電訊型科

再見 msn齊轉 Skype

2013年01月30日 ~~ 第297期 Face

隨住手機上嘅 WhatsApp、微訊、 Kakao Talk等通訊 app愈嚟愈流行，紥根於電腦嘅即時通訊軟件日漸式微。好似筆者電腦上嘅 msn，在線嘅 buddy已由高峰嘅過百人銳減至十幾人，難怪 Microsoft決定喺 3月 15日結束 msn嘅即時通訊服務！感覺雖然不勝唏噓，但好在同屬微軟嘅 Skype將會進行整合，等你可以將 msn嘅 buddy搬晒過 Skype繼續吹水，而且更強化語音、視像通話，以至連結 facebook等功能，讓你玩得更全面。

奴 Comment
期待新功能

其實都幾懷念 msn，起碼我當年同我老婆都係用 msn約出街！
不過近年已少用，有咩又可以 facebook同 WhatsApp，仲可以 set群組添，所以真係冇乜用 msn，不過合併 Skype又幾期待有咩新功能。最好可以喺電腦打一個 message，你朋友手機都即刻睇到，成個電腦 mon大啲好打啲！手機電腦互通。唔使轉幾廿個方法又 WhatsApp又 WeChat講。如果可以都幾正。

過檔 step by step

1.裝好 Skype之後，喺 log in畫面會見到除咗可以用 Skype帳戶登入，右邊更多咗用 Microsoft（即係 msn）帳戶登入。

2.登入完，佢就會問你本身有冇 Skype帳戶，有的話就會幫你將 msn同 Skype資料進行同步。

3.同步完之後，就會見到 msn同 Skype嘅 log in已放埋一齊，一按「繼續」，就可以開始玩 Skype。

下載終止　 Skype同步 msn

雖然香港官網仲可以繼續下載 msn，但一去美國官網，就見到佢話 msn就快退休，更有 link帶你去裝 Skype。

微軟今次真係鐵了心宣布呢個由 1999年誕生，並曾創下 3億用戶使用嘅親生仔 msn，將會成為歷史名詞！到咗 3月 15日，你同我用緊嘅 msn就唔再用得，所以𠵱家去到 msn美國官網，已經唔可以再下載 msn。不過，佢就有 link帶你去下載 Skype，而且仲講明可以同步番你 msn上嘅資料。一裝好 Skype，就可以用番你 msn嘅名稱同密碼 log in，之後佢會問你有冇 Skype帳戶，有的話就幫你將 Skype同 msn資料同步，冇就直接用 msn帳戶玩 Skype。

通話升呢
玩埋 facebook

話晒被 Microsoft整合過，所以即使係 Skype新手，亦好快上手，要 send訊息都係在左邊 contact list選取 buddy就得。加上 Skype本身係電話軟件，所以不論語音定視像通話功能，都比 msn全面同穩定得多質素升呢。皆因𠵱家你揀完 buddy後，可直接輸入佢嘅電話號碼打畀佢，又或者邀請幾個 buddy開 group一齊進行語音或視像會議，變化比 msn多。另外，佢更多咗同步 facebook帳戶，等你可以玩埋 fb嘅「聊天」功能之餘，同步睇埋朋友嘅「動態消息」。一個軟件同晒所有 friend聯絡，夠晒全面。

升呢　打訊息
同 msn一樣嘅基本用法， Skype當然不缺，打字空間比 msn大咗，表情公仔亦多咗少少，可惜對話框，我覺得樣衰咗！

群組功能
Skype最多人讚係可以畀你開設不同群組，喺入面想傾文字訊息、語音通話，甚至視像會議都得，比 msn嘅群組更清晰同易管理。

新增　打電話
想聽到 buddy把聲，佢有開 Skype就可以免費通話。如果佢冇 online，就可以用 Skype打電話畀佢，收費$0.21/分鐘（本地），以前 msn就冇喇。

玩埋 facebook
喺介面左邊會見到 fb icon（紅圈），一點就可以同步埋 fb。之後，你就能夠同 fb嘅朋友 chat埋，而介面右邊更見到 fb嘅「動態消息」，多嘢玩過 msn。

無腦玩 Skype
Logitech TV Cam HD

由 msn過檔 Skype後，連配件都多咗，好似 Logitech呢個 TV Cam HD，最大賣點係可以唔經電腦，淨係用屋企電視都可以玩 Skype，最啱有老人家嘅家庭。查實佢係一個有 720p鏡頭嘅 web cam，不過就裝咗 Skype程式，又有 WiFi同 HDMI，等你連接網絡同電視。只要用你嘅 Skype帳戶登入，就可以利用電視同你嘅 buddy作語音或視像通話，美中不足係佢唔支援打訊息功能，亦冇得駁 keyboard。

Spec.
鏡頭：蔡司 720p
連接： WiFi（ 802.11 g/n）、 LAN線、 HDMI
收音： 4組消噪米高峰
售價：$1,799
查詢： http://www.logitech.com