面對面
女人 42 萬綺雯
出道 24年， 42吋長腿一直是萬綺雯的標誌； 24年過去，現年 42歲的萬綺雯長腿不變、容顏不改，連觀眾緣亦沒減退，轉投無綫的頭炮演出就賺得全城正評，上週首播，《老表，你好嘢！》錄得平均 33點、最高 37點收視，破了近年劇集開播紀錄。
記者身邊盡是七、八十後，人人都說，自己是看萬綺雯長大的，人人也都納悶，我們都老了，萬綺雯是怎麼愈活愈年輕的？
她回答說：「因為我識揀！」
20年前被亞視當係寶，她寧願解約也不願劇接劇：「我揀咗身體健康。」
13年前演馬小玲紅到裂，她與編劇陳十三閃婚：「好多人話我喺最紅嘅時候放棄咗過檔無綫、拒絕其他大經理人公司，好鬼傻。我同佢哋講，放咩棄啫？喺我角度，嗰個 moment我揀咗我認為最珍貴嘅嘢──我老公。有冇揀錯，大家放長雙眼睇，時間會證明一切。」
婚後 13年，時間果然證明了一切。
每天一開電視，篤眼篤鼻盡是捱到殘、算到盡、兩頰愈來愈削、鼻哥愈來愈似小丑的那幾張面孔，難怪，久休復出的幸福人妻會讓觀眾們精神為之一振、會令旗下成村花旦的樂易玲亦驚艷。
收視 天與地
89年參選亞洲小姐獲得亞軍，一簽約就開始拍電視劇，萬綺雯 18歲就是亞視當家花旦。近年亞視愈來愈頹，收視個個星期零雞蛋，萬綺雯其實經歷過亞視最輝煌年代，主演的《我和殭屍有個約會》系列平均收視過 10點，大結局最高錄得 20點收視。不過，亞視最勁，與無綫最勁，始終還差一大截。
「始終係弱台，以前拍完劇，唔敢希望收視，做好自己就算。以前劇集出街，個個都同我講：『阿蚊，你真係勁，套套劇收視都過 7點……』由收視 7點，到收視最高 37點，感覺兩個字：震撼！我一生人都未試過三十幾點收視，見到同劇演員個個好開心，周圍打電話通報，傻更更問人：『即係點？三十幾點喺無綫算唔算 normal？』佢哋話八點半啲劇，收 27、 28點係 normal，《老表，你好嘢！》平均 33點，最高 37點，好好喎！」
萬綺雯與她的代表作馬小玲，已經是全亞視最入屋角色，來到無綫，萬綺雯說才知道入屋亦有高低之分：「威力真係好強勁，我平時都喺西貢逛開。 Call的士，個司機姐姐一見我嘩一聲，同我講劇情，由上車講到落車；另一個司機哥哥，同我講應該要笑多啲，話我笑得靚，我答佢，我喺套劇係個 38歲嘅剩女，笑咁多，又點會係剩女呀……以前都有街坊同我講劇情，但唔會投入到咁，我𠵱家知，咩叫入屋；以前有劇出街，宣傳拍照最多排一個星期，𠵱家，由劇集出街前一個月，到打後兩個星期都未排完，我終於知道，拍完一套劇，受到觀眾、同行同傳媒關注嘅感覺係點。」
萬綺雯說，休息四年，在無綫重新開始，最寶貴的收穫還是總算滿足了家裏老人的多年心願：「 90歲嘅爺爺，都係睇開無綫，我知佢好恨睇我入無綫；我突然間嫁人，媽咪雖然唔出聲，我知佢心裏邊始終覺得個女可以再好啲；仲有老公，始終我哋一齊 13年，成日匿埋喺屋企，話題遲早會講完，𠵱家每日都有新鮮事分享……簽無綫嘅最大收穫唔係有幾多收視、每集收幾多錢、可以有幾紅，真正賺到嘅係呢啲。」
42歲萬綺雯在《老表，你好 嘢！》中扮學生妹又扮美少女戰士，引發全民熱話，連樂易玲都承認力邀萬綺雯改簽經理人合約中。
去年 6月與無 綫簽下三年部頭約，繼《老表》後，再主演《好心作怪》，與苗喬偉演夫婦。
為甚麼要眼紅
再度走紅，立即就有是非跟身。有報道指，樂易玲用僅次於胡杏兒的每集五萬酬勞，利誘萬綺雯簽做親生女，引來過檔無綫的其他前亞視花旦眼紅。聽說，樂小姐召見萬綺雯，親口說過：「成個亞視，咁多年我淨係留意你一個！」；還有，《好心作怪》編審潘美鳳說整個劇本是對着萬綺雯張相寫出來……俾着第二個女藝人聽到這些，好難唔眼紅。
「我第一次見樂小姐，佢真係咁講過。係……呢句說話我聽得多，都係嘅……但出自高層嘅口，始終係肯定。《好心作怪》接住《老表，你好嘢！》拍，我本來推咗。有日撞到美鳳同監製張乾文，佢哋堅持要我聽咗個故仔先，然後張乾文望實我對眼：『蚊，你做啦！』你話我執到支好籌，無可否認，但我做每一樣嘢投入程度，睇電視嘅人未必會知，點解人哋拍完會再搵我，總有原因。」
