十二歲的黃焯思熱愛運動，經常代表學校比賽，她去年四月在家中暈倒，屯門醫院卻診斷不出她的病因，最後在五月一次睡夢中猝死。

新聞耳目

一千人得 0.6個醫生　斷錯症死者母親：等同謀殺！

2012年10月04日 ~~ 第1178期香港《壹周刊》

死因庭聆訊一宗屯門醫院死亡事故，患了心律失常的十二歲女童黃焯思，去年暈倒入院，但醫生卻因為斷錯症，結果不幸死亡，出庭的港大心臟科教授指屯門醫院醫生水平低，陪審團更要求醫院日後加強對病人的臨床照顧。
這宗事件再次敲響屯門醫院人手不足，以致照顧不夠的嚴重問題。原來，屯門醫院的醫生人口比例是全港公立醫院最低，每一千名市民，只有 0.6名醫生照顧，比伊利沙伯醫院少一半，前線醫生聯盟要求醫管局把資源「分得勻啲」，女童母親哭訴：「我唔想再有其他人好似我個女咁受害！」

屯門醫院人手不足問題拖延多年一直未解決，嚴重影響醫護士氣。

「如果屯門醫院唔係斷錯症，我個女可能仲坐喺我身邊，可以陪多我十年，但因為醫院嘅疏忽，我無咗個女，而家屯門醫院等同謀殺，我要取回公道！」雖然女兒過身超過一年，黃太憶起這段痛苦往事，依然非常激動，眼淚不停地流，「呢個女對我生命最重要，我咁辛苦日做夜做都係為咗佢，佢而家唔喺度，我覺得生活再無咩意義，只係希望為個女取回一個公道。」

昏迷不醒

四十多歲的黃太，與丈夫及女兒住在元朗西菁街，他和丈夫經營二十四小時報檔，「為搵食無辦法，生咗焯思後都無咩時間陪佢，但佢好生性，好獨立，我夜晚十點幾返屋企食飯，佢會幫我裝飯，食完佢又會拎啲碗入廚房洗。佢好好記性，識幫我睇檔收錢，幾十種煙嘅價錢佢都記得，把口又好似我咁牙尖嘴利，冇人恰到佢㗎！佢又好好心地，啲客人泊車喺檔口附近，見差人來抄牌，就會幫口話個司機買啲嘢好快就到，希望差人唔好抄，好多熟客都好鍾意佢，人人都叫佢做阿妹。」
焯思在元朗光明小學讀小六，酷愛運動，最鍾意打籃球，經常代表學校參加比賽，「佢成日替學校比賽，得到好多獎牌，佢好緊張啲獎牌㗎。過身後，我將佢贏得嘅十六塊獎牌全部燒埋陪葬。學校老師同校長都好關心我，寫好多卡支持、開解我，我真係好多謝佢哋，又要多謝幫我個女辦身後事嘅世叔伯，唔係真係唔知點算，醫院從來都冇安撫……」黃太說。

黃太十分思念愛女，「我記得去年五月十四日同佢去攞回鄉證，諗住放暑假去旅行，佢好開心咁問我係咪真，我話係呀。佢去咗之後，呢一年我好痛苦，嗰種痛係其他人唔明白嘅。」

黃太說女兒性格像她，是她生命中最重要的人。

黃太眼中的焯思，活潑好動，沒想到病發短短一個月內便離開人間。去年四月二十日早上約十時，焯思突然在家中暈倒，「當時我洗緊衫，出到廳就見到佢趴喺地下，話媽媽我暈咗，之後爸爸就同佢入屯門醫院急症室，入咗內科病房。」
兒科醫生替焯思抽血做檢查，說沒有問題，但靜態心電圖檢查就發現她心跳每分鐘只有四十多次，比正常六十至一百為低，後來兒科副顧問醫生鄭恩華看過她的臨床報告，知道她在學校經常運動，認為焯思有運動員心臟，「醫生話佢經常運動鍛鍊，有運動員心臟，所以心跳會比正常人慢啲，為咗搵出真正原因，要佢做二十小時心電圖測試，佗住部機返屋企做檢查，但部機要排到二○一三年八月先有得做。後來醫生又話焯思情況嚴重，安排佢入院，希望可以幫佢打尖攝期，但等咗兩次都係等唔到，後來醫院寫咗封轉介信，叫我陪焯思去私家做。」焯思於五月九日到元朗香港體檢做該心電圖檢查，但中心表示要到五月二十日才有結果。

