周星馳大企劃：星爺笑死你50 102,559 
《少林足球》
周星馳新片《西遊．降魔篇》今日終於面世，雖則電影有舒淇、羅志祥放笑彈，但冇星爺演出始終爭咁啲，就好似海鮮宴冇鮑魚一樣，略嫌美中不足。畢竟大家都係睇星爺電影大，當中嘅經典gag你同我都背得出。本報娛樂版嚴選50個星爺經典笑位，等大家緬懷一下快樂回憶，讀者亦可以上網站http://campaign.appledaily.com/stephen-chow-films，投票選出自己心目中嘅經典笑位。
撰文：蘇芬妮
No.1《少林足球》——卡拉OK
每次聽大師兄（黃一飛）同五師弟（星爺）震住音唱：「少林功夫勁，係好近（勁）！」總會失控喪笑，星爺頂唔順邊拍邊笑入晒鏡。少林功夫crossover卡拉OK？邊個話唔work㗎！
No.2《國產凌凌漆》——太陽能電筒
文西（羅家英）係偉大發明家，其有光先着、冇光絕對唔會着嘅太陽能電筒，創意誠意滿分。當然仲有將西瓜刀、火藥、硫酸綁埋一齊嘅攞你命三千，殺不死你都笑得死你。
No.3《家有囍事》——喪心病狂
邊個話星爺冇演技？佢演繹「無定向喪心病狂間歇性全身機能失調症」病徵為之一絕，尤其扮精神分裂，一路叫：「邊個淫蕩呀你淫蕩！」一路歇斯底里自摑，正到喊。
No.4《唐伯虎點秋香》——粗口對聯
唐伯虎（星爺）同對穿祥（谷德昭）攜手炮製家庭篇對聯，工整得來粗口兼備，唐伯虎一句有尾音嘅「你老母兮親下廚」，搞到對穿祥喺鏡頭前狂噴十九幾両血。
No.5《逃學威龍》——曾Sir記性
「哥士的王子」曾Sir扮演冇記性化學老師，不停將周星星（星爺）同黃小龜（黃一山）撈亂，輕描淡寫嘅演繹令人會心發笑。好懷念曾Sir呢。
No.6《賭俠》——五條煙
「各位觀眾，五條煙！」星仔初會陳刀仔（劉德華），例牌晒料拋窒對方，其間喺達叔身上抽出五條香煙，嗰副懶認真同得戚樣，華仔真心拍手笑鳥。
No.7《食神》——瀨尿牛丸
基哥（李兆基）叫手下講：「爭咩吖，溝埋嚟做瀨尿牛丸吖笨！」八両金印身印勢，林雪背錯對白，然後輪到星爺開聲露餡，都係衰把聲太yap。
No.8《整蠱專家》——誠實豆沙包
整蠱之霸（程東）出動誠實豆沙包對付星爺，搞到星爺一輪嘴話：「袁木好誠實，李鵬係最偉大領袖。」原來拎錯謊言豆沙包。
No.9《少林足球》——醬爆登場
天生異稟骨骼精奇嘅醬爆（何文輝），見星爺唱山歌，不禁燃起心中一團火，如同痙攣般扭動佢副火柴身軀，所以話毒男都有發光發熱嘅moment。
No.10《食神》——情與義
雞姐（莫文蔚）空手入白刃幫星爺擋刀，成手血淋淋，仲面不改容、哨住牙咁唱出「情與義，值千金」，何其壯烈，弊在星爺見到佢副尊容唔領情囉。
No.11《國產凌凌漆》——打靶戲份
呢幕槍斃戲寸盡內地法治，先屈盲人黃一飛偷睇國家機密；然後有死囚鄧兆尊撻老竇係局長求情；最經典都係阿漆（星爺）用一百蚊賄賂公安古明華才可甩身。
No.12《新精武門1991》——召妓劉晶
劉晶（星爺）初來港，俾瀟灑哥（鍾鎮濤）老點去咗光顧妓女吹瀟萍。嫖客聽完劉晶自我介紹即刻話：「嘩！你急成咁，我讓你先！」睇一次笑一次。
No.13《西遊記月光寶盒》——菩提老祖
劉鎮偉導演本身就係喜劇好材料，佢演嘅菩提老祖超爆笑。至尊寶（星爺）以為佢偷走葡提子喪鬧：「你偷咗我抽葡提子，仲提我老母？」食字食到盡。
No.14《大內密探零零發》——紫禁之巔
古龍筆下四大高手決戰紫禁之巔，俾零零發（星爺）控告非法集會，零零發蛋散前蛋散後，又出靈犀一指，將四大高手侮辱得體無完膚。
No.15《九品芝麻官》——舌戰公公