劇運及高層緣都贏其他同樣過檔亞視女藝員九條街，有報道指萬綺雯惹來田蕊妮眼紅：「我唔信 Christy（田蕊妮）有咁講過。」《蘋果日報》圖片
二千年《殭屍 2》播出大結局收視高達 20點，萬綺雯卻在事業巔峰時與《殭屍》系列編劇陳十三撻着閃婚。《蘋果日報》圖片
上鏡身材 fit到漏，來到現場才發現萬綺雯瘦過頭，件件加細碼都浪唔起：「其實我𠵱家已經肥咗十幾磅，個個問我點解肥唔到，我通常都係輕描淡寫：『唔夠瞓！』冇人知我背後做咗幾多努力。《老表》拍完同《好心作怪》之間得兩日時間畀我刨劇本，我踩足兩日冇瞓覺做功課。我咁多年都有一個習慣，每開一套劇就開一本簿，寫低所有場口、對手戲係邊個演員、應該着咩衫、感情瓜葛去到邊……《好心》我有好多獨腳戲，晚晚包廠淨我一個拍到天光、喊到天光。以前我唔敢過檔，係怕陌生環境，其實呢班新同事都好 sweet，燈光師陪我拍到天光，安慰我：『放心，我打燈打靚啲你！』；化妝師主動捉我出廠，要幫我執番個妝；仲有我喊到收唔到聲，道具哥哥當我細路咁氹我請我食朱古力……妒忌心，男女都會有，偏見，去到一個新嘅地方，少不免會存在。我咁多年都係，拍劇連瞓都唔夠時間，仲邊度得閒解釋。大家有眼睇，場戲係唔係我嘅都好，我都係咁做，做戲講嘅係 team work，一個人搶晒所有嘢，有咩意思啫？明明係一場群戲，但係見唔到呢班人有群體精神，又有咩意思啫？細個嗰陣，我都唔明，成日返去問老公，點解呢個唔鍾意我？點解嗰個要踩住我上？做咩要爭呢？……老公答案次次都係嗰句：『因為佢冇安全感囉！』我老公講嘢就係咁有分量，一句就將我由唔明，講到識得同情佢哋。」
萬大事有佢
由亞視最紅，做到無綫最搶手，與樂小姐商討中的經理人合約，萬綺雯說一切皆有可能，不肯定的事絕不公布：「連我都可以喺無綫出現，我唔敢再話呢個世界有啲乜係一定冇可能。咁多年嚟，我做人同做嘢都一樣，鍾意順住個緣分，有自己一套方法去衡量件事，點解做、點解唔做。總之我唔會爭，要爭，我唔會係今日嘅萬綺雯。」
這次之前，無綫上次熱情洽談萬綺雯過檔是 2000年，《我和殭屍有個約會 2》大收旺場，同時與無綫爭人的，萬綺雯還說有中港多間大型經理人公司和電影公司，她萬萬沒料到，《殭屍 2》的慶功宴上竟然和編劇陳十三過電，七日後就決定赴美註冊：「嗰個 moment，所有人都話我放棄咗黃金機會，其實我係捉緊咗最寶貴嘅嘢就真。好多人，總會有一刻，被沖昏頭腦，唔記得自己當初想要啲乜，但係我好清晰，由始至終我都知自己最想要一個家庭。點解你哋要覺得犧牲呢？其實嗰一刻，係我人生最開心嘅 moment。你知唔知？勾心鬥角係雙方嘅，我唔爭，所以呢啲新聞從來唔會喺我身上成立。喺呢行咁多年，話遇上所有嘢都係開心，擺到明係呃人。但係無論我喺出邊遇到乜，老公都話：『唔緊要，有我响度。』有老公畀咗最大嘅愛我，我覺得好夠，其他所有嘢都唔使要、唔使爭，有時係會蝕少少畀人，我都會同自己講，唔怕，我仲有好多，我仲有老公！」
走紅後成為雜誌報紙追訪目標的萬綺雯，被偷拍內容不是留在家裏淋花護草，就是在西貢沙灘片石吹風，極純情。
萬綺雯最心疼 90歲的爺爺（右二）和媽媽（左二）：「等 咗咁多年，終於俾佢 哋等到我入無 綫拍劇。」
最甜
無綫編審潘美鳳寫劇本話是對着萬綺雯張相寫，我問萬綺雯，編劇老公陳十三難道沒想過為老婆度身訂做劇本嗎？萬綺雯回答：「佢係編劇、我係演員，一入組件事就會複雜咗，我好避忌，唔想有不必要嘅麻煩。」
編劇們寫起愛情故事，往往天花龍鳳、海枯石爛，我問萬綺雯，編劇老公陳十三的甜言蜜語肯定非一般吧！萬綺雯說，陳十三沒有甜言蜜語，讓她記了一輩子的，只有 03年在北京拍《殭屍 3》受傷時說過的：「佢話：『我真係好後悔……』佢話後悔畀我帶傷上陣，一路講一路喊……就係因為佢係我老公，我拍嗰陣時先至會咁搏命之嘛！」
演員老婆與編劇老公的最甜對話，莫過於此。 
撰文：朱小博
攝影：范仲良
化妝： Lu
髮型： Domanic Tao@ Orient 4
形象： Bryan@ the Flaming
服裝： MARELLA、 WEEKEND by MaxMara
地點提供： Peak Cafe Bar
留言列表
{{ article.title }}