焯思生前曾送卡給母親作母親節禮物，多謝她養育之恩。

焯思生前的畫作，充滿少女氣息。

在出結果前一晚，焯思再度在家昏迷不醒，「佢當日（十九日）中午去屯門醫院覆診，返到屋企就話好攰，食完飯我陪佢一齊睇電視，我仲記得佢同我講，話媽咪你攬住我啦，我想攬住你呀，我話你聽日要返學早起身，你自己瞓啦，佢瞓之前仲同我眨眼做鬼臉。第二朝爸爸叫佢起身，但無反應，入到房就即刻大聲嗌：阿妹做咩咁㗎！我衝入房，就見到阿妹冇晒知覺，眼同口有少少張開，成張床濕晒，爸爸即刻打 999，但已經驚到㩒唔到電話啦……」

各聯網醫生人口比例

根據醫院記錄，焯思在送院時已不治，遺體解剖後，發現肺、肝及脾均有充血及水腫。（《蘋果日報》圖片）

低於專業水平

蕭頌華教授在庭上指焯思沒有運動員心臟，指屯門醫院醫生的水準低於專業水平。

港大醫學院心臟科教授蕭頌華上週在死因庭上作供時，表示焯思沒有運動員心臟，而是患了一種叫「 QT間期延長綜合症」的疾病，「這種病其實可以根據病人的靜態心電圖判斷出來，病人唔需要做二十四小時心電圖，做咗對診斷都冇幫助。」
蕭教授指出，患了綜合症的病人，會出現心律失常，心跳過慢，第一年的死亡率高達兩成，但若及早發現用藥治療，死亡率可減至百分之五，又說此病可能是遺傳或由藥物刺激而引起，「一般人心臟靠有秩序嘅心跳運作，但患有綜合症嘅病人，呢個運作過程會亂咗，病人會喺做運動、聽音樂甚至睡眠嘅時候發作，加速心室亂跳，令心臟泵血率降低，出現急性腦缺氧致死。」他認為醫生未能替焯思準確斷症，「水平低於可接受的專業水平。」

屯門醫院質素及安全部服務總監鄧錦成醫生接受訪問時坦言，要加強屯門醫院的人手培訓，「今次發生呢件事，我哋覺得好可惜。而家兒科部有兩名醫生，已經接受緊心臟科方面嘅培訓，定期去其他醫院中心會診，向其他醫生吸取經驗。」
「每件事我哋都會睇深啲，希望從整個系統裡面作出改善，例如今次件事同醫生嘅認知不足有關，我哋會諗點樣加強對醫生嘅 backup，如果主診醫生都唔識處理，就可能要有方法，等佢可以向上再搵高一級嘅顧問醫生尋求意見。」

新界西無私院

屯門醫院的醫生人口比例全港最低，醫護人員在醫院張貼怨氣貼紙以示不滿，貼紙已貼了一年，但問題仍未解決。

在屯門醫院做了十年的前線醫生聯盟副主席吳志豪醫生表示，屯門醫院的根本問題是人手不足，總部資源「分得唔勻」所致。
他指出，目前醫管局七大聯網中，新界西聯網的醫生人口比例最低，每千名市民只有 0.6個醫生，比九龍中 1.3少一半，「九龍東、九龍西都係 0.6，新界東有 0.7，照數字睇你可以話屯門唔係最慘，但係新界西無私家醫院，住喺屯門元朗區嘅市民又比較窮，有咩奇難雜症差唔多全部都要入屯門醫院，其他區嘅市民就有私家醫院可以分擔，所以屯門醫院實際所承受的壓力，係比其他區嘅醫院大得多。」

食物及衞生局局長高永文表示關注公立醫院的人手緊張問題，指屯門醫院情況比較嚴重，要想辦法解決。（江永健攝）

他表示，每年醫管局給新界西的撥款都有增加，但醫生人口比例仍未能改善，證明資源調配有問題，他要求總部檢討原因，增加醫生人口比例到一個合理水平，「中央（醫管局）係有錢，但如果分得不好，問題始終會持續，其他龍頭醫院資源多，有時間搞好多 programme攞錢，屯門醫院醫生忙到死，都冇時間，唔通叫中央調九龍中醫生過屯門幫手咩！呢個歷史問題一定要解決先得！」
黃太希望女兒的死，可以喚醒政府對屯門醫院的關注，「我成日自責點解唔陪阿妹多啲，而家我十晚都有九晚瞓唔着，眼光光等到天光，最近焯思報夢俾我，話唔想我再喊，話會保佑我，我都希望焯思安安樂樂去到仙境享福，我好希望政府改善而家嘅醫療，等唔使再有人受苦。」