會客廳吳文忻以17萬月租銅鑼灣世貿中心一個三千呎的商業單位，將單位變身成擁有無敵海景的美容整形中心。
上流滙 醫學美容漸趨普遍，為了變靚，不少女士不惜工本，大施變臉神功。第一代整容代言人，曾到韓國接受削骨勾鼻、抽脂等整容手術的吳文忻，亦看準這趨勢，投資千萬於銅鑼灣開設醫學美容中心，將韓國整容技術發揚光大。吳文忻更將整容比喻生仔，認為是女性天職，她說︰「整容無乜嘢啫，就等於生仔，自然生到就梗係好，點解依家咁多人工生仔，就因為自然生唔出！」
98年港姐季軍，今年38歲的吳文忻，去年下嫁南丫島王子陳劍陵，正式過住少奶奶生活。今年初，她於朋友介紹下，認識韓國整容中心的三位院長，即心癢癢搞生意，順勢引入韓國整容的一條龍服務，於商界大展拳腳。
以身家抵押
其實吳文忻06年擔任整容代言人，目的只是希望嫁得好，她說︰「女仔個鼻主夫運，我以前撞親個鼻有節位，一直耿耿於懷。」她曾和蘇民峰擔任有線的玄學節目，對於整容改運有獨特想法，「我幾鬼八婆，又信面相、風水，成日都話勾鼻女仔會婚姻唔好、會離婚，呢樣嘢我一路都好擔心。」於是她下定決心走上整容路，遠赴韓國，被傳媒拍下整個血淋淋過程，觸目驚心。雖有宣傳效果，但負面聲音愈來愈大，「冇諗過咁多人反應咁大，不過我當年簽約做咗代言人，有好多嘢係冇得say no。」整容可否有助運程見仁見智，不過吳文忻則吸取了整容經驗，又覺得呢行大有可為，於是今年投資千萬做老闆。她滿有信心說︰「呢幾年香港人見識多咗，唔再好似以前咁保守，同埋我始終自己親身做過，點都有說服力。今次投資八位數字，係我自己辛辛苦苦儲番嚟，真係唔可以衰。依家有部分資金喺銀行做deposit，如果呢幾個月穩穩陣陣，我會開第二、三間。(老公冇打本咩?)唔好講佢咁多，佢好低調，總之佢好支持我每一個決定。」
整容一條龍
吳文忻開設的醫學美容中心，為韓國整形集團的分公司，中心內有韓籍醫生、顧問坐鎮。「REGEN係韓國最出名嘅整形集團，我哋係分公司，幫佢打開香港市場。我哋定位同一般美容院唔同，出面有啲係落閘放狗式。我哋價錢好透明，收得客人錢，由開頭傾到做完手術返嚟，係一條龍服務。我要你嚟得開開心心，心甘命抵俾錢，唔係我夾硬局你去整。整容唔使整得多，夠就得！而且所有手術都會喺韓國做，我哋有專人跟進個案。」除了整容一條龍，她更引入人胎幹細胞facial，記者聽罷立即毛管戙，她解釋：「日本、韓國已經好出名，係香港唔知點解驚，了解之後一啲都唔驚，仲覺得好正。人胎其實好補，變咗精華液之後，再導入皮膚，幫細胞修復再生，成個人後生晒。」為省靚招牌，她更計劃邀請幾個blogger到韓國整容，以真人騷方式記錄整個過程，「會寫實啲，唔會再係以前咁用驚嚇包裝，類似《盛女大作戰》咁。」雖然吳文忻現時集中火力搞生意，但她並未擱置生仔大計，「會同步進行，生仔都要講緣份，我絕對唔反對人工受孕。」 ####
高調整容吳文忻（中）06年被蕭定一（右）以百萬利誘，出任香港首位整容代言人。當時大批記者到機場等待她由韓國做完手術返港，「整咪認囉！無乜嘢啫！不過宣傳就嚇親我自己。」
削鼻改運一直希望嫁得好的吳文忻，揚言當年整容，全因想整走剋夫鼻。結果去年她就下嫁從事金融的「南丫島王子」陳劍陵，她說：「好多人話整容改唔到運，但我真係唔認同。」
美容室大部分醫學和纖體儀器由韓國引進。吳文忻為了解每部機器特性，事前做過多次白老鼠，試過人胎幹細胞facial。
CEO房為了這盤生意，吳文忻不容有失，每日朝九晚八返公司坐鎮，睇幾十份合約，「仲辛苦過拍劇。」
化妝間新舖設計簡約， 裝修以白色為主，而化妝枱設計亦由吳文忻一手包辦。
氧氣箱中心除了設有纖體、美容儀器，再罕有地以6位數字引入氧氣箱。「為咗做好術後服務，幾貴都買咗佢，佢會令傷口快復原。」
留言列表
{{ article.title }}
