繡球花花 cone是由文傑和兩位拍檔構思出來的產品，上年情人節推出，已賺 2萬，今年再度添食，估計情人節賺到 6萬元。

創業通

情人節靠手作發圍

2013年01月30日 ~~ 第1097期交易通．搵車快線

今年情人節遇上新年，不少商戶都頭痛如何是好，創作得意造型花束的 flowers& cones老闆文傑，及專辦手作工作坊及供人包場搞活動的 Studio Espresso老闆樹樹，實行新年開工發新年財。前者推出雪糕筒形花束（花 cone），供有心思搞鬼的情人選購；而工作坊特地為單身一族舉辦 speed dating手作班，另提供包場服務，讓愛侶過 2人世界學手作。兩位老闆都有信心，預計今個情人節生意比平日多兩、三倍以上！

Case 1　奇趣花 cone再添食賺 6萬　↑ 300%

情人節送花雖是例牌菜，但又不可缺少，全因令另一半收花有面子，送收雙方都一樣開心！為了飛甩老土，文傑和 2位拍檔成立 flowers& cones，專賣繡球花創作花束，外形似雪糕筒，任客人自配顏色，上年情人節只推出限量 70個繡球花 cone，一手一腳入貨包裝送貨，賺到 2萬多元。
「我哋 3個本身從事廣告業，平日好多時都俾客局限住，好難發揮，於是好想搞一啲嘢去滿足自己。我哋平日好少送花畀人，覺得普通冇新意，但有日去食 frozen yogurt，見可以畀客人揀唔同味道，就靈機一觸想搞啲任客配襯顏色、富有玩味嘅花束，不過花好易爛，唔可以畀客用手揀，所以我哋設計咗 2款雪糕及 1款爆谷款 cone，喺網頁模擬唔同嘅 cone及顏色嘅繡球花去畀客 match。」

設計花 cone時，文傑試過用玫瑰花，但效果不佳，繡球花因為夠大，能突出效果，當中以白色最受歡迎。

客人可上網訂購，自己配對花的顏色和 cone的圖案，情人節價$499。

接受日本雜誌訪問

上年情人節，文傑和拍檔自己造花 cone，今年則和 Volume one合作，他會教對方員工製作，所以產量會大增。

他們上年初合資 2萬成立 flowers& cones，最初由朋友開始訂起，慢慢多了人認識 flowers& cones網站，連日本時裝雜誌《裝苑》亦是透過網站認識他們，邀請他們接受訪問，「我哋冇乜做宣傳，覺得件產品有 selling point，就會有人識。除咗網頁外，中環 IFC Flowers at the square花店係其中一位拍檔嘅媽咪開，平日可以喺度訂花 cone。我哋發現幫襯嘅客多數係老夫老妻，同搞鬼一族，佢哋想畀啲驚喜另一半，所以只要有特色，呢門生意都有市場。」
上年成立 flowers& cones即遇情人節，見反應不俗，今年再度添食，「今年情人節我哋同位於大坑嘅 Volume one合作，佢哋專賣創意設計飾物、擺設，好配合我哋嘅主題，𠵱家開始，佢哋間鋪門口會 display我哋嘅花 cone，接受情人節預訂，正價$499，如果 2月 3日前同佢哋訂，有優惠平$100。」

合作製作增加產量

客人 Alex
上年訂嚟送畀女朋友，女友收到都讚勁有心思。

文傑認為 Volume one位於大坑，區內以中產客居多，是他們目標客群，和 Volume one合作是想吸納更多新客，「 flowers& cones精髓係個繡球花，平日我哋賣$280一個 cone，情人節賣$499，其實利錢唔算太多，因為繡球花本身貴，情人節時來貨更加貴，每支約$50至$80，有時入貨嘅花唔夠大，就要用兩個花嚟整 1個 cone，成本加大。」
由於他們保留廣告正職，只兼職製作花 cone售賣，平時每星期約賣到 4至 8個，月賺約$3,000多，但預計今年情人節約有 200個訂單，可賺約 6萬，會和 Volume one拆賬，文傑說不方便透露多少，「因為上年得我哋 3個人趕貨，所以只造得 70個花 cone，但今年同 Volume one一齊合作製作，我哋提供 cone嘅材料， Volume one則負責訂花，我哋會教佢哋嘅員工製作花 cone，所以今年產量會多好多。」

flowers& cones

2月 3日於 Volume one訂購，可獲$100折扣優惠。

情人節銷售點： Volume one
價錢：$499（只接受預訂），可門市取，送貨加$80，只限港島區
地址：大坑新村街 30號地下
電話： 2808 0962
網址： http://www.flowersandcones.hk

預計情人節期間收支：（ 2月 1至 14日）

租金（ homeoffice）：$0
入貨：$3,000
人工：$12,000
營業額：$75,000
盈利：約$60,000

Case 2　手作 speed dating造布袋摸手仔　↑ 300%

樹樹見平時有不少單身男女來上手作班，故在情人節推出手作 speed dating班，有導師教授及提供材料，並有茶點及飲品供應。

在觀塘工廠區的 Studio Espresso專營手作班、展覽及出租場地搞活動，他們成名作是上年的「男人的浪漫」展覽，找來多位男性插畫師參與。 Studio開業快 1年，之前亦會舉辦一些手作班，老闆樹樹覺得身邊好多男朋友為情人節活動煩惱，怕女朋友投訴沒有新意，平日更見好多單身男女來學，想在課堂中認識新朋友，於是她想到在情人節前及正日舉辦手作 speed dating班，及自初三起讓情侶包班學手作。
「近年手作好受歡迎，男男女女都會參加，情人節開 speed dating班，我哋諗到一齊造布袋，原因係布袋簡單得嚟，部分製作步驟需要 2人合作，有助佢哋溝通，導師仲話有啲工序，好似將雜誌圖放到水中，把圖撕起，可以摸到手仔，有助增進感情，哈哈！」

增設情侶包場服務

Speed dating將於 2月 9日及 14日舉辦 2班布袋製作工作坊供單身一族參加，每班 5男 5女，費用$280，約需時 2.5小時，並提供茶點及飲品。樹樹笑言：「我班朋友都話好有興趣，仲要求我喺 2月 8日開多一班早啲去識女仔，目前已有 6個人報名。」
至於由年初三起， Studio亦會接受包場服務，可供情侶 2人世界去學整一個作品，如毛絨公仔手飾、陶瓷等，費用$680，約 2.5小時，可代訂到會食物，及配合驚喜計劃。樹樹表示：「包班如想學整某種手作，可以打嚟問，睇吓老師配唔配合得到；另外如果幾 pair情侶約埋一齊包場，價錢另議。平時一個星期教班收入約$3,000，預計 2月情人節嗰個星期檔期，賺到近萬蚊，多成 3倍以上。」