老實實，媽咪姐自問係娛樂圈「資深觀察家」，有乜嘢世面未見過吖？不過， 呢個世界，真係一百歲唔死都有新聞聽。今次叫媽咪姐大開眼界嘅，係「呃鬼老細」呀！


話說大家都知呢個圈一向龍蛇混雜、危機四伏，喺N年前嘅一個月黑風高殺人夜，得閒就見吓報嘅娛樂公司揸fit人「呃鬼老細」，唔知得罪咗乜嘢有勢力人士， 俾人喺街頭追斬。嘩！當時刀光劍影，腥風血雨，「霍」一聲，一把刀就要劈落「呃鬼老細」度！說時遲那時快，竟然有一名保安勇字當頭，用膊頭幫老闆擋咗一刀，啲血流到一地都係。好彩嘅係，呢刀劈得唔算好深，佢無性命危險，但都休養咗一排。事後，「呃鬼老細」話好多謝呢位勇士，仲送咗隻「金勞」俾佢㖭！當年呢位保安勇士好感動呀，覺得堂堂大老細都咁有heart，於是將隻「金勞」當寶咁收埋喺保險箱。不過近年經濟唔好， 佢手頭有啲緊， 先忍痛攞隻錶去當舖，諗住攞番幾萬蚊周轉。「先生，隻錶假㗎喎！」點知當舖老細睇一睇隻錶， 就彈出呢句令擋刀勇士差啲想噴血嘅說話。唉， 乜嘢江湖義氣乜嘢感恩圖報喎！有名你叫「呃鬼老細」啦，信一成，都死！ ####



 

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