Fun App

新爆熱 apps　甜故跑出

2013年01月30日 ~~ 第297期 Face

前排轉珠遊戲 app《 Puzzle& Dragons》爆熱，出到街個個拎住手機不停轉轉轉。不過花無百日紅，轉個頭又有新一輪爆熱嘅遊戲 app，其中呢隻睇見都覺得甜嘅《 Candy Crush》又係要轉，不過今次就係轉糖，而且仲可以 link埋 facebook，同班朋友鬥高分，所以巴絲打通殺。另一隻好有故事性嘅 RPG遊戲《 Redemption Cemetery: Children's Plight Walkthrough》，就要玩家扮勇士兼智者，喺氣氛陰森嘅互動地圖中解謎團、救細路。今時今日，唔識呢兩隻甜、故 game，點得呀？

Candy Crush

iOS/Android Free

iPhone版

Android版

轉糖食腦

呢隻《 Candy Crush》轉幾粒糖就話過關，一定係專冧班死港女嘅冇腦 game啦！但其實佢唔似《 Zoo Keeper》咁，鬥快轉埋三粒動物一排就算，仲會每關限制你轉嘅次數（ move），例如要你喺 20個 move入面，爆開晒畫面上嘅啫喱。而且因為要同朋友鬥高分，所以唔係話用最少 move完成任務就算，而係要計算點用盡 move去爭取最高分數，近排成日坐地鐵都見到人對住粒糖諗到入晒神。呢粒糖雖然食幾多都唔會爛牙，但小心玩到大近視呀！

基本操作係篤住１粒糖，向上下左右任何一格拉，跟鄰近的糖互換位置，當 3粒或以上同類糖果連成一線，就可以消滅佢哋兼拎分數。留意糖粒每步只可移 1格，《 P＆D》玩家小心改唔到手勢。

糖果主題畫面唔算花，上方係過關目標分數、右下角睇到剩低幾多個 move同埋現時分數。

將個 game link埋 facebook後，每過完一關，就會見到班朋友喺呢關拎咩分數、排第幾。

唔少得梗係 send禮物畀朋友，同其他 game一樣，都係一日一份，最受歡迎梗係續命心心啦，不過每人最多儲 5粒，滿咗就唔好 accept禮物啦！

甜美玩家 Anladia：「 fb救心好搞笑！」

畫風咁 cute，一定冧死一班女 user。好似 Anladia咁，都係糖迷一名，佢話：「最初都係朋友猛叫我玩，又叫我 send道具畀佢哋，所以就 link埋 facebook玩。呢隻 game真係要成日諗點過關，好易搞到人想不斷試、不斷玩。但得 5條命真係太少，要成日叫朋友 send心心嚟，好搞笑。」

進階玩：過關有難度

玩頭 10關一定覺得《 C.C》只係小學雞玩意，但此後就要於限定 move內達成目標，都絕對唔易。因為關卡會加入朱古力、鐵閘、石頭等元素，好似朱古力咁，就係會四圍出現 block住糖果。所以每行一步都要好小心，完成唔到就要扣心心，每人得 5粒，好易就冇晒。呢個時候你就要等 30分鐘回復。
唔想等，其實《 Candy Crush》可 link埋 facebook，唔止跟朋友鬥高分，睇朋友玩到邊關以增加競爭性，朋友間仲可互 send道具同心心，更有粉絲開埋 facebook group，拍攻略片畀一眾糖友，非常互動！

唔只有石頭，好似呢關就有忌廉（黃框）阻住晒，消滅完佢哋，兩邊嘅朱古力機仲會整出朱古力石頭，好鬼煩。

後期嘅關卡，糖果匿喺白色石頭（黃框）後面，同一個位要消滅兩次至得。

過極都過唔到關，可以畀真錢買道具，好似呢種棒棒糖（$15/3粒），幫你爆走部分糖，唔怕卡關。

有高手拍片上 facebook專頁做示範，雖然每次開 game嘅糖果排位唔同，冇得照跟，但原來障礙物的消滅次序都有攻略可言。

http://www.facebook.com/CandyCrushSagaTaiwan

恐怖解謎　夜晚咪玩

唔少 user喜歡一個人慢慢思考、慢慢篤。轉糖唔啱玩，其實近來 game app仲流行緊一種推理+密室逃出遊戲。好似呢隻畫風有啲邪嘅 RPG解謎遊戲《 Redemption Cemetery: Children's Plight Walkthrough》，故事講你俾人困咗喺墓園，唔單只要打低惡魔、仲要救埋 3位遇害小朋友。
喺呢個咁淒美嘅墓園，你要四圍篤，搵有用道具出嚟，打開一個又一個嘅場景。雖然話呢隻分為 10個 chapter嘅 game係免費 app，去到第 3個 chapter就要收錢。不過成個故事設計咁完整，淨係場景都有墓園、遊樂場、荒廢村落等，音響又夠氣氛，建議你用 iPad玩，正好多，$38唔係貴呀！

《 Redemption Cemetery: Children's Plight Walkthrough》

iPhone$15
iPad$38

iPhone版

iPad版

點解阿媽係隻鬼

初入墓園，有隻女鬼飄出嚟叫你救佢個女，首次試玩時都俾佢嚇一跳。

呢個細路女成日被困，救完一陣又會被惡魔捉走，好似 Mario個公主咁麻煩。

解謎小遊戲

解謎
同好多解謎遊戲一樣，首先要喺畫面四圍篤、搵道具，再用喺唔同地方。好似呢個畫面咁，原來係將個兜放喺個天使像手上，裝起佢滴出嘅淚水，要諗通真係唔容易。

解字
出現得最多，就係呢款搵道具遊戲，畫面下方列出要搵物件，不過全英文，最好開定個 Google translate，完成後就會出現新道具幫你過下個關卡。

解鎖
逃出 game唔少得嘅解鎖遊戲，幾乎每次圖案同設定都唔同，好花時間思考。好似呢款咁，就要以食波子棋形式，將畫面上嘅骷髏頭食剩一個。