楊梓瑤先斬後奏：我父母好易氹
「浸大E神」楊梓瑤（Carol）去年推出超激話題寫真，可謂要「過五關、斬六將」，除了要衝破心理關口外，對家人更要「先斬後奏」，令親情一度備受考驗，幸最終都能雨過天青。
口述：楊梓瑤 筆錄：專案組
我同屋企人關係向來唔錯，只係入行後真係少咗同佢哋見面傾偈。入行後，有次試過日頭返學，放學返屋企食完飯後，凌晨又要出去拍嘢，一拍就拍到第二日下晝或夜晚先返，好似冇見過父母咁，佢哋都有怨言，因為佢哋唔清楚呢行運作。
雖然父母冇特別反對我入行，但起初亦唔算好支持，就算去年出寫真集，我都係「先斬後奏」，嗰時我未決定話要影時，已經有報道話我會影，屋企人見到段報道就已經鬧我，事後要費唇舌解釋好耐。
我明白好多父母都想仔女讀完大學後做律師或者醫生，其實行行出狀元，就算我喺呢行發展都可以有好成績，最緊要對佢哋作出承諾，畀佢哋知道我會做到佳績，咁佢哋亦會安心。
拍戲豁出去
好似我依家拍戲，乜嘢角色我都冇所謂，就算扮醜女都OK，最緊要係投入角色，況且個角色唔代表係你本人，演戲唔可以顧慮太多。講到底，其實我父母好易氹，出糧我會畀家用，呢啲應分嘛！同埋早排佢哋去旅行，我都有份資助，一家人相處最緊要坦誠相對。
楊梓瑤推出寫真集時，曾被父母責備。
Carol認為一家人相處最緊要坦誠相對。
Carol要學業事業兩兼顧，因而甚少時間與父母相處。
全站熱搜
留言列表
{{ article.title }}
