Carol 20歲
浸會大學國際學院
新聞學副學士
Yr.2

U撈

籃球女球證　衝破歧視　享受比賽

2012年11月28日 ~~ 第1088期交易通．搵車快線

現今社會講求男女平等，但各類球證仍多以男性為主。就讀浸會大學國際學院新聞學副學士的 Carol因熱愛籃球，走入男性賽事的圈子，兼職籃球球證，雖然在球場上曾受歧視，但她希望證明給所有人看，女仔能力不比男仔差，亦可從另一角度享受比賽。而且香港對籃球球證需求好大， Carol月入最多可達 6千。

除了場上執法，一場賽事還需要另一位球證負責計分和賽事記錄。

「小學上體育堂咩運動都會試玩，覺得籃球嘅快速節奏同團體合作吸引到我，喺中學開始參加籃球學會，繼而參加籃球比賽，有時師兄師姐會叫我幫手 mark分，接觸多咗呢個圈子，識咗啲球證朋友，覺得做球證同樣係熱愛籃球，於是報讀籃球球證課程考牌入行。」
球證市場龐大，正是吸引 Carol入行的原因，「喺香港做籃球員搵唔到食，所以我只係業餘比吓賽，反而球證喺香港有生存空間，近年唔少團體都會舉辦私人聯賽，每日都有大大小小嘅比賽舉行，淨係新界每日已有 3至 4場，加埋九龍香港島會有十幾場，而 10月至 3月仲有學界賽，可以話係旺季，對球證嘅需求量好大。」球證時薪約$130至$150， Carol月入最多約 5至 6千元。
Carol說要考球證，並不是死背書就可以，「考球證會有筆試同模擬試，筆試將動作變晒做文字，要自己諗番個情景好易做錯，我考試時由 2百幾人 foul剩 80個，之後會有考官睇住落場實戰一次，我仲記得嗰陣太緊張，成場比賽見到人犯規我只係打同一個手號，完咗都俾考官話，不過考之前球證朋友指導過我，所以走位同作出判決冇咩問題，最後都通過咗。」

公正執法完成比賽

球證作為第三者參與賽事，對比賽的進行十分重要，「球證嘅作用要令個比賽順利咁完成，執法上要做到公正同控制到比賽節奏，聽過有啲球證判得唔好，令到現場氣氛好火爆，球員成日有肢體碰撞，差啲搞到兩隊球員衝突，所以球證嘅判決唔可以亂嚟，唔可以俾個人情緒影響到。」
球證的工作令 Carol更懂得分配時間，「比賽多數集中喺星期六、日，如果一至五就會喺夜晚，放學我要趕過去，好多時返到屋企已經超過 11點，做埋功課要一、兩點先瞓到，時間要預先分配好，到考試或者要交報告時，我就會做少啲，始終學業重要。」
雖不是落場比賽，但球證的工作並不輕鬆，「球證都要跟住個波跑，可以話跑足全場，女仔可能會比較辛苦，不過我打開波，體力上都應付到，不過球賽變化得好快，要睇人有冇犯規，專注力要好集中，好多時連做兩場，真係幾攰㗎。」

球場上，球證的判決對賽事影響很大， Carol說︰「男同女其實冇咩分別，最緊要判決公正同做好自己。」

遇到突發情況，例如球員受傷，球證都要保持冷靜，控制場面。

球證要時刻留意比賽的進行，整場比賽需不斷走位，身為女仔的 Carol也不能有優待，體能絕對要好。

Carol（後排中間）中學開始已經鍾情籃球，不時與同學一起組隊參加籃球比賽。

運動型的 Carol（右一），與同學上台報告時穿上套裝，有其斯文一面。

球員 Michael

我參加過唔少比賽，女球證真係比較少見，不過只要體能跟到個比賽節奏，覺得男同女都冇咩分別，我見 Carol嘅判決都幾公正，呢個已符合到球證嘅重點。

女球證仍遇到歧視

現今社會追求男女平等，但有時 Carol會在球場上遇到歧視，「家香港嘅籃球球證， 10個有 1、 2個係女仔。試過有次做球證，聽到有球員話做咩叫個女仔嚟做球證，唔掂喎，嗰刻心入面真係唔舒服，唔想人用性別去區分辦事能力。其實女仔做球證都可以判得好好。」
熱愛籃球的 Carol，還與一班志同道合的朋友一起搞私人聯賽，「之前時不時要幫人籌備私人聯賽，今年同朋友決定申請開間公司，自己搞私人聯賽，叫《 Ad Hoc Basketball League》，希望可以提供更多平台畀鍾意籃球嘅人交流，今年都 last year，希望可以升上大學，所以個聯賽完咗會放多啲時間喺學業上，會做少啲球證。」

點入行？

想學 Carol做籃球球證，可以先去考球證牌，香港籃球總會每年會不定期舉辦球證培訓課程， Carol說：「其實做球證冇規定要考牌，不過球證除咗控制比賽秩序之外，記錄都係球證嘅工作，好似 T係技術犯規， P係侵人犯規好似用手推人、撞人咁，考牌嗰陣有教埋啲記錄符號，有牌始終俾人感覺專業啲，會多人請，想做埋學界球證就一定要考牌。」想找球證工作可以留意勞工處或一些籃球論壇，不定期會有人聘請球證。