鄭伊健蒙嘉慧笑容一致燦爛，兩人在台上披露結婚感受時，齊齊喊到收唔到聲。
娛頭
豪請 40親友見證 鄭伊健蒙嘉慧東京圓婚
去年被本刊踢爆今年一月結婚的鄭伊健，終於履行承諾，給蒙嘉慧一個名分，為留個美好回憶給對方，伊健妥協只將婚禮化繁為簡，並遠渡東京擺西式婚宴，未有大事鋪張。除了鄭氏一家大細，一對新人還豪包四十親友，飛往日本現場見證。
伊健經理人林珊珊向外稱事前不知情，純為伊健不想婚禮受到騷擾。在婚宴上，伊健公開說一聲：「老婆。」蒙嘉慧已經喊到收唔到聲，新郎亦忍唔住落淚，又甜蜜又感人！
林珊珊打骰
拍拖差不多滿七年，蒙嘉慧成功打破「分手咒」，將鄭伊健正式私有化。本週一（一月二十八日），二人在四十親友見證下，於東京一間酒店舉行西式婚宴，攞正牌做鄭太。
今次婚宴，由伊健包起所有賓客使費，包括來回機票及酒店住宿，獲邀出席的，全部是伊健至親好友，合作多年的工作伙伴。
「舊年伊健決定結婚，同 YoYo都拉鋸咗一段時間，伊健怕煩，覺得兩個人開心最緊要，主張唔擺酒，但 YoYo覺得結婚一世人一次，好想留個美好回憶，伊健最後都讓步，聽晒老婆話。」知情者說。
在香港擺酒，容易掛萬漏一，加上二人圈中朋友多，難有合適場地，唔想大龍鳳的伊健決定在外地舉行婚禮，並鎖定他最鍾愛的日本。
「話就話簡簡單單，但搞婚宴始終有好多瑣碎事，加上佢要低調行事，伊健自然交晒俾佢最信任嘅經理人林珊珊代為安排。賓客名單係高度機密，伊健出面邀請嘅賓客，早喺兩個月前已經被通知度期，一月二十八日要出席佢嘅飯局，但個幾星期前，伊健先再通知大家食飯地點，原來喺東京！佢唔講，其實大家都估到啲，亦都好識做，守秘密！」
感動落淚
兩人緊握着手頭貼頭共舞， sweet到爆。
終於圓婚，伊健在微博公布喜訊，鄭太轉發再加兩個心心，難得高調晒甜蜜。
去年尾，二人大方拖手出席錢嘉樂及湯盈盈婚禮，伊健亦對結婚改口風：「結一定話你哋知。」
婚宴共開七席，主家席有鄭生鄭太、伊健父母，而與伊健共事過的新舊員工亦有被請，反而未有請圈中人。
林珊珊一家與伊健感情要好，經常舉家出席活動撐伊健，今次婚宴請客更由珊珊發辦。
近年伊健媽咪要撐枴杖出入，即使行動不便，亦遠赴日本飲新抱茶。
三日兩夜百五萬
鄭伊健、蒙嘉慧越洋到東京舉行婚禮，一對新人連家人、好友共 42人，包來回機票、酒店住宿，連同西式酒席，花費近 150萬。
機票（來回）：
新郎新娘、家人（商務客位）：$23130× 15人= 34萬 6,950元
賓客（經濟客位）：$5390× 27人= 14萬 5,530元
賓客專車接送： 2萬
酒席（西餐）：每位$1500× 42位= 6萬 3千元
酒店住宿（兩晚）（新郎新娘蜜月套房） 1萬 6千元
賓客住宿： 12萬
場地布置： 30萬
定情熊 Bear Bear： 10萬
結婚蛋糕： 2萬
新郎新娘禮服： 20萬
化妝、整頭： 6萬
雜項： 10萬
共支出： 149萬 1,480元
嗌老婆就喊
有份見證婚禮的四十位親友，除了伊健父母，林珊珊及老公 Michael Chan，大部分是伊健多年的合作夥伴，至於好兄弟林曉峰、陳光榮，亦有獲邀。
「同伊健合作開嘅一班手足都被邀出席，珊珊經理人公司員工更加全數到齊，而 YoYo亦有請佢以前個經理人 Ali Tang，全部都係自己人！」
婚宴上，鄭太穿上黑色晚裝，與西裝筆挺的伊健襯到絕，兩人亦有上台，自爆相識過程與經歷。
「 YoYo開聲講第一句，已經感動到喊晒，根本講唔到落去，伊健即刻攬一攬佢，到伊健講感受，估唔到佢亦忍唔住講兩句就喊，之後伊健嗌 YoYo做老婆，新娘就喊得更加厲害，班兄弟又大嗌 YoYo做阿嫂，氣氛好感動，又浪漫！」知情者說。
12月
去年十二月，伊健 YoYo再到日本旅行睇場地，今次他們選擇過二人世界。
一年去三次
戴上伊健送的戒指，蒙嘉慧又怕被記者發現，一直插着褲袋，直至上車時扣上安全帶，才不慎被發現。
