唐貝詩四面楚歌 政黨插埋一份

唐貝詩「盆景貓」事件愈鬧愈大，昨日自由黨寵物權益關注組發出聲明，強烈譴責唐貝詩，要求她公開道歉；而唐貝詩昨在微博上留言：「接受不能改變的，改變不能接受的。」似仍然不肯認錯，寇鴻萍亦指女兒最嬲別人誤解她。

唐貝詩對於連日遭聲討，仍心有不忿。（資料圖片）

唐貝詩揚言訂購「盆景貓」，連日來飽受圍插，除了一班藝人口誅筆伐、網民惡搞「盆景詩」外，連政治團體昨日亦加入戰團，要求唐貝詩公開道歉。

自由黨寵物權益關注組的副召集人方國珊指：「盆景貓係絕對不人道，如市民考慮將動物咁樣對待，佢自己對生命嘅價值觀好有問題，呢件事唔係針對人，希望去諗呢樣嘢嘅人去反省。（之前佢喺微博道咗歉？）我哋對事件好震驚，公眾人物包括唐小姐在內，一言一行都要尊重，否則會帶動青年壞影響。」

寇鴻萍揚言等唐貝詩考完試後，要她公開大道歉。

力撐愛女錫貓

寇鴻萍昨對女兒再受批評感無奈，她形容兩個女也是愛貓之人，家中飼養兩頭流浪貓「花花」和「雪雪」經已十年，希望該政治團體作出譴責之前先調查清楚，她說：「兩個女好錫兩隻貓，同貓一齊成長，又點會虐貓？我自己都好愛護動物和愛護生命，判案都要查案先，歡迎佢哋嚟我屋企睇貓。」

問會否再叫阿女道歉？她語帶無奈地說：「我依家都未能直接聯絡到佢，係咪道歉一百次就接受？做阿媽嘅一定會叫佢道歉同唔好再講呢件事，每個人處事方法唔同，佢已經道歉，意圖唔係虐貓，係用錯方式去表達黑色幽默，希望調查清楚。」對於寇鴻萍希望組織到訪她家睇貓，方國珊沒有正面回應，只稱若沒有養盆景貓是一件好事。

時裝設計師何國鉦再次批評唐貝詩散布不良訊息，教壞細路。

留言不肯認錯

事件主角唐貝詩昨續在微博上留言：「接受不能改變的，改變不能接受的。」似仍然不肯認錯。寇鴻萍昨凌晨接受新城訪問時，稱前日收到女兒的留言，內容為：「唔覺得要退縮，要勇敢面對呢件事，係要話畀所有人聽我嘅意圖，用另一個諷刺方法，話畀大家聽唔可以虐待小動物。」寇鴻萍希望引導女兒改過，她說：「我會管教佢，希望佢去理解人嘅想法，唔好覺得自己啱就唔理人，佢仲喺度嬲緊啲人唔明白佢，等佢考完試後，我要佢公開大道歉。」

前晚本地時裝設計師何國鉦出席Louis Vuitton活動時，再次批評唐貝詩，直斥她在微博散布不良訊息，是教壞細路，又斥寇鴻萍愈幫愈忙，他說：「依家好多人都多謝我，話我幫佢教女。」

袁彌明嘆娛圈一沉百踩

唐貝詩揚言訂購「盆景貓」惹來全城不滿， 不過昨日微博就出現不少力撐言論，當中袁彌明以一沉百踩形容事件：「香港人連事實真偽都不去追尋就罵，一沉百踩，娛樂圈定律！」而施念慈男友Alex亦有力撐，卻換來被留言攻擊的命運，最終自己要剷走所有言論，他說：「我比不上衞道之士運用幾十萬粉絲攻擊一個人，我不需天下人知。」

袁彌明（左）戥唐貝詩遭一沉百踩不忿。（資料圖片）

另邊廂，仍有不少藝人繼續「聲討」，歌手可嵐、洪杰前晚出席音樂會時，可嵐說：「唔可以用貓狗生命開玩笑！」而洪杰認為：「我覺得盆景貓真假亦好，都要學識尊重生命！」

可嵐直斥唐貝詩：「唔可以用貓狗生命開玩笑！」

唐貝詩受各界圍攻，其好友羽翹對她不離不棄，連日二人亦有透過網絡聯絡，羽翹稱好友身在英國，她說：「佢都OK嘅，咁心情梗係有啲唔好！如果公開道歉一次可以平息件事，我都會支持佢！」羽翹又認為各界對唐貝詩批評言論已去到人身攻擊地步。

指摘似抽水

唐貝詩連日來遭網民及群星圍插，事件愈鬧愈大，理工大學應用社會科學系副教授何國良表示，事件不涉及網上欺凌：「網上嘅特色係可以肆無忌憚咁講意見，件事喺網上發生就喺網上解決，明星指摘喺道德上冇錯，不過講得唔好聽係抽水，如果佢哋關心動物權益應該平日做多啲。唐貝詩覺得貓喺樽入面可愛，啲網民將唐貝詩放入樽嘅圖片，可能佢都覺得得意，等佢喺另一角度睇番自己。」

左起：裕美、洪杰、可嵐及文恩澄齊齊出席動物音樂會。