眼前的羅仲謙，說話時經常傻笑，跟《古惑仔：江湖新秩序》中的勁chok「陳浩南」，完全兩個樣。「『陳浩南』呢個角色，係我入行以嚟最難演嘅一個，就好似啲人演『楊過』一樣，哈哈哈！我呢個『浩南』，冇（鄭）伊健把長髮，造型上少咗份不；性格作風又幾乎好似黑社會裏面嘅警察咁，成日都好chok！召妓、黃賭毒，一概都冇份，連粗口都唔講，問你死未？哈哈哈！」即使跟兩年多前，我所接觸過的他，感覺也大不同了：從前，他每答一條問題，也會皺起眉頭，經過深思熟慮才說出口；但現在，他明顯已表現得輕鬆自在得多。「其實，我係因為呢兩年（被指向傅穎動粗、一腳踏兩船、跟楊怡『車震』的報道），先至急速成長，個人變得定咗。嗰陣有乜嘢事，都會『死啦死啦』；依家，我會……」接着，他做了一個很冷靜的表情出來。「我開始會知道，一個藝人應該要抱住乜嘢心態去做，幾時要認真思考，幾時要放鬆。不過又要真，又不能假，真係好難，所以，我覺得可以真係做番我自己嘅時候，就只係喺被竇裏面！」是的，謙仔被竇外面的世界，五光十色又光怪陸離，確是不能不催逼自己成長和堅強。

雲吞麵

先是一一年被前女友傅穎指摘動粗和一腳踏兩船，再來是去年九月跟楊怡被拍到疑似「車震」。大概，羅仲謙自己也沒有想到，這兩件事已成了他兩年內急速成長的催化劑。前者，已成過去了，不好再說；後者呢？他想說得更清楚的，還有很多。

嗰次，我咁大個仔第一次畀人閘車，然後落車再用身體去擋住你路線（影相）。我本來諗：最多，我咪畀你哋影埋我送佢返屋企，估唔到佢哋會寫到咁，我睇到段新聞，真係好唔開心！一嚟，點解要寫我呢樣呢？二嚟，我係諗咗楊怡先嘅！因為佢始終係女仔，我心諗：死梗！好似名節咁，咁樣寫好唔得囉！

與傅穎的一段情已逝，沒甚麼好說了。

佢（楊怡）嗰晚真係唔舒服，瞓咗喺我（大髀）度，我見既然唔係好遠路程，我諗住揸車揸慢啲會安全啲。報道話佢返到將軍澳停車場時，口角污糟咗，其實返去之前，佢喺架車度嘔緊，我喺工業區嗰邊兜咗兩個圈，我唔叫佢起身，因為佢一起身會畀人影到核突樣，而且一嘢就會劏！但估唔到咁（一直瞓在大髀上）仲衰！（尷尬地笑）。

成件事，我承認係我真係處理得唔好，我應該要擺佢喺後座，嗰晚咁樣，如果有差佬發現，仲可能會罰錢——不過我寧願罰錢，都唔要有咁嘅新聞！哈哈哈哈！

呢件事之後，我每次出去活動，都有記者問我：「碗雲吞麵去咗邊？」（一個反白眼表情）但根本呢個（雲吞麵）都唔係重點！我只係講個實情出嚟咋嘛！

疑似「車震」報道出街翌日，兩人即開記招澄清，留下了「雲吞麵之謎」。

有顧慮

謙仔和年長他五歲的楊怡，相識於前年合演《On Call 36小時》。那時正值他有負面新聞纏身，本打算從此以後把感情事低調處理了，誰料轉過頭，便被拍到他和楊怡BBQ，緋聞不脛而走。

我本來想順其自然咁相處，但因為咁（被拍到BBQ），多咗顧慮，變得不自然，大家之間唔係有啲乜嘢問題，而係多咗人注目，明明嗰陣唔係大家想像中咁嘅時候，已經講到咁，就已經唔係順其自然。

其實我冇乜壓力，只係戒心重咗好多——呢樣嘢都係兩年前（前女友）嘅事積落嚟。所以，我呢一刻真係唔會去承認啲乜嘢，或者去澄清啲乜嘢，總之一切我都想順其自然！當然，如果我將來有乜人生大事，梗係會公諸（於世）啦！到時我請傳媒朋友高抬貴手，多啲祝福語贈興吓，唔好寫到好負面啦！哈哈哈哈！

我初初識佢（楊怡），冇驚過啲乜嘢，佢係一個冇架子嘅人，同我一樣，都係傻傻哋，都係「嘩！哈哈哈哈！」嗰啲！啲人話嗰啲（男卑女尊），咁南韓女總統咪好大負擔？哈哈哈哈！依家都冇呢樣啦！

