芝士鮮肉小籠包$30/四個
外皮搓得更薄，注入灌湯汁，用軟滑美國芝士包裹鮮肉蒸熟。流心芝士加上濃郁湯汁，引死人！

庶民飯堂

芝士小籠包彈起

2013年01月31日 ~~ 第1195期香港《壹周刊》

前歌手 Oscar（蕭潤邦）在旺角開設的正宗上海生煎皇，一月底搬到新鋪。兩年前， Oscar飛到上海拜師學整包，回港後開店，雖然鋪面細只做外賣，但人氣高企，日日排長龍。不過無座位，要客人企喺街食包，始終不便。搬新址後，同樣在旺角區，鋪面擴充至八百呎，堂食座位有四十個。地方寬敞了，價錢卻維持在十幾廿蚊，堅持走街坊路線，抵讚。

舊鋪主賣包點，新鋪增加十幾款小食及涼菜，賣埋四川麻辣燙，好賣到各佔生意額三分之一。 Oscar學整包時已心儀的四川麻辣燙，開新鋪前搵到高人傳授秘方，學識用廿幾種藥材和香料熬煮湯底，還用上四川最辣的子彈椒來炒製辣醬，好多客人大讚夠地道，食到上癮。不過最估唔到是新店的招牌包點，竟然由芝士鮮肉小籠包彈起。話說小儀在電視節目中叫 Oscar試做，點知明星朋友食過後紛紛擺上網，催旺人氣。但當時小籠包肉餡內有芝士又有蟹柳，騎騎呢呢， Oscar只敢限量推出。而家新鋪開張， Oscar終於研究好肉餡與芝士比例，一食落就有湯汁與芝士湧出，令人回味無窮。繼皮薄餡靚生煎包後，而家有中西合璧芝士小籠包，淨係獨家原創這點，已值得一試。

上海生煎包$15/兩個
用滑嫩的豬前腿肉做餡，湯汁用豬骨、雞腳來煲，膠質豐富。新店可堂食，包底煎得更脆、皮更薄。最抵讚是新店賣包由兩個起，不似舊店一叫要叫四個。

四川麻辣燙$32（三款配料）
湯底熬足六小時，辣醬用牛油炒過，辣而不油，香味更濃。配料有廿款可選，最抵食是美國肥牛。

土匪雞翼$22（前）、上海炸排骨$22（後）
雞翼香脆，灑上秘製川椒粉，極惹味。炸排骨是駐場上海師傅的拿手之作，另有雞絲粉皮、京汁茄子等小食，不用去上海菜館也吃到。

正宗上海生煎皇
地址：旺角豉油街 72號
電話： 2323 2374
營業時間： 12nn-12mn