被指恰同房李渼琦（右），湯洛雯（左）嗌晒寃枉。
港姐質素持續低水，導演王晶都加把口話「波平質劣」，要醜中求勝，無綫搞公投互out製造驚喜，之後再安排復活戰，要佳麗爭崩頭。上週二（六月十二日），十六位準港姐啟程到英倫拍外景，湯鎮業姪女湯洛雯被視為賽前大熱，卻被指恃靚行兇公主病發，拍外景樣樣say no唔肯做，被工作人員封為「麻煩女神」。對大會冇有怕，對佳麗更加唔留手，外景行程進入尾聲，有正義佳麗爆料，指湯洛雯勁恰同房「鬼妹仔」李渼琦，將自己的胸圍底褲四圍丟，當對方無到。
爆惡行
今年港姐玩淘汰制，由原先三十位佳麗篩剩十六個，之後出發到英倫拍外景再分成兩組玩out人，而賽前一直被睇高一線的湯鎮業姪女湯洛雯，順理成章躋身賽前三甲大熱。有背景又被睇好，湯洛雯有恃無恐，得罪幕後再被佳麗聯手杯葛，臨返港前兩日（十八日），打定輸數的尤蔭蔭睇唔過眼，向記者大爆，指湯洛雯蝦同房的李渼琦。「我咁惡無人敢恰我，我睇唔過眼出聲啫，有啲人恰啲純品嘅佳麗，（渼琦呀？）係！（點恰法？）將啲底衫褲亂丟囉……」
扮無辜
成為受害者，委屈多日的李渼琦接受訪問時講出真心話：「好多女仔對我都好好，（湯洛雯呢？）嗯……唔好囉！不過我而家可以調去卞曉帆嗰邊，好開心。其實之前都有諗過轉房，但得番幾日，唔搞咁多。」有關湯洛雯的恰人招數，李渼琦說：「我同佢say hello，佢走咗去，我最驚佢整蠱我，整亂晒我啲嘢，同放啲濕嘅嘢喺我度。今朝我見到佢喊，嚇到即刻走咗，我好驚佢。」至於「犯婦人」湯洛雯知道惡行被揭後，即扮死狗搏同情：「係咩？佢真係咁講？冇呀，我有時夜返房見佢瞓咗都唔敢沖涼嘈醒佢，平時又讓佢沖涼先。我係有時漏低啲嘢喺toilet，但我好有禮貌，講晒唔好意思入去攞番。」
因流出與男友鴛鴦慾照，在英倫之旅被foul出局的鍾麗，到埗英國，將所有行李堆上行李車，由朱千雪一個人推晒，見有記者影相，才扮嘢幫手攞行李。
因禍得福
據知，廣東話麻麻地的李渼琦，經常被佳麗取笑傻吓傻吓無帶腦出街，而身為組長的湯洛雯，為要強化組員質素，一直想將李渼琦調到已有兩位佳麗出局、由卞曉帆統領的另一組。無綫方面得知有佳麗被針對後，立即安排調組，李渼琦避過一劫，「過檔」後表現開始回勇，在日前的儀態比賽上，要頭頂書行catwalk、批蘋果及摺餐巾花，李渼琦都得最高分，成為第三位獲「免foul金牌」的佳麗，因禍得福。
怪胸人
觀眾最熱切期待的三點式泳衣環節，因佳麗多數胸平肚凸腰又粗，大大減弱視覺效果，難怪大會遲遲未肯公布佳麗三圍數字，怕失禮街坊。 ####
尤蔭蔭（左）爆湯洛雯（右）惡行，賤招恰李渼琦（中），三人在記者要求下被迫合照。
尤蔭蔭（左）爆湯洛雯（右）惡行，賤招恰李渼琦（中），三人在記者要求下被迫合照。
湯洛雯接受訪問唔認恰人，仲話自己好有禮貌，但記者連日所見，行為粗魯的湯洛雯，同MK妹冇 分別。
素顏嚇人到埗英倫，眾佳麗素顏食早餐，同樣零妝的湯洛雯，戴埋眼鏡走晒樣。之後見到食物唔啱胃口，即時扁晒嘴。
最大露出又深又長的事業線，朱千雪算是今年的港姐「波霸」，可惜胸大腩更大， 扣分。
留言列表
{{ article.title }}
