娛樂八掛大放送★

遺失USB手指導致洩漏個人私隱的新聞，隔幾個禮拜總會有一單，好似上個月又有市民執到食環署的USB手指，內藏近200個被檢控阻街、亂拋垃圾及煙蒂的市民私隱，認真離譜！ 
要防止洩密，可以借助加密軟件為USB手指加鎖，有密碼先睇到內藏檔案，免費又易用。

功能齊全
加密軟件其實有好多，不過全部要收錢，就算部分話免費，實情是只可為4GB以下容量手指加密，嘥氣！唯獨File Secure Free（http://www.mitracker.com/file-secure-free.html）講到明費用全免，而且絕無任何條件限制，好均真。除了可以用密碼鎖實USB手指，仲可以獨立為指定檔案及文件夾加密，或永久刪除機密檔案，保安功夫做到足。

按Lock即鎖
用法簡單，只要用電腦下載及安裝軟件，啟動軟件後，就可以在「Lockup」版面選擇要加密的USB手指，㩒「Lock」掣設定密碼，完成後，只可以用相同軟件先解到鎖，換言之，想在其他電腦解鎖，都要下載及安裝相同軟件，好在軟件只得2MB容量，download連安裝兩分鐘內搞掂。麻煩是麻煩，但就更有保障。

嚴選密碼
早前黑客入侵社交網站LinkedIn（http://www.linkedin.com），仲寸到將646萬個戶口資料連同密碼放上網任睇，搞到人心惶惶。不過亦多得黑客將名單公開，先知原來好多人改密碼極為求其，就算無被偷，都好易俾人撞中！ ####

File Secure Free幫USB手指加密碼鎖，就算遺失手指，亦可減少資料外洩風險。

鎖USB手指無多餘步驟，揀好手指一按「Lock」再輸入密碼就搞掂。

嫌一個密碼未夠穩陣，可以再為指定檔案獨立加多個，多一重保障。

上鎖後，USB手指變成零容量，即使在「我的電腦」介面見到，但都無法double click打開。