單人訪 有人的地方，就有江湖。萬梓良的江湖，特別富戲劇性。
「可唔可以等我食支煙先開始？」他禮貌周周地問。
抽煙的藝人很多，但抽辛辣的中華牌，暫時只認識萬梓良一個。他的氣場，很「大佬」。
「杜汶澤一見到我就嗌『萬梓哥』，嘩，哥前哥後三分險，點知佢係咪想等我鬆毛鬆翼，到正式拍戲時先將我（加手勢）剁剁剁剁，剁到一頸血㗎？」他哈哈大笑。
笑話一則而已，但也異常血腥暴力。萬梓良77年入行，95年離開，從電視台廝殺到商場。全盛時期旗下六十家時裝店，最折墮時蝕了一千六百萬。雖說人在江湖身不由己，但更多時身處的不過是混濁黏稠的漿糊，充斥着混水摸魚混飯吃的人。
「所以娛樂圈算好㗎啦，做生意死得仲慘。」抽着第三支中華牌香煙的萬梓良，認真地說。
哥前哥後
萬梓良作風豪邁，有碗話碗有碟話碟。新戲《懸紅》夥拍出名轉數高的杜汶澤，也不是一味有讚無彈。
「杜汶澤一見我就同我講：『阿萬梓哥，我同陳奕迅都係你超級fans，你喺《英雄好漢》入面同發哥嗰場戲，我做咗五十幾次俾我老婆睇！』個衰仔成日賣口乖，但我都好清醒，佢太精靈喇，我要打醒十二分精神。薛凱琪就真係完全唔識……吓？已經出道八年？真係未聽過佢啲歌。不過我仲新過佢，我係老牌新人，嘻嘻！」
如不計兩年前客串《李小龍傳》，萬梓良對上一次真正的電影演出，已是2000年古惑仔系列的《勝者為王》。電視劇更遙遠，是1995年的《萬里長情》。
「呢十幾年當然有好多電影搵我，但都只係電話裏頭好敷衍咁講下。拍幾耐？唔知！內容係點？唔知！幾錢片酬係咁意都要提下啩？又唔講，你叫我點拍！今次拍《懸紅》係黃柏高先生（Paco）親自打俾我，人哋講到最後都識問：『萬梓哥，朋友還朋友，收幾多片酬先？』佢越係咁問我越無所謂，最緊要我feel到佢有誠意，同好尊重我！」
萬梓良今年五十五歲，服裝生意老早上了軌道，現時所求的，只是一份久違了的尊重。
「最感動嘅係Paco話今次個導演係新晉導演（馮志強），想搵個有分量嘅人支持一下。 我當然要幫手。想當年我都好支持啲新導演，啲新導演後來變晒大導演，班大導演冇再搵我之嘛！」
人走茶涼，不是個個念舊。
「人情冷暖，呢行最明顯。所以我好多謝晶哥（王晶），佢耐不耐就搵我。我唔怕醜㗎，配角都唔拘。我覺得你搵我，即係欣賞我，幾難度期我都會度俾你。」
萬梓良很義氣仔女，你耍他，他睬你都傻；相反你敬他一尺，他肯定敬你一丈。
「我一直好鍾意拍戲，出入海關，職業一欄依然填『演員』。其實我喺大陸未停過拍劇，只不過做咗生意之後減產咗啫。」
自己執骨
萬梓良95年毅然放棄電視台如日方中的男主角位置，進軍大陸做服裝生意。此舉很多人都摸不着頭腦。「係因為疲勞，好疲勞，好疲勞……（繼續再說了三次）藝人一日開兩組戲已經好巴閉，我一日開三組，每朝06（早上六時）通告，收工就收30（翌日早上六時），開足廿四小時。莫講話世界發生乜事完全唔知，我身在娛樂圈，連娛樂圈發生乜事都唔知。做服裝生意一來乾淨，感覺上只係由演員部跳去服裝部咁解。二來想證明俾自己睇，萬梓良唔係淨係識得做戲。」萬梓良77年已開始在麗的拍劇，《大內群英》、《浮生六劫》和無綫時期的《流氓大亨》、《成吉思汗》等早已為他在國內打響知名度。