訪問廖偉雄，在指令指示下，漢堡包，是不二道具，三十三年前電視劇的威力仍在，只是當事人表示：「我依家都好少食漢堡包，係都係間唔中食一兩個，不過我好享受拍嘅過程。」

廖偉雄=阿燦，就是因為《網中人》的力量，覆蓋範圍之廣，不止局限於亞皆老街及太子道西一帶。往後的變奏版，還有「港燦」，變奏還是離不開時移世易，平常不過。

連「阿燦」本人，亦經歷過一次又一次的生意失敗、破產，由香港到馬來西亞再回歸大陸，現在每周回港一次，為「有線」節目《食出五味人生》錄影。

辛苦嗎？「唔辛苦，我做（節目），都係為咗我啲仔女睇。點會辛苦？」

訪問中，廖偉雄不止一次的強調錢財、名氣、衣裝只是身外物，

千金散盡仍陸續有來，唯獨其妻及兩名子女，才是他的瑰寶。

自由發揮

選擇透過飲食節目與子女溝通，是廖偉雄活了五十五年的智慧，人生營營役役數十載，為的只是三餐一宿。「做人咁辛苦做嘢，都係為兩餐啫，飲食先係一門藝術，呢啲（一指上衣）同呢啲（一指手表），全部係身外物。無論有冇錢，都係要食得飽着得暖有張牀瞓。我啲仔女唔識睇中文，就算我寫信佢哋都唔識睇，要佢哋明白我嘅message，最好嘅方法就係拍畀佢哋睇，畀隻DVD佢哋就得。」

廖偉雄一對子女，在父親耳濡目染下，都從事與飲食有關的行業，剛結婚的大女兒，在新加坡某餐飲集團從事行政工作，兒子則在馬來西亞，與友人合作搞馬拉餐。

「我冇控制佢哋做啲乜，我自己依家都係邊做邊學，只要佢哋鍾意同enjoy就OK。不過我會解釋畀佢哋聽，好似個仔去瑞士讀餐飲管理之前，佢想去歐洲讀踢波o架，我同佢講，『仔，如果你仲係十二歲，老竇一定支持你。』

「但係佢嗰時已經十七歲，讀完都同唔到人爭啦！佢諗咗幾日，都係揀咗去瑞士。去到瑞士，好多同學係富二代，出入揸靚車，我就連車都冇買畀佢，只係話：『你同學仔有車，你同佢friend嘅，佢一定車埋你。』

「佢真係有好多朋友吖，連我哋去佢嘅畢業典禮，都係由佢啲friend接送，坐Benzo架！哈哈！」

說到子女，廖偉雄的笑聲嘹亮；說抱孫，他反而有所保留，「邊度控制得咁多？個女開心就得啦！佢同我女婿覺得係啱timing嘅時候就得嘞！」

收起搞笑一面，廖偉雄的演技，毋庸置疑。

老實商人

在子女眼中，廖偉雄是開明父親，就算他現在於大陸羅定市定居，每周仍與他們通電話，至於剛跟他慶祝結婚三十周年的「燦嫂」楊慧玲，不用工作時，也與他居於大陸，風雨同路。

「太太一定跟住我啦，哈！其實佢都好忙o架，喺山打根嗰邊同人夾份，買咗十三個島，起咗五十間燕屋做燕窩，同我一樣，佢都係老老實實做生意，貨真價實唔呃人。係咪蝕底？我唔係咁睇，就係老實先有返頭客，靠口碑好過你講到天花龍鳳啦。」

說「燦嫂」時，廖偉雄特別鬼馬，他還稱：「好彩燦嫂都有嘢做，唔會得閒成日煩住我咋！」話雖如此，廖偉雄與燦嫂互相扶持了三十年，即使期間二人關係曾一度亮起紅燈，但風雨過後，夫妻關係更勝從前。

「其實兩公婆邊有可能唔鬧交吖？有時鬧吓發洩吓，之後互相o氹番大家，都係一種好嘅溝通方法。我同太太有咩問題都會拎出嚟傾，兩個腦諗點都好過一個人鑽牛角尖。」

飲食是一門藝術，而漢堡包在廖偉雄人生中，則是一條打開名氣之門的鎖匙。

燦嫂、女兒及兒子（左至右），是廖偉雄人生中最重要的人。

廖偉雄於八二年與馬來西亞籍的燦嫂結婚，現已相守三十載。

阿燦種米

二○○○年廖偉雄生意失敗以致破產，就是在燦嫂支持下，舉家移民到燦嫂老家馬來西亞，在馬來西亞，他又投資燒臘生意，再嘗當創業者滋味，但可能沒那種老闆命，也是損手離場。終於，○五年他加入大陸一間農業生物科技公司當總經理，在廣州種有機稻米「阿燦米」，愈來愈有起色。

「我都講過，飲食係一門藝術，但係依家國內最大嘅問題係雞唔似雞、豬唔似豬，連雞蛋都有假嘅，個個做生意只係掛住搶錢。我做生意，同做人一樣，都要講良心，唔識我就學到識，真係落田同啲農民學耕田、種米，再研究咩水種出嚟嘅米會點。研究到一條成功嘅formula，我搵到食，教埋其他農民去學呢種技術，人哋都搵到食，咁就最理想。」

並非賣廣告，但廖偉雄的良心，就賺了不少「返頭客」，在廣東省已不愁沒定單，下一步，他要發展「米液」（即酒），用三年時間發展，再上市。「上市後就可以集資、再擴大範圍，我嘅責任亦都完成。」

廖偉雄對事業仍滿肚密圈，但說到復出演戲，他即耍手擰頭：「客串都仲可以，真係再拍drama就要花好多時間，況且我好享受依家做嘢嘅過程。客串就可以止到我啲戲癮嘞！」