包龍星（星爺）審理秦蓮（張敏）冤案，俾監場嘅李連英（劉洵）阻撓，於是一輪嘴喪鬧公公：「你周身籮油印，抵你插住碌棍。」將公公激到嘔血。
No.16《國產凌凌漆》——蠱惑的槍
「試鎗做乜唔同我講啫！」阿琴（袁詠儀）千方百計暗殺阿漆，兩次從後偷襲都誤傷自己，就係衰喺支梅花間竹向後射完再向前射嘅蠱惑的槍上。
No.17《整蠱專家》——跳騎呢舞
如何落Disco而不失霸氣？不妨學吓古晶（星爺）。佢為博靚女Banana（邱淑貞）一笑，上舞池跳出苦練多年嘅沙里洪巴嘿唷嘿民族舞，全場人靜晒。
No.18《喜劇之王》——甜筒輝
甜筒輝（鄭文輝）港大畢業冇嘢撈，學人行蠱惑，拎住甜筒喺天后廟前收陀地，睇佢臨尾擸兩把菜刀攞尾彩個可憐樣，連基哥（李兆基）都怕咗佢。
No.19《回魂夜》——道友明
電影最強角色唔係女鬼係道友明（陳永標）。佢充當肉盾身中多刀、被割脈、觸電又中幾槍，但都死唔去，唔怪得話：「好心了結我生命，等我唔使再受苦。」
No.20《喜劇之王》——外賣仔
尹天仇（星爺）做臥底扮送外賣，結果俾黑幫拋窒，有人問佢早餐都可以加底？佢就答：「咁你加兩條腸都得嘅。」貫徹無厘頭風格。
No.21《大內密探零零發》——阿發外父
電影末段突然加插頒獎禮，零零發坐定粒六以為穩奪最佳男主角，得主卻原來係阿發外父（潘恒生），致辭嗰陣仲重新演繹踢爆阿發入雞竇嗰段戲。
No.22《賭俠》——錄影片段
星仔拍片拜賭神為師，話自己有特異功能，只要將手上隻煙士捽一捽，就變成巢咗嘅煙士，因為未發功喎，結果換嚟陳刀仔一句「發神經」。
No.23《賭聖》——餵飽綺夢
達哥要吳君如扮綺夢嚟刺激星爺恢復特異功能，星爺當正君如格肋底粒痣係綺夢，一時同佢談心，一時幫佢抹汗，仲餵埋佢食龍蝦，口味重到呢。
No.24《國產凌凌漆》——鬚刨傍身
阿漆「笨」唔係浪得虛名，佢身上嘅大哥大同風筒，實際上係鬚刨嚟；至於鬚刨同對皮鞋只不過係表面掩飾，實際上都係風筒嚟，問你死未。
No.25《賭聖》——三叔
達哥一聽三叔就失控，向身邊人up吓up吓，暗戀達哥嘅盧宛茵春心大動，打出砧板心口色誘對方，最後要低頭謝罪。
No.26《新精武門1991》——打劫貞操
劉晶拎住張「我要你的處女貞操」紙條打劫銀行，全行得九號窗肥妹（羅雪玲）有，最抵死係肥妹飛出櫃台，將劉晶狠狠推倒。
No.27《西遊記月光寶盒》——踩細佬
至尊寶成身着火，二當家（吳孟達）見勢色唔對，即時對準佢「弟弟」博命狂踩撲火，如同將多年冤屈氣一鋪同佢算。
No.28《賭俠II之上海灘賭聖》——殺死丁力
川島芳子（黃韻詩）命令星仔殺丁力，仲教佢用催眠方式嚟憎恨丁力。只見川島咬牙切齒話「我要殺死丁力呢條仆街」個衰樣，真係好唔開胃。
No.29《食神》——夢遺啜毒
星爺意外碌落山，且被荊棘所傷，全身中毒。醒來發現少林寺方丈夢遺大師（劉以達）爬上床，以啜毒為由有所異動，結果俾星爺一腳兜開，結下深仇。
No.30《少林足球》——汽車維修員
正職做編劇嘅馮勉恆，扮斯文敗類冇得輸，喺電影演汽車維修員嘅佢，同少林隊踢友賽，跌士巴拿仍不慌不忙，之後仲要黃一飛將底褲笠落頭，賤到出汁。
No.31《食神》——十八銅人陣
少林寺十八銅人陣，查實只得十二人，個個搽晒金粉餅，惡形惡相。每當星爺偷走，銅人陣即時築起，前面的作勢耍拳做屏風，後面就用摺凳狂揪星爺。
No.32《國產凌凌漆》——鹹帶療傷
古時有關公捉象棋刮骨療毒，今日有阿漆睇鹹帶鑿骨攞彈頭，仲將全身血液谷埋一處，以免失血過多。有網友居然搵到鹹帶女主角條片，有seed有真相。
No.33《國產凌凌漆》——陀地中伏
李健仁扮女人梗係起晒朵啦！佢扮包租婆可以話係風韻猶存，一幕突然踎底幫阿漆除褲，表明自己係陀地，百五蚊全套喎，即被一腳兜出麗晶賓館。
