老表，你好嘢！ 肥妹變女神
由王祖藍參與創作嘅《老表，你好嘢！》，上個星期播映平均收視達三十點，網上點擊率每日都超過十萬，收視好自然多人議論，就好似有人批評呢套劇抹黑咗內地人同醜化咗香港人，但東姑就唔係咁睇嘞！因為放咗工睇番套劇都係想笑吓、輕鬆吓啫，香港人放鬆啲好！
肥妹小寶喺《老表，你好嘢》同王祖藍成日出雙入對，受到網民注意並封佢做女神。
榮升成為高登女神嘅小寶都好似一般港女一樣鍾意影自拍，你睇幾靚！
東姑睇呢套劇就冇乜留意啲中、港兩地關係，睇咗成個禮拜，東姑就最欣賞成日跟住王菀之嗰個識廣東話嘅鬼妹仔陳明恩，同埋成日同王祖藍好似孖公仔咁嘅「細細粒」肥妹小寶，據知原本喺電影公司做文職嘅小寶閒時做吓特約演員，但係呢位體重達二百二十磅嘅肥妹，因為樣子可愛做戲又生鬼，而令佢成為咗王祖藍嘅新寵，早排祖藍喺紅館開騷都有搵小寶做dancer搞吓笑。
查實小寶之前喺電影《勁抽福祿壽》同劇集《巴不得媽媽》都好出位，最近佢就喺祖藍嘅穿針引線下同無綫簽咗兩年，所以想睇小寶大把機會啦！仲有呀！有樣嘢不得不提就係小寶仲紅到畀班高登仔封埋女神，話佢瘦咗一定好靚女喎，祖藍知道咗小寶做咗高登女神佢都好開心，仲笑住咁話佢可以揮抵魯芬添，肥妹估唔到可以變女神呀。
女神都有落妝時，原來小寶落妝都幾嚇人，唔知憑呢張相嚟睇，佢仲做唔做到女神呢？
舊年播出嘅《巴不得媽媽》小寶都有份演出，劇中接受飾演記者岑麗香訪問嘅佢七情上面，相當搞笑。
一早已經覺得小寶好有演藝細胞嘅祖藍，之前喺演唱會已經搵小寶做嘉賓娛樂大家。
小寶之前喺响間電影公司做，以前仲做過鋼琴老師添，不過喺四年半前因為參演《矮仔多情》識咗祖藍之後就改寫人生。
全站熱搜
留言列表
{{ article.title }}