3月
伊健鍾情日本，去年三月，二人到日本旅行已有計劃在此結婚，蒙嘉慧在微博上載個人照片，笑容甜到漏。
11月
去年十一月，伊健帶同父母與蒙嘉慧到日本為婚宴試菜，回港時二人分頭出閘。
回禮送布熊
自從決定做老襯，伊健對女友亦唔再避忌，出席老友錢嘉樂、湯盈盈婚宴，兩人公開手拖手。堅持婚禮低調唔大搞，但給賓客的回禮，伊健就交給老婆做決定。
日本註冊認可
二○○○年沈嘉偉邱淑貞亦在日本結婚。
不少香港人愛旅行註冊結婚，熱門地點首選手續較簡單的賭城拉斯維加斯。至於伊健 YoYo至愛的日本，手續絕不簡單。
熟悉日本法律的大律師林沙文表示，香港人在日本註冊結婚，是具有法律效力。準新人先要照日本戶籍法，到市役所登記註冊，遞交護照、出生證明及翻譯文件。
「根據日本民法《婚姻之要點》，男性滿 18歲，女性 16歲，便可在日本結婚，結婚時要兩個成年人見證。」成婚後，市役所會發出日本政府承認的「婚姻受理證明書」，新婚夫婦返港後需要將「婚姻受理證明書」翻譯成英文，連同有效的個人證明文件，於三個月內向香港日本國總領事館申請一份翻譯證明。
「攞到呢份翻譯證明書，就可以同婚姻登記處登記，確認有夫妻身份。」日本國總領事館人員透露。
現時並非所有國家均接受香港人註冊結婚，例如荷蘭、南韓要求結婚雙方其中一人為國民，才有資格在當地註冊，至於美國、意大利部分地區，以及新西蘭、瑞士等地，均接受香港人在當地結婚。
「伊健搵人特別設計一對熊啤啤送俾到場嘅賓客，啤啤熊隻腳仲印有代表 Ekin同 YoYo嘅 EY英文字母。熊女戴咗頭紗，代表住二人圓婚，好 sweet！」
當伊健決定好今次的婚宴場地，前後飛了東京兩次睇場試菜。
「雖然有林珊珊做搞手，但伊健都好緊張，舊年十一月同十二月，連續兩個月都有飛過東京，十一月嗰次仲同埋屋企人過去，一齊睇場地，先再拍板喺呢間古堡式酒店舉行婚宴！」伊健好友說。
舊愛結婚，邵美琪有傳今年三月跟男友施祖男拉埋天窗，她大方祝福舊愛：「祝佢哋幸福快樂。」（《蘋果日報》圖片）
今年中，穿婚紗出席鑽飾活動，不停被追問婚期的她因未得伊健首肯，死撐話唔恨嫁。
另一舊愛梁詠琪搶閘在一一年與西班牙籍的 Sergio結婚，各人終於覓得自己所愛。
今年八月在紅館開騷，當年《古惑仔》電影系列的演員上台做嘉賓，個個向伊健催婚，小春還說：「快啲俾番個名分人啦！」
提早送婚戒
一直恨做麵嫂的 YoYo，由去年八月被踢爆今年結婚後，一直守口如瓶，直至準新郎在演唱會慶功公開承認婚訊，她才放膽開腔講多幾句。
「舊年十一月，伊健同 YoYo去東京睇場地，伊健已經送咗隻結婚戒指俾 YoYo， YoYo開心到喊，一直戴住喺手，返到香港機場，怕俾傳媒見到，遮遮掩掩將隻手插喺袋，但佢點都唔捨得除低！呢個幾月，身邊朋友見到佢，都 feel到 YoYo有幾開心。」
在東京圓婚，伊健返港後將馬上投入工作，週六（二月二日）會與同樣家有喜事，將為人父的老友陳小春，一齊在澳門出席記者會。
七年修來一紙婚書
45歲的伊健， 06年與現年 39歲 YoYo結伴打羽毛球譜出「蒙麵戀」，同年十月， YoYo以正印女友身份攞住蛋糕，出席男友的生日會，正式公告戀情。
首次為男友慶生
超市買食材
外遊返港
知道伊健鍾意食住家飯， YoYo經常四出搜羅食譜學整好 嘢食，又行老爺奶奶政策，陪兩老飲茶，逢大時大節必送禮，又唔介意陪長輩去旅行，孝順加晒分。一○年，她與無 綫改簽部頭合約，半放棄事業，全天候 mark住多女吼的伊健，又投其所好，陪跑步、打羽毛球、踩單車，助準老公變運動健將。
兩年前，伊健買千萬南灣獨立屋，二人過同居生活，又不時外遊晒甜蜜。去年八月，被本刊踢爆今年一月結婚， YoYo拍完《人生解碼 II》即停工待嫁。貼身守候七年，蒙嘉慧終於成為鄭太，得咗！ 
留言列表
{{ article.title }}
