自從《東周網》成立後，除了狂送戲飛、禮物益網友外，亦舉行了連場「明星飯局」，提供網友一個親近偶像的機會，有得食、有得玩，仲有得同索女明星同枱共餐，難怪每次都吸引逾千網民報名參加！ 《東周網》見反應踴躍，當然再接再厲，於早前邀請了人氣o靚模組合Mi55與五位男網友在銅鑼灣的「台灣一品花雕雞」共聚。美色當前，猛男為表現出勇猛一面，無懼見血，在釘枱上出力拗手瓜晒肌肉，五位索女眼見「肉隨釘枱上」，都緊張得咬牙切齒、俯身尖叫、錫fans錫到出晒面，真係恨死隔籬咯！ Mi55眼見兩位男粉絲出盡氣力拗手瓜，在旁做啦啦隊，又嗌又叫，緊張得咬牙切齒。 新成員登場 向華強兩位姪兒向展邦與向展威，在去年底成立M.SPY模特兒公司後，於今年精挑了五位索女Olivia、Vivian、Cherrie、Jumbo及Easter組成Mi55組合，推出寫真集闖娛圈。由於Mi55形式仿效日本的Morning娘，事先張揚會有換人制度，今次的「明星飯局」，隊長Olivia便帶了兩位新成員Lasheeta及Jelly到場，讓她們見見世面，Olivia透露：「Jumbo去選『中國小姐』贏咗香港區嘅三料冠軍，而Easter因為另有發展，所以離咗隊，新成員Lasheeta同Jelly都係由Mi55 fans投票選出嚟嘅新人！」 話晒Mi55五位成員都美貌與身材並重，男粉絲的質素都絕對有番咁上下！當索女遇上猛男時，即時雞啄唔斷，顯得分外投契。 而面對一班美女，男粉絲當然亦要把握機會展示一下勇猛的一面，於是乎就在擺滿釘子的枱上拗手瓜；為了避免發生流血事件，兼且要維護面子，各猛男均出盡渾身勁力，誓要拗贏對方，難為站在釘枱後的Mi55緊張得咬牙切齒，一見到某一方落後，正要「肉隨釘枱上」之際，五女均俯身尖叫，嗌得肉緊又銷魂，男粉絲們眼見偶像如此緊張自己，就算輸都抵番晒喇！ 隊長Olivia（前左）及Vivian（前右）試玩啜橡筋糖遊戲，兩人同一時間擺出挺胸收腹的動作，意態撩人。 Jelly與「港版阿Rain」啜糖啜出真感情，四目交投，情深款款，呢一刻真係好難扮到出嚟o架。 雖然Jelly跟「阿Rain」玩啜糖未分勝負，但Jelly卻親餵對方食糖，相信對男粉絲來說，比起任何獎項、禮物更有鼓勵作用。
