娛樂專訪：張繼聰潮入屋 119,531 
■張繼聰昨日接受專訪時，坦言首次拍劇，即感受到劇集的威力。
【老表你好熱】張繼聰做了歌手8年，在樂壇載浮載沉，更曾被譏諷為窮歌手，等到今日，他終憑劇集《老表，你好嘢！》的配角宋為潮起死回生，出街人人都叫他潮潮，不再只是謝安琪的老公，阿聰事先張揚說：「潮潮係賤男，但唔代表我本人。」
撰文：余燕儀
當年在演藝學院主修表演的張繼聰，黃秋生、梁家輝和謝君豪都是他的師兄，阿聰畢業後卻揀了歌手這條路，可惜他在樂壇8年未嘗名成利就，反而拍無綫劇《老表，你好嘢！》扮宋為潮一角打響名堂，他昨日接受本報專訪時說：「第一次拍劇，真係感受到好多人睇電視，𠵱家出街啲人會叫我潮潮，去茶餐廳老闆會送例湯。」
阿聰為角色花了很多心思，又向品牌借衫拍攝，他說：「自己每次背晒劇本入廠，令我更加佩服郭晉安，佢唔使攞劇本，畀我感覺功力深厚，就算我點放膽演，都走唔出佢嘅五指山。」
■張繼聰在《老表》飾演的潮潮十分鬼馬，大受歡迎。 不卑不亢心態
不過，潮潮最終卻背叛女友晴晴（王菀之），問會否擔心角色賤男破壞歌手形象？他笑說：「𠵱家好多人鬧我：『點解你咁衰，咁對晴晴。』潮潮係賤男，但唔代表我本人，王菀之一邊拍一邊恐嚇我：『你死啦，晴晴咁可愛，你都飛佢，啲人一定鬧你。』我唔擔心啲人鬧我賤男，覺得自己係藥引，大力啲折磨佢，佢先會容易發揮。」
角色的成功，是否令阿聰擺脫謝安琪老公的稱號？他說：「微博開始有人講：『原來謝安琪係你老婆』點稱呼我控制唔到，以前做音樂我好用心，但收成唔成正比，我經歷過好刻薄、尖酸嘅人生攻擊，已經過咗介懷階段，我對自己藝能有一定信心，希望保持不卑不亢心態。」就算以前被踩為窮歌手，阿聰亦不在乎說：「你可以話我窮歌手，但已經比一般人幸福，唔使擔心交唔到租，照顧唔到屋企人，𠵱家唔希望廣告客戶以為我脫咗貧唔搵我做嘢，哈哈！」
為仔出跳舞碟
《老表》的成功，令阿聰又接拍了新劇《食為奴》，但他揚言要繼續出碟，他說：「今年會出國語跳舞專輯，年紀開始大，筋開始硬，過多幾年力不從心，囝囝好鍾意BIGBANG，做仔嘅一定有覺得阿爸好老套嘅階段，自己想做一隻跳舞碟留為紀念，畀佢知阿爸都有型過。」
此外，郭晉安、陳敏之與糖妹昨日在將軍澳出席活動，提到《老表》熱爆，有說王祖藍踩過界創作引起編劇不滿，同劇的安仔力撐祖藍：「有創作係好事，𠵱家收視成功即係佢嘅idea成功咗。」
攝影：陳志嵐
化妝：Pinky Ku
髮型：Jobby of Osmosis hairR
服裝：Kenax Leung
留言列表
{{ article.title }}
