哥哥 Bagel（前）和妹妹 Hazel（後）著慣 Crystal的溫暖牌，著上衫仔後仍活動自如，係表情呆滯咗少少。

寵物家

織隻利是封

2013年01月31日 ~~ 第1195期香港《壹周刊》

主人們呀，做了全年貓奴，係時候輪到貓仔為你們出一分力，在新年期間，娛賓𢭃利是。織冷衫達人 Crystal兩年多前從朋友家中抱來英國短毛貓 Bagel和 Hazel，發覺為貓仔織冷衫，比為愛人織溫暖牌更開心：「會笑到碌地。」
今個農曆年， Crystal決定將愛貓打扮成利是封，紅當蕩做親善大使。為愛貓趕工影靚相， Crystal漏夜密密織。為貓痴為貓狂，希望 Bagel、 Hazel幫手招呼親朋戚友，𢭃多幾封利是買貓糧幫補吓！

愛貓試衫變蛇變 E.T.

貓仔扮鬼扮馬扮利是，加上傻更更眼神，可愛到個個見到爭住影。 Crystal話其實試衫過程仲過癮，買現成衫一定少了這些樂趣。幫自己織或者幫老公織，可能試 2、 3次就得，好少要改。但幫貓仔織冷衫，差不多每織 2、 3吋就要試一次，一唔合身就要拆過再織。「即使織過好多次，但每次所用毛冷彈性和粗幼不同，所織針數亦有分別，所以每次織新衫都要不斷試。」
不斷試不斷改，不是因為手袖唔啱位，就是因為太鬆或太窄。 Crystal話：「貓仔一著衫就好似俾人點穴一樣唔識郁，佢個樣會好無奈好好笑。尋日試件紅衫仔，因為有點窄，套落 Bagel個頭度，佢變到好似 E.T.咁，著上身直頭十足一條肥嘟嘟嘅蛇仔。」下年蛇年，咁咪啱晒囉！

大部分貓仔不愛著衫，搵到機會就除，所以冷衫一定要合身。

為貓仔套上冷衫，未著好時，像 E.T.。冷衫太鬆，貓仔會容易脫下。太緊呢，貓仔就會唔舒服，所以要試到啱為止。

Bagel很為食，為貓糧，竟然做到「請請」動作，今年𢭃利是靠你啦！

Crystal說因為愛貓是英國短毛貓，所以繡上英國旗，與主人的政治立場無關。

買冷心得：當貓仔係 BB

人形同貓形完全唔同，尤其手腳位。所以人仔衫織得幾叻都好，織貓仔衫都要從頭累積經驗。除了不斷試衫， Crystal建議第一次織的話，用兩高兩低針法，令冷衫較有彈性，即使貓仔突然變肥 5磅都著得落。織平針或其他沒有彈性的針法，便要非常合身。另外選擇冷球好重要，最好買可機洗的 BB冷：「當佢係 BB仔就得，千萬不要用纖維粗長的安哥拉羊毛（嚒唏），因為貓會舐毛，很容易把脫下的毛冷纖維吞落肚。」另外，貓仔在冬天也不怕冷，冷衫主要是扮靚娛賓拍照用，影完相，最好讓牠們回復自由身啦。
想看更多 Crystal的作品？可以上 http://www.facebook.com/exquisiteknitting

要 Bagel反串著波浪邊裙仔，一臉無奈。

姣婆紅冷衫加小貓耳，好可愛。

愛貓會望住 Crystal織冷衫，但 Crystal話在家的時候，她一行開，兩隻貓便作反摧殘冷球。

織埋手袖仔，著上身更可愛之餘，貓仔亦較難把冷衫脫下。

Bagel第一件冷衫，手袖位圖案俾佢舐到無晒，所以無須買太貴的冷球。