88年更憑電影《大哥大》奪金馬影帝，地位超然。他以自己英文名Alex Man成立服裝品牌，全盛時全國有六十多個銷售點，風頭一時無兩。「有人肯俾生意我做，梗係因為我名氣。斟茶灌水少不了，我成日都話『酒逢知己』，飲親都最少飲一支幾呀！」國內人叫他「萬哥」，很吃得開。「97年金融風暴完全冇影響，可能越危越有機，嗰年最有頭有勢。其實從商仲有個終極目標，係賺到錢之後投資做製片人，想搵阿水就阿水做男主角，想搵阿水妹就阿水妹做女主角，使乜自己咁辛苦？唉……拍戲雖然唔會發達，但亦唔會要你傾家蕩產；商海就唔同，完全可以浸死人！」
万大千
「生意唔錯，佢哋都好準時交商標費俾我，我得閒過去巡視下業務就得。嗰個終極目標？冇諗好耐喇！做導演可以，但再投資真係咪搞。依家目標係家庭排第一，做乜都好，大前提唔可以同個仔分開太耐。」 萬梓良有兩段婚姻，89年拍《他來自江湖》時與恬妞拍拖，92年結婚，婚姻只維持了四年。96年飛新加坡拍劇時認識南方航空空姐郭明黎，02年結婚，兒子03年出世。「好多人以為我同太太係飛機上認識，鬼有咁浪漫！嗰次飛新加坡，成班機艙服務員都係我影迷，我哋約埋一齊食飯。太太係第二日接我班機返廣州嗰批，咁啱食飯時撞到，交換咗電話。後來我去歐洲拍外景，冇再聯絡。直至97年喺廣州做服裝生意先再搵番佢，之後先撻着。」他笑得很冧，看得出很回味。太太為洛陽人，比他年輕十五年。也不算是他影迷，只可說是緣份。「呢個老婆真係好好，我媽媽生病時，佢辭咗份工照顧老人家。成頭家打理得妥妥當當，唔使我頻撲。夫妻相處之道係佢忍我百分之二百，我只忍佢百分之九十。我冇逼佢㗎，係佢自己願意。」
躁狂
上一代的記者，都說萬梓良躁狂。我入行時他已淡出，未有機會接觸。今天所見，他嗓門極大，動作也多，絕不是斯文一族，但也離躁狂頗遠。「以前啲人成日話我躁狂，唔係誇張，係捏造！完全係捏造！（再重複兩次）弱肉強食，肉隨砧板上，試問可以抗拒得幾耐？我唔抗拒，但唔代表我認同。我惹唔起，但我躲得起……」這或許是他當年離開的另一理由。他還即場唸了一首魯迅的詩：「寂寞新文苑，平安舊戰場，兩間餘一卒，荷戟獨彷徨。」魯迅當年在文學創作路上孤獨而行，萬梓良以此比喻自己人生的無奈。「魯迅仲講過：『我雖然窮得可以，但我需要保留一條光鮮的褲子，因為我還有更重要的事去做。』每當遇到挫折嘅時候，我就會用呢句說話自勉一番。」會吟詩的人，才配行走漿糊。躁狂？So what！
《懸紅》為有笑有淚的輕喜劇，萬梓良+杜汶澤，應該幾有新鮮感。
對上一次在香港演出，是兩年前應香港話劇團邀請，主演舞台劇《魔鬼契約》，與潘燦良大鬥演技。
91年為TVB員工爭取福利而穿上「血衣」，在娛樂圈曾掀起小風波，因而被寫成性格躁狂。《蘋果日報》圖片
有指當年周星馳得萬梓良提攜，才有機會拍電影。萬梓良與恬妞結婚時，周更擔任伴郎，兩人老友鬼鬼。「唔好話帶挈，人哋都有努力過。近年我喺大陸多，比較少聯絡。」
《流氓大亨》最後一幕，萬梓良淚涕縱橫演了一場七分鐘的獨腳戲，一句So What，至今仍令人津津樂道。
留言列表
{{ article.title }}