至於年齡，就算對方係大你五、十年，或細你五年都好，我覺得，如果有個人，可以喺你發生乜嘢事，都喺你身邊，或者陪你走到最後，咁就得啦！最緊要係大家都明白感情先係彼此間最重要，同埋視對方為終生伴侶——呢樣可能係因為我出身於單親家庭嘅關係啦。

去年頒獎禮，楊怡當視后一刻，台下謙仔也感動落淚。

野孩子

在謙仔很小的時候，父母已分開，他和家姐跟了當髮型師的父親，在大埔的村屋與嫲嫲和伯父等家人同住。他自小已非常外向，最愛放學後趁家裏沒有人，跟朋友到村內爛屋、爛車場和溪澗玩；至二十歲的生活和思想，都很簡單。

我媽媽生我家姐時，只係得十六歲，嗰陣爸爸先至二十歲，佢哋喺我好細個時就分開咗，因為佢哋都要搵食，所以我嘅童年，可以話係跟我伯父同嫲嫲一齊多啲，佢哋都好錫我，令我未至於缺乏家庭溫暖。

其實喺我住嗰條村，同我同輩嘅，五隻手指都數得晒！細個嗰陣，我全屋三個小朋友，我家姐、我同我堂細佬，佢哋一做完功課，就會學琴「叮叮叮叮」；我一做完功課呢？就會消失咗，去啲爛屋、爛車場玩，又去溪澗游水，成日玩到損晒咁返屋企。可能因為自細慣咗冇乜物質生活，所以到我十幾歲，我啲friend已經成日話要去黃金商場砌機（電腦），又好鍾意玩ICQ，但我都仲係用打波嚟維繫感情，亦都好唔明點解要玩ICQ，都唔打電話呢？電腦，我嗰陣真係冇諗過要用，係直到我二十歲先至有！哈哈哈！

其實我依家都好後悔嗰陣冇學琴o架！不過我爸爸喺我好細時已經薰陶我：「你咁好動，第日最適合做警察同消防員。」咁我考警察、消防員，又使乜識彈琴呢？哈哈哈！然後到我畢業之後，我就為咗多樣技能，易啲考到警察或消防員，走去考咗潛水牌、first aids牌同救生員牌，結果，我就喺青衣一個私人嘅「四季開放泳池」做咗救生員。

入呢行？從來冇諗過！

明星夢

謙仔其實在少年時已長得很俊秀。○五年，他陪朋友到星皓（他出道至今的經理人公司）為電影《阿嫂》casting，結果他卻無心插柳當了藝人。

好老實講，我由細到大都冇發過明星夢！我有啲friend話尖沙咀利時後巷成日有人（星探）派卡片，我有朋友收過咁大叠（約一吋厚），但我一張都冇收過！我嗰陣一年都唔去一次銅鑼灣，去嗰度做乜啫？都冇嘢啱我！尖沙咀，都係聖誕節同啲朋友，唔知點解坐喺個海旁度，哈哈哈！反而去得最多係旺角，每個月都會去一次睇波鞋。

謙仔（左一）初出道時，還是排骨仔一名，經常拍着同公司的師姐劉心悠（左二）出席活動。

未夠一歲的謙仔，眼仔碌碌。

到我陪朋友上星皓casting，老實講，我嗰陣連星皓都未聽過，不過我有睇《警訊》喎！所以我當時係諗：如果我朋友畀人呃，都仲有我喺度有個照應同報警嘛！點知我坐喺reception等緊時，竟然見到旦哥（鄭丹瑞，《阿嫂》監製）！我就即刻放心晒！知道唔係呃人！哈哈哈！跟住個製片見到我，又問我有冇興趣喺《阿嫂》拍幾場戲，我即時由心笑出嚟：「好呀！」玩咋嘛，根本都唔識寫個「醜」字！哈哈哈！

我入行前，一個明星都冇接觸過，冇諗過第一次拍戲（《阿嫂》），就可以同七大影帝坐晒喺度食飯！你諗吓有幾震撼！然後發覺：咦？原來明星都會講粗口o架喎！

我依家入行都踏入第八年，真係急速成長，都係呢兩年嘅事，不過仲有好多嘢，我都仲係好唔明，有時我都會好負面咁諗：會唔會有日我明明係扶阿婆過馬路，都會畀人寫到我推阿婆出馬路呢？哈哈哈！

經歷多咗，我就會成日諗埋呢啲無聊嘢。