昨紛紛出動拉票，其中黎耀祥與陳茵媺等先後為《大太監》到旺角、尖沙嘴派海報宣傳，吸引過百人圍觀，對於本報的最佳男主角投票林峯排首位，反映無綫的公開投票同樣可因林峯粉絲群票源左右大局，祥仔聞言說：「冇所謂，既然今年咁玩，得失對大家唔重要，最重要係投票表達方式創新、實在，鼓勵大家鍾意邊個就投邊個，每年嘅賽果都有微言，今次係真正民意。」

■黎耀祥跟陳茵媺等《大太監》演員到鬧市拉票，吸引不少人圍觀。

祥仔投自己一票

祥仔坦言即使自己的支持者不懂網上投票而輸蝕也沒所謂，因方式接近真實及公平，不過他笑言：「老實講，我覺得拉票冇用，但公司安排就嚟，唔係為自己，係為呢個一人一票而拉票。」而他會老實不客氣投自己一票。
鍾嘉欣昨在將軍澳出席活動，坦言對獎項以平常心看待，反而粉絲更緊張，替她整宣傳單張教支持者如何上網投票，問她是否要大搞？嘉欣說：「咁樣好似幾奇怪、核突。」對於本報的投票走勢，嘉欣感開心，自覺今年成績不俗，但睇好楊怡得獎，對被阿佘拋離，嘉欣說：「阿佘已經去到神級，任何角色都處理到，希望自己可以做到佢咁。」

■學民思潮的黃之鋒昨日也在facebook叫大家投劇集《天與地》一票。

「公道自在人心」

在本報投票榜視后包尾的陳茵媺，坦言第一年有份角逐視后已感開心，她睇好阿佘或米雪攞獎。陳法拉昨日換了新髮型，她表示：「我梗係支持自己老友，好似楊怡、子珊，男仔就支持祥哥（黎耀祥）同郭晉安。」
此外，在無綫視帝提名名單十強不入的林保怡，獲本報讀者支持僅次於林峯，保怡在電話中說：「好開心有人投票，我都覺得自己喺《天與地》做得好。」得到認同但得不到無綫視帝提名，保怡直言：「我連部頭約都冇簽好難怪人，呢啲公道自在人心啦！」

採訪：顏英儀、溫敏芝、楊潔雯、張俊銘
攝影：陳慧安、葉君海

王征最虧當之無愧

截至昨晚8時，本報《萬千星虧》最虧男主角由亞視老闆王征一馬當先，他以過半數58%的得票率遠遠拋離馬國明和鄭則士，相信捧獎無懸念。至於最虧女主角，周麗淇暫時以26%得票率壓過胡杏兒。未投票的讀者可登入http://tv-voting.appledaily.com投下神聖一票。

最虧男主角

王征《關注香港未來》　58%
馬國明《回到三國》　19%
鄭則士《造王者》　9%

最虧女主角

周麗淇《我的如意狼君》　26%
胡杏兒《換樂無窮》　25%
苟芸慧《怒火街頭2》　21%

最佳劇集

《天與地》　37%
《雷霆掃毒》　13%
《On Call36小時》　12%

最虧場面

亞視台慶：靈異掟包　29%
《雷霆掃毒》：一秒被姦　22%
《名媛望族》：楊怡咬唇　21%

爭視后突擊盆菜宴
子珊逐圍拉票

【今日我至狼】有份爭視后嘅徐子珊掛彩帶攞大聲公拉票，當正自己立法會議員咁狼死，見選情告急，真係要努力拉票力挽狂瀾。

【電視風雲】無綫為狙擊王維基揸弗的香港電視，昨傍晚無綫行政主席梁乃鵬率領兩千台前幕後晒冷食盆菜，陳豪、黎耀祥、郭晉安、徐子珊和陳敏之等251位藝員一呼百應撐場。瞄準視后寶座的徐子珊戴上彩帶、攞大聲公逐圍拉票，傾盡所能造勢。

為迎戰來勢洶洶的香港電視，無綫一連兩日在將軍澳電視廣播城停車場舉行TVB職藝員聯歡晚宴2012，昨傍晚行政主席梁乃鵬、執行董事兼集團總經理李寶安率領兩千台前幕後職藝員，筵開179圍盆菜宴及設幸運大抽獎，並進行《萬千星輝頒獎典禮2012》專業投票組別投票，由全台職藝員進行投票。昨晚撐場的藝員包括陳豪、黎耀祥、徐子珊、曾志偉和苟芸慧等，陳芷菁和崔建邦任司儀。

