今日好玩嘢

舞動龍獅玩潮啲

2013年01月30日 ~~ 第297期 Face

就嚟又過年，不過香港冇得燒炮仗，好彩出街撞口撞面都見到人舞龍舞獅，有賴啲勁大聲嘅鑼鼓，大家先至感受到濃厚嘅新年氣氛。
其實近年舞龍獅仲變得好新派，唔只表演花樣多咗，學嘅人仲愈嚟愈後生，甚至有公司搵員工組團拜師學藝，然後喺公司活動上表演，傳統文化一啲都冇 out到！

互動片段

睇佢點舞

夏敬文師傅今年只有 31歲，但已經贏過 7次世界舞獅比賽冠軍，佢話𠵱家啲後生仔成日掛住打機，教舞獅係想培養佢哋嘅團隊精神同品格。

新派表演加快節奏

龍獅，其實就係舞龍同舞獅嘅簡稱，提起呢種文化，大家最先諗起嘅一定係香港一代獅王夏國璋。夏國璋龍獅團已經去到第 3代，呢代掌舵人就係夏國璋嫡孫夏敬文，龍獅文化喺佢手上，被加入更多現代表演元素，加強視覺效果，好似融入音樂同舞步嘅 hip hop舞獅、識發光嘅閃燈舞龍等。
夏師傅仲話新派舞師要加快節奏，唔可以俾人覺得悶。「大陸有啲傳統師傅，仲覺得要舞足 45分鐘先算係舞獅，但我哋覺得舞 10分鐘就夠，最緊要畀人嘅感覺夠爽！」訪問當日，筆者即場睇佢同師兄弟表演一 part hip hop舞獅，啲步法仲有啲似〈江南 Style〉，的確夠潮，而且唔經唔覺就睇完，真係爽過傳統採青表演。

近年仲流行喺龍身獅身加上 LED燈，舞動時不停閃閃吓，夜晚或上台表演時更有視覺效果。

求變嘅夏敬文自創將 hip hop舞步融入傳統步法，例如呢個左右腳分開踏步嘅 step，表演時亦唔用傳統鼓樂。

就連獅頭設計都大膽創新，好似呢個婚紗獅頭，就係夏師傅上年跟同門師妹結婚時訂做，亦曾喺其他婚禮表演中使用。

千人舞龍獅創紀錄

自 2011年起，夏國璋龍獅團仲有份發起香港龍獅節，每年元旦都喺尖沙咀舉辦千人舞龍獅活動，仲連續 3年創下健力氏紀錄，夠晒大陣仗，連旅發局都列作重點推廣節日活動。

2011
超過 2,000人同時舞動 1,111隻獅子，遠超之前新加坡 353人同時舞獅嘅紀錄。

2012
同樣超過 2,000個參加者，但改為舞 88條金龍同 50隻獅子，再次創下紀錄。

2013
逾 3,500人參與，全場共有 850隻瑞獸，其中有 200隻麒麟同時舞動咗 5分 30秒，正申報緊健力氏紀錄。

唔會由紮馬學起

唔只表演手法要新，夏敬文話連教授方法都要與時並進，以前細個佢跟爺爺晨早起身紮馬練功嗰套已經唔 work。「𠵱家啲後生仔一聽到由紮馬學起，就會覺得好悶，學一陣就走咗去。」夏師傅唔係話紮馬唔使學，而係要改變教學方法：「我會融入遊戲元素去教，例如叫佢哋做某個馬步，鬥邊個做得耐。平時亦寧願叫佢哋做其他運動去增強體能，而唔係硬性規定一定要由紮馬學起。」大概因為咁，舞獅教授嘅進程加快咗好多，夏師傅話一般學生大約學 5至 10堂（每堂約 1個半小時），就學識晒基本嘅動作，應付到普通表演，但高台採青、踩梅花樁等高難度表演，就當然至少要練一年半載。

點解會學？

志霖
年齡： 17
獅齡： 6年
細細個已對舞獅好有興趣，見到中學有醒獅隊就即刻加入，之後仲俾人帶出嚟跟夏師傅學舞獅。

阿瑩
年齡： 19
獅齡： 6年
本身喺學校學打鼓，點知醒獅隊話需要鼓手，就叫我入隊，後來見啲師兄舞得好好玩，於是索性學埋一份。

4大基本步法

馬步
就算要表達獅子靜止企喺度，舞獅者都唔可以隨便 hea企，獅頭獅尾兩個人同時擘大腳紮馬。

開合步
由擘大腳變成雙腳合埋，獅頭個人連上半身都企到直一直，再將獅頭高舉過頭，模擬出獅子向前遠望嘅動作。

交叉步
兩人雙腳都作交叉姿勢，獅頭亦會配合左右擰，多數用嚟模擬獅子嬉戲嘅神態。

撲步
兩人同時屈膝成弓步，令獅身伏低向前，作出向地面注視嘅動作，採青時成日會用呢種步法。

高難度動作　一柱擎天

由夏國璋師傅首創，獅子爬上至少十幾呎嘅木竿上採青或放出 banner，單係獅頭做已經唔簡單，有時仲有兩個人騎膊馬咁上，仲難。

梅花樁

仿照功夫啲梅花樁，樁支間相隔 2米，而樁頂嘅踏板只僅僅大過腳板，要喺樁柱間移動甚至跳躍，難度極高，要大型比賽先會見到。

五瑞獸逐隻睇

其實整個龍獅文化總共包含 4種瑞獸，除咗最常見嘅舞龍舞獅外，仲有較冷門嘅舞麒麟同貔貅（音皮休），而舞獅亦有分南獅同北獅。夏敬文話 5種瑞獸本身都有佢哋嘅傳說寓意，而且舞起嚟各具自己特色，適合唔同場合表演，但宗旨都係要模仿番瑞獸嘅特性，所編排嘅動作亦一定要符合表演主題。

龍

長度種類有多種，短到專畀小朋友舞嘅 45呎 BB龍，到長達 300呎嘅大金龍都有，後者要幾十人先舞得郁，仲需要一個人舞龍珠引領，鼓樂手亦至少需要 5個，最啱大規模巡遊表演。

麒麟

唔同地域嘅麒麟都有唔同造型，體形亦有大有細，但都係兩個人舞，鼓樂手就只要 2至 3個就夠。佢係象徵風調雨順、國泰民安嘅仁獸，好多國家或鄉村慶典都會見到佢。

南獅

夏敬文話以前南獅多數只會做地面動作，較少跳躍，但近廿年改興「南獅北舞」，會增加跳躍動作。一隻獅兩個人舞，另加鼓樂手 4至 6人，仲有大頭佛負責搞笑，任何喜慶場面都啱表演。

北獅

黃河以北嘅省份就以舞北獅為主，香港較少睇到，表演人數同南獅相同。獅身比較小巧輕靈，有更多撲、跌、翻、滾等靈活動作，寓意財源滾滾。

貔貅

傳說中專吸財嘅瑞獸，所以鋪頭開張就最鍾意搵人舞佢，著重地面動作，表演人數同麒麟一樣。

點學舞龍獅？

夏敬文話今時今日已經冇乜人會登門拜師，反而係佢個龍獅團會同唔同學校、社福機構，甚至老人院合作，派教練去唔同地方教有興趣學嘅人，單係中學就有成 50幾間有得學，學滿師就有機會代表龍獅團四出表演或比賽。
夏師傅旗下嘅夏國璋龍獅武術訓練中心，仲有舉辦企業速成班同遊客一天體驗課程，成人想學的話，都可以向佢哋報名相約時間同地點學習，收費視乎堂數同內容而定。