No.34《家有囍事》——反轉鐵塔
星爺同張曼玉學《人鬼情未了》橋段玩陶瓷，睇星爺着條超窄牛仔褲已爆笑，之後兩人喺跳線版《Unchained Melody》下，嚟個巴黎鐵塔反轉再反轉，浪漫到暈。
No.35《唐伯虎點秋香》——敲碟鳴冤
唐伯虎俾仇家華夫人（鄭佩佩）發現身上有《唐寅詩集》，隨即rap出押韻嘅唐伯虎惡行，配合強勁節奏感嘅敲碗敲碟，創作力有如多春魚嘅春一樣咁澎湃。
No.36《逃學威龍》——怒掟粉刷
星爺重返校園做臥底，終日魂遊太虛，日日俾苑瓊丹用粉刷侍候。日子有功，星爺練成掟粉刷絕技，片尾用善良的槍掟張耀揚，將其制服。
No.37《唐伯虎點秋香》——燒雞翼
邊首歌去BBQ一定會唱？答案係「燒雞翼，我鍾意食，但係你老母講你就快釘。」唐伯虎夾埋阿媽（朱咪咪）扮病推辭寧王邀請，情急下唔啱音都照唱。
No.38《回魂夜》——牛眼淚
Leon（星爺）教盧雄等保安搽牛眼淚見鬼，成班烏合之眾拎住支李斯德林猛咁搽，鬼就撞唔到，但發現紅衣索女，眾人摸胸扮check心跳博懵。
No.39《大內密探零零發》——解剖ET
當年解剖外星人大熱，電影也來個解剖天外飛仙，扮成外星人的張達明被谷德昭斬了一刀，登時在解剖床上彈跳，效果極其爆笑。
No.40《唐伯虎點秋香》——人體繪畫
唐伯虎用祝枝山（陳百祥）軀體畫出雄鷹展翅氣吞天下圖，胸前兩點作花、雙掌作樹、屁股作石，仲出動對方子孫根畫出雄鷹——嘴擔住嘅蟲仔咋！
No.41《唐伯虎點秋香》——還原靚靚拳
秋香（鞏俐）中了奪命書生（劉家輝）的面目全非腳，變得奇醜，唐伯虎即時使出失傳嘅還原靚靚拳幫拖，仲意外令秋香多咗個靚靚下巴仔㖭！
No.42《賭俠》——焚身以火
星爺用特異功能催眠大軍（程東），令其墮進幻境，穿上大紅袍嘅大軍，忘我演繹一幕焚身以火，造手呀、姿色呀，比《秦俑》入面嘅鞏俐更淒美。
No.43《整蠱專家》——我要努力向上
90年代班後生仔幾有幹勁，好似星爺同華仔咁，無啦啦喺灣仔碼頭高歌「我要努力向上」，西裝友一呼百應，今時今日唔知仲有冇呢支歌仔唱呢？
No.44《唐伯虎點秋香》——小強葬身
唐伯虎為求混入華府，同賣身漢（梁榮忠）鬥慘，仲揸住隻死曱甴話：「我當你係親生骨肉咁供書教學！」交足晒戲。小強成為曱甴代名詞。
No.45《新精武門1991》——口水戰
瀟灑哥（鍾鎮濤）同劉晶（星爺）不打不相識，以小學雞口水戰交手。兩人神色凝重咁擺出架勢，又搵cover做掩護上膛，向黃飛鴻系列同警匪片致敬。
No.46《鹿鼎記》——化骨綿掌
海公公（吳孟達）被神龍刺刺中走火入魔，不斷重複韋小寶（星爺）對話同動作。韋小寶見狀即誘對方解化骨綿掌毒，點知海公公話：「解你條啫！」
No.47《賭俠II之上海灘賭聖》——叉燒包
星仔以為如仙（鞏俐）未訂婚，即場唱咗首徐小鳳版《叉燒包》贈興，又拎住籠包掟嚟掟去，周大福（吳孟達）就用痰罐跳士的舞，一片喜氣洋洋。
No.48《大內密探零零發》——無相神功
無相王個仔（袁信義）雖然識移形換影嘅變臉大法，黑白無常輪流轉，但次次俾零零發擊中：「喂大哥，你大對腳喺下邊穿晒崩喎，當我死㗎？」
No.49《功夫》——邪門刀仔
阿漆嘅小李飛刀就叻，但《功夫》入面嘅星爺就好唔掂。佢用飛刀暗殺包租婆（元秋），但反彈掟中自己。輪到肥仔聰試掟又誤中副車，認真慘情。
No.50《算死草》——股罅藏髀
何歡（葛民輝）被判環首死刑，臨上刑場前，特登將暗藏屁股入面嘅雞髀贈予印度庭警Van Dam。Van Dam見雞髀即放在鼻前使勁一索，色香味俱全。
留言列表
{{ article.title }}
