探熱針
老表，亂買嘢！ 王祖藍炒工廈得個桔
自編自演劇集《老表，你好嘢！》掂咗，再度當旺的王祖藍人逢喜事，打算一擲千萬買地起屋迎娶女友李亞男。
以為「藍男戀」可以攞牌搞嘢，點知王祖藍因為誤信消息，跟風炒賣工廈幾乎蝕大本。一朝被蛇咬，王祖藍根本唔敢再入市，更何況買地起屋咁大件事。
搞笑高手，原來係投資豬兜，李亞男想做王太，仲要等！
10年底祖藍以「忠僕創作有限公司」名義，用 170萬買入新蒲崗六合街萬昌中心一中層單位，只揸半年就忍唔住手，於 11年以 208萬賣出，微賺三十萬，但扣除各樣手續費後係零進賬。傻到咁，估佢唔到！
跟風投資
人人買工廈，張兆輝、陳可辛、甄子丹、古天樂賺到笑，偏偏王祖藍揸工廈得個桔。早在一○年，王祖藍為實踐女友「有物業係結婚條件之一」的要求，決定買磚頭投資保值，為成家立室儲彈藥。
近幾年，市場興炒賣工廈，未做過業主的王祖藍跟風買埋一份，成功在市場狂熱前以一百七十萬筍價，買入新蒲崗萬昌中心一個千呎單位。
投資初哥，膽量同身形成正比，持貨僅半年，王祖藍見坊間不斷傳出樓市即將狂瀉壞消息，唔想老婆本蝕到渣都無，於是無鞋挽屐走將單位急放，最終賬面只微賺三十萬即閃。
葫蘆娃走紅
去年他在《百變大咖秀》扮葫蘆娃爆出，成功開拓內地財路，芒果台春晚亦有份演出。
扮姚明
祖藍做了半年的內地扮 嘢節目《百變大咖秀》，他扮矮版姚明，刻意營造的粗眉細眼，爆笑又神似。
自認戇居
俾人拋窒，王祖藍連基本買賣樓宇知識都無，以為三十萬可以袋袋平安，最後清還銀行按揭、地產佣金、樓契律師費等雜項支出，七除八扣，埋單發現得個桔。早前雖傳他有意花千萬在西貢買地起三層村屋築愛巢，但有過買工廈戇居經驗，王祖藍至今仍有陰影。
重提投資「𤓓事」，王祖藍都忍唔住笑自己戇居。
「睇見個個買工廈都賺到盆滿 鉢滿，我就冇錢落袋，好傷心。如果當日唔係驚跌心急放，今日我個單位已經升到五百幾萬，賺 咗幾倍。鬼叫我乜都唔識就學人買樓，而家身邊好多人都叫我買呢度買 嗰度，我都唔敢亂 嚟，所以點會夠膽買地呢。」
早前傳他為與女友李亞男築定愛巢，擲千萬在西貢買地起村屋，但遭他否認。
甜品鋪損手
投資工廈冇利可圖， 11年開甜品鋪的他亦損手收場，去年初執笠，令他六位數字投資泡湯。
廿五萬一集
投資磚頭冇進賬，王祖藍唯有默默耕耘揸現金儲老婆本。自編自演的電視劇《老表，你好 嘢！》收得，去年內地演出扮 嘢節目《百變大咖秀》，王祖藍扮葫蘆娃亦深受國內老表歡迎，湖南電視台即時加碼續約，王祖藍每集身價由二十萬升至廿五萬一集，更有內地投資者開價廿五萬一集，搵他拍國產劇。
「祖藍鍾意玩承包制，廿五萬一集係包埋做編劇，佢同《老表》班外援編劇組成班底，係有內地投資者同佢 哋傾緊合作。」知情者說。
自編自演試水溫成功，雖然被無 綫編劇圍插搶飯碗，大前提要搵錢娶李亞男的王祖藍，話之你！
投資蝕，但祖藍自編自演的劇集《老表》卻賺到口碑，令他財源滾滾，還帶挈劇中肥妹新人陳嘉佳，鬼妹陳明恩，阿 Bob等賺錢機會。
憑《老表》跑出的鬼妹陳明恩，即刻食住個勢出碟，早前在中環為新歌拍 MV，下週她更孖住肥妹陳嘉佳，組成「 Oh baby」做校園騷。
刀仔鋸大樹
圈中人唔只鍾意買豪宅，工廈一樣啱玩，好似 Beyond成員黃家強跟張兆輝，早買早着數，二人同在 09年投資工廈，刀仔本錢，鋸出發財大樹。
張兆輝 火炭環球工業中心 $180萬（ 09年） $600萬（現巿值）
黃家強 新蒲崗振發工業大廈 $178萬（ 09年） $628萬（現巿值） 
留言列表
{{ article.title }}