「有上網投自己」

李寶安、曾勵珍和余詠珊等高層坐主家席，在停車場食盆菜，大風又寒冷，女藝員都着得密實，穿運動衫的候選視后徐子珊在胸前掛上彩帶，還拿着大聲公走勻每枱拉票，大叫：「請大家投8徐子珊」，見到志偉更飛撲上前拉票。當梁乃鵬跟志偉握手時，志偉即識做地拉她跟梁乃鵬合照。子珊表示彩帶是fans設計，問會否向梁乃鵬拉票？子珊坦言：「我會，我好大膽，唔怕醜，叫同事上網投我。」記者取笑她面皮厚，子珊說：「難得有呢啲機會，自己唔介意，拉票不惜工本好似區議員。」對於周潤發支持楊怡，子珊強調：「唔係，我睇過報道，播《雷霆》發哥唔喺香港。」

■面對香港電視來勢洶洶，梁乃鵬、李寶安率兩千無綫職藝員食盆菜，穩定軍心。

子珊在本報的普選視后走勢，前日首天排第二位輸給佘詩曼，她說：「我有睇，有上網投自己，輸畀阿佘好正常，心甘命抵。」不過，昨晚子珊已跌至第三位，被鍾嘉欣爬頭，昨日子珊到旺角出席禁毒活動時說：「會努力拉票，其他都係前輩，我落後於任何人都係正常。」林峯支持免費電視台發牌？子珊唱反調：「香港市場唔係好大，太多電視台造成惡性競爭，影響公司同藝人收入，希望政府發牌審慎。」
梁乃鵬在台上致辭時坦言重視每個員工，亦不怕電視戰。談到王維基，不禁揶揄：「大家知唔知03年佢經營過收費電視台，有冇人睇過？做得出唔出色？王維基講過無綫冇創意，但幫佢做宣傳都係無綫前同事。」

梁乃鵬寸王維基

梁乃鵬質疑王維基能否在明年製作到承諾的650小時劇集，又強調無綫不是怕競爭，因會越來越強。主席講得激昂，但台下的職藝員只掛住吃盆菜。昨晚花多少錢？梁乃鵬謂錢不重要，又謂不是要穩定軍心，而是給員工鼓勵。甘草白茵在無綫服務34年，獲梁乃鵬頒退休獎。

採訪：楊潔雯、何慧斯、張俊銘
攝影：葉君海

花絮–志偉：無綫好溫暖

曾志偉在盆菜宴上力撐無綫：「我可以代表大部份員工講，今日嘅TVB係非常有希望，好多嘢改變中，早兩年大家提到TVB頭擰擰，今日就完全唔同晒，高層肯接受意見，台灣雖然多電視台，但好多得一、兩層樓高，但我返公司好多同事打招呼好溫暖好開心，嚟緊相信TVB係一間好團結公司。」

花絮：陳豪撐硬陳茵媺

陳豪和胡杏兒在盆菜宴上做了佈景板，被員工拉着合照，他坦言自己不會拉票。對於女友陳茵媺投票撐他，陳豪甜笑說：「我都有投佢，女主角同女配角都有，我係徇私。」對於梁乃鵬向王維基宣戰，陳豪說：「自己向來以和為貴，個人同公司睇嘅層面唔同，大圍環境更上一層樓，良性競爭。」胡杏兒則說：「晚會應搞多啲培養歸屬感，自己支持發牌，但政府要諗清楚發幾多個牌同做幾耐。」

花絮：陳國邦贊成發牌

憑演出無綫劇《大太監》「三順」一角而備受讚賞的陳國邦（左），昨日在旺角及尖沙嘴鬧市為《大》劇拉票，前日他出席商台節目分享會時，與香港電視的王維基密密斟，問到是否拉攏過檔？陳國邦說：「冇，拉攏係年幾前嘅事，王生之前有睇我個舞台劇，我哋主要講個劇。」陳國邦稱現時與無綫仍有合約，沒有離心。是否贊成發牌？他說：「有競爭一定有進步，任何行業都係，TVB喺香港係最強、最大，但我唔想公開批評，前年我同珍姐（曾勵珍）傾約，私下先會同佢提出意見。」