娛樂八掛大放送★

糖妹是我小時候：糖妹甩骹馬騮 7,173 


■放假時，父母會帶糖妹遊山玩水，而且媽媽最愛為她影相留下回憶。

二人組合糖兄妹的糖妹（黃山怡），童年時眼仔睩睩，着起裙仔束起辮仔，天真又美麗。但她其實是百厭星一名，男仔頭性格跟表哥狂打機。糖妹試過在扶手電梯玩，被母親扯起來，慘被扯甩手骹；而她又太不懂留力，又扯甩細佬手骹。撰文：王連連

糖妹入行初已被指樣貌似陳慧嫻，她童年時眼仔睩睩、五官端正，自言性格男仔頭又百厭的糖妹說：「細個爸爸、媽媽要返工，通常都係外婆湊我，喺屋企就會多數同表哥玩，跟住表哥打機，有時佢會將我個人倒轉咗，不斷轉我㗎。」

百厭真的會累事，因為天生跳跳紮，就經常會出小意外，糖妹說：「我都幾曳㗎！試過去超級巿場喺手推車跌落地，又試過喺電梯掛住玩，阿媽一手扯住我，點知佢太粗暴喇！就扯斷我隻手，唔知係咪有遺傳，後來細佬出世，我照顧佢時都試過扯甩細佬手骹。」

■精靈活潑，而且男仔頭的糖妹，特別百厭好動。 

■每年的學生相也會儲下來，糖妹愛看自己樣子的變化。 扭計匿埋嚇外婆

糖妹小時候與外婆生活的時間很多，有很多二人相處的回憶點滴，但間中也會令外婆很生氣，她說：「讀幼稚園時，外婆帶我去遊樂場玩，點知我唔肯走，扭計幾個鐘，仲要匿埋，搞到外婆好驚，之後返屋企喊，當然一定要打我啦！亦都試過遇火燭，阿姨當時抱住我走，我好記得自己驚唔見對拖鞋，仲放對拖鞋喺我阿姨個胸度。」自從升上小學，糖妹便與父母同住，她形容當日離開外婆最不開心：「同外婆感情太好，佢好錫我㗎，當日搬走喊足一日，不過其實搬得好近。」

■糖妹與母親參觀花展，拍攝前剛頑皮了，被痛罵後喊爆，難怪嘴扁扁。 

■糖妹只有一個弟弟（右），對他十分愛錫。 

■喜歡唱歌的糖妹，讀書時經常爭取機會在公開場合表演。

■19歲的糖妹已經剪劉海，髮型跟現在沒大變化。 

■糖妹在剛過去的頒獎禮成績不錯，總算站穩陣腳。