2001 Renault Clio RS（圖右）

專題 Log In

承傳法式惡「細」力　 2013 Renault Twingo RS Gordini

2013年01月30日 ~~ 第1097期交易通．搵車快線

還記得 12年前嘅 Renault Clio RS嘛？當年平到 16萬就有部 172匹揭背快車仔，令冷門法國跑車喺香港都出奇地大賣！
今時今日 Renault當然唔及當年咁多人玩，因為 Clio RS已經賣到成 37萬，雖然加大到 200匹，但再唔係膽正命平嘅平民跑車！不過代理最近首次引入 RS車系最細成員 Twingo RS，而且仲要係罕有 Gordini版本，車身回復到當年 Clio RS咁上下細粒，賣 22萬亦都好似當年咁易負擔，一於搵初代 Clio RS車主兼 Renault改裝專家實試，睇睇部嘢掂唔掂！

「平、靚、快」，係後生仔最 buy嘅汽車元素， 2001年 Clio RS賣$159,900、 3門揭背跑車款、 172匹馬力可以追住 Type R， 3大要素令 Clio RS大紅。今次 Twingo RS都有齊成功元素， 12年後跟番通脹，賣$225,000唔過分， 3門款加全車 Gordini包圍型過當年 Clio RS好多，加上 133匹馬力配 5速手波，似乎承繼晒 Clio RS嘅好嘢。

藍撞白辣車身

其實 Twingo並唔係乜嘢新車系，喺歐洲普及到好似 Jazz咁，講得衰啲其實係地獄腳車。不過第一次嚟香港，點都要搵啲話題先夠爆！所以代理引入第 2代 facelift版中嘅頂級「 Twingo RS Gordini」，一嚟就去到最高規格。 Twingo RS Gordini全車最大記認係車頭泵把兩盞大射燈，十足 Nissan Juke咁趣怪，而且全車拋晒沙板，行出嚟已知係小鋼炮，加上 Gordini炮製包圍，刻意喺標記藍色車身上，撞白色頭唇、尾翼、側鏡，最堅係頭、尾冚拉咗白色「 G」字暗花貼紙，跑味比同場 Clio RS堅廿倍！連 Clio RS車主 Nikke都話：「成部車都幾靚仔，話晒係法國原廠改，唔使再煩改外表，型過 Clio好多！」

全車拋晒沙板，車側仲有 Gordini章。

17吋合金軨內塗上藍色，同車身色襯晒！

側鏡撞白色，分外搶鏡！

Gordini係賽車專家

AMG、 M-Power大家聽得多， Gordini未聽過？證明你資歷尚淺呀！由意大利人 Amedee Gordini創立嘅 Gordini車隊喺 1950-1956年曾經參與 F1賽事， 1962-1969年與 Renault車隊組成 Renault-Gordini 24小時 Le Mans車隊，之後就將成盤生意賣咗畀 Renault。而 Renault亦利用 Gordini名氣，推出過 Renault 5 Gordini及 Renault 8 Gordini等紅極一時辣車。 2009年開始， Renault將 Gordini重生，不過暫時只參與改外觀嘢，未有激辣出品。

Renault嘅揭背細車始祖 Renault 5早喺 1976年已經推出 Gordini辣版同當年嘅 Golf GTI火併， 1.4公升引擎都有 93匹， 82年嘅 turbo版更有 110匹！

Twingo廿一歲大

雖然 Twingo初到貴境，但實情係佢歷史一啲都唔短！ 1992年推出第 1代時以極之趣致外表爆紅，而且車身夠晒細，引擎由 1.0-1.2公升都有，啱晒法國橫街窄巷，第 1代賣足 15年先轉款，就知佢係法國最多人用買餸車之一。 2007年第 2代 Twingo即係現行一代，而今次代理係引入最新 facelift版，內裝幾乎冇變，只係改外表。

初代 Twingo外形趣致，三門車身後座都闊落，仲有個「罐頭頂」軟篷，夠晒優皮！

2代外形已經大變，走辣車路線， 1.2公升 turbo高級版都有 100匹！

內裝一樣夠辣

Gordini操刀車身之餘，車廂都有驚喜，雖然 Twingo只係平價車仔，但都落重本玩顏色、玩獨特！真皮軚襯番車身拉花，藍色部分有兩間白色，而波的、波棍、地毯邊、轉數表框都用藍色為主調，玩得幾有款！對比當年 Clio RS只係黑色車廂有心思得多。軚環後個轉數表雖然似 smart fortwo咁玩具 feel，不過都有轉波燈功能，而速度表同其他行車資訊顯示，就放晒喺中控台上面， pro.到可以顯示加速時間、 G-force、油溫、水溫等，賽車氣氛濃到震！連改裝專家 Billy都話車廂用料好靚，完全唔覺係平價車。

車廂設計同當年 Clio RS（小圖）一樣都係圓碌碌，但 Twingo RS就多好多 racing設備， Gordini專用裝飾亦高級好多。

Clio

後座係兩張獨立座位，雖然比 Clio RS（小圖）少咗個位，但半桶形設計跑味同舒適性都大大提升。

Clio

前座同 Clio RS（小圖）一樣係桶形設計，但全真皮加藍色裝飾，比 Clio RS半猄皮更高級同耐用，可惜 Billy同 Nikke嫌坐姿太高。

Clio

後座翻前後，尾箱空間都唔細㗎！

車架紮實緊湊

講到底 Twingo同 Clio係兩個級別嘅車，只不過近年新車日漸擴大車身， Twingo RS Gordini車身已追貼 12年前嘅 Clio，車長 3,607mm，比 Clio短 204mm；闊度、高度達 1,688mm及 1,470mm，比 Clio闊 49mm、高 53mm。正因為車身較短小，所以車廂後座只設 2個獨立座位，可以前後移動及摺疊，實用性高。
前座方面都係由 Gordini設計，成半桶形，睇落好似好掂，但實際表現一般。 Billy：「部車個車架好紮實，比 Clio更好，令到人好有信心去劈彎。不過我嫌座位太高、太軟，部車本身有好好路面感，但一張凳破壞晒！如果我買車會即時換走佢。」

Twingo RS Gordini車身只比 Clio RS細少少，車架表現更剛硬。

承襲初代 Twingo罐頭頂風格，新款都有雙天窗 option，價值$10,000。

「新世代法國車根本唔易壞！」

好多人都話法國車多小問題， Billy從事改裝及維修法國車多年，對 Twingo RS Gordini又點睇？「新世代法國車根本唔易壞！尤其好似 Twingo呢啲大路車，喺歐洲通街都係，如果唔耐用邊有咁多人揸？零件方面都唔係問題，先有代理 backup，而且訂件都好易。」既然 Billy話 Twingo RS Gordini唔夠力，可以點改先更夠力？「由於佢唔係 turbo車，唔可以簡單從電腦入手，初階段改可以由風隔、排氣喉入手，進一步就要郁引擎，成本高過 turbo車好多。」

Renault改裝專家 Billy

面對 Clio RS 172匹馬力， Twingo RS Gordini其實招架唔嚟。

軚盤及速度表殼都大玩車身色。

Gordini地毯再加金屬格仔腳踏，有高級跑車感覺。

同 Megane RS一樣，多功能顯示屏有 G-Force顯示。

響按掣竟然喺指揮燈控桿頂，搵死人咩？

力度可以更大

Clio RS用 2.0公升、 172匹引擎，細一級嘅 Twingo RS Gordini未有咁癲，但都配 1.6公升、 133匹引擎，而且只有最 raw嘅 5速手波！ Nikke：「揸落覺得部車 under power，加速唔算快，有啲浪費咗個咁靚嘅車架。靈活性可以同 Clio媲美，車身較短有一定着數。」
筆者試過車後發覺，呢副引擎雖然表現唔算好勁， 0-100km/h慢成 1.5秒，根本唔可同 Clio RS相提並論，但都可以帶嚟一定快感，尤其玩一啲窄山路，可用靈活操控感攞番啲分。 Billy：「唔係好夠力！應該話部車可以用更大力引擎，我覺得佢配 160-170匹引擎都得，加速力更加好，而車尾就唔及以前 Clio咁癲，唔係太識得向外搬。」

Clio RS車主 Nikke
Nikke認為 Twingo RS Gordini力度唔夠，但行車靈活。

5速手波係唯一選擇，操作都算準繩易